ಮಂಗಳೂರು ಭೇಟಿಗೆ ಫಿದಾ ಆದ ಪ್ರಧಾನಿ ಮೋದಿ !

ಮಂಗಳೂರು: ಮಂಗಳೂರಿನಲ್ಲಿ ಕಳೆದ ಶನಿವಾರ ನಡೆದ ಬಿಜೆಪಿ ಸಮಾವೇಶದಲ್ಲಿ ಸಾರ್ವಜನಿಕರು ತೋರಿದ್ದ ಅಪಾರ ಪ್ರೀತಿ-ಗೌರವಕ್ಕೆ ಖುದ್ದು ಪ್ರಧಾನಿ ನರೇಂದ್ರ ಮೋದಿ ಅವರೇ ಇದೀಗ ಫಿದಾ ಆಗಿದ್ದಾರೆ! ಮಂಗಳೂರು ಸಭೆಯಲ್ಲಿ ಭಾಗವಹಿಸುವುದಕ್ಕೆ ಆಗಮಿಸುವ ಸಂದರ್ಭದಲ್ಲಿ ಹಂಪನಕಟ್ಟೆ ವ್ಯಾಪ್ತಿ ಯಲ್ಲಿ ರಸ್ತೆಯುದ್ದಕ್ಕೂ ಬದಿಯಲ್ಲಿ ಪ್ರಧಾನಿ ಬರುವಿಕೆಗಾಗಿ ಕಾದು ಕೂತಿದ್ದ ಸಾವಿರಾರು ಜನರನ್ನು ಕಂಡು ಖುಷಿಪಟ್ಟಿದ್ದ ಆ ಕ್ಷಣ ವನ್ನು ಮೋದಿ ಅವರೇ ಈಗ ದಿಲ್ಲಿಯಲ್ಲಿ ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ಉಲ್ಲೇಖೀಸಿದ್ದಾರೆ. ತಮ್ಮ ಟ್ವಿಟರ್‌ ಖಾತೆಯಲ್ಲೂ ಮಂಗಳೂರು ಜನತೆ ತೋರಿದ ಪ್ರೀತಿಯನ್ನು ಕೊಂಡಾಡಿದ್ದಾರೆ.

ಹೊಸದಿಲ್ಲಿಯಲ್ಲಿ ಸುದ್ದಿವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಈ ಬಗ್ಗೆ ಮಾತನಾಡಿರುವ ಪ್ರಧಾನಿ ಮೋದಿ “ಮಂಗಳೂರಿನಲ್ಲಿ ಅದು ರೋಡ್‌ ಶೋ ಆಗಿರಲಿಲ್ಲ. ಸಮಾವೇಶದಲ್ಲಿ ಪಾಲ್ಗೊಳ್ಳುವುದಕ್ಕೆ ಹೋಗುವ ಸಂದರ್ಭ ರಸ್ತೆಯಲ್ಲಿ ಸಹಸ್ರ ಸಂಖ್ಯೆಯಲ್ಲಿದ್ದ ಸಾರ್ವಜನಿಕರು ನೆರೆದಿದ್ದನ್ನು ಕಂಡು ನಿಜಕ್ಕೂ ಆಶ್ಚರ್ಯವಾಯಿತು. ಎಲ್ಲಿ ನೋಡಿದರಲ್ಲಿ ಸಾರ್ವಜನಿಕರು ಕೈಗಳನ್ನು ಮೇಲಕ್ಕೆತ್ತಿ ಸಂಭ್ರಮ ಪಡುತ್ತಿದ್ದರು. ಹೀಗಾಗಿ ಅವರಿಗೆ ಗೌರವ ನೀಡುವ ಕಾರಣಕ್ಕಾಗಿ ನಾನು ಕಾರಿನ ಬಾಗಿಲು ತೆಗೆದು ಕೈ ಬೀಸಿ ಸಂಭ್ರಮಿಸಿದೆ. ಈ ದೃಶ್ಯವನ್ನು ಸಾಮಾಜಿಕ ಜಾಲ ತಾಣದಲ್ಲಿ ಗಮನಿಸಿದಾಗ ಮಂಗಳೂರಿನ ನಾಗರಿಕರ ಆತ್ಮೀಯ ಸ್ವಾಗತ ಸ್ಪಷ್ಟವಾಗುತ್ತದೆ. ರಸ್ತೆಯ ಎರಡೂ ಕಡೆ ಸಾವಿರಾರು ಜನರು ಬರಮಾಡಿಕೊಂಡ ರೀತಿ ಅದ್ಭುತ. ಅಭೂತಪೂರ್ವವಾಗಿ ಮೂಡಿಬಂದ ಆ ಕ್ಷಣ ರೋಮಾಂಚಕ ಅನುಭವ’ ಎಂದವರು ತಿಳಿಸಿದ್ದಾರೆ.