ಕಲಬುರಗಿಯ ಸೋಂಕು ಪಾಸಿಟಿವ್ ವರದಿ ಬಂದ ಗ್ರಾಮಗಳಿಗೆ ಶಾಸಕ ಎಂ.ವೈ ಪಾಟೀಲ್ ಭೇಟಿ

ಕಲಬುರಗಿ: ಒಂದು ವರ್ಷದ ಮಗುವಿಗೆ ಕೋವಿಡ್-19 ಪಾಸಿಟಿವ್ ವರದಿ ಬಂದಿರುವ ತಾಲ್ಲೂಕಿನ ಫರತಾಬಾದ್ ವಲಯದ ಅಫಜಲಪುರ ವಿಧಾನಸಭಾ ಕ್ಷೇತ್ರದ ಕವಲಗಾ ಹಾಗೂ ಸರಡಗಿ ಗ್ರಾಮಗಳಿಗೆ ಶಾಸಕ ಎಂ.ವೈ ಪಾಟೀಲ್ ಬುಧವಾರ ಭೇಟಿ ನೀಡಿದರು.

ಮಗುವಿಗೆ ಸೋಂಕು ಹರಡಿದ್ದರ ಕುರಿತಾಗಿ ಮಾಹಿತಿ ಪಡೆದುಕೊಂಡರಲ್ಲದೇ ಸಾಮಾಜಿಕ ಅಂತರ ಕಾಪಾಡುವಂತೆ ಜನರಲ್ಲಿ ತಿಳಿ ಹೇಳಿದರು. ಮಗುವಿನ ಸಮೀಪದ ಸಂಬಂಧಿಕರೊಂದಿಗೆ ಶಾಸಕರು ಚರ್ಚಿಸಿ ಮಾಹಿತಿ ಪಡೆದರಲ್ಲದೇ ಧೈರ್ಯದಿಂದ ಇರುವಂತೆ ಹೇಳಿದರು.

ಕವಲಗಾ ಬಿ ಗ್ರಾಮದ ಮಹಿಳೆ ತನ್ನ 15 ತಿಂಗಳು ಮಗುವಿನೊಂದಿಗೆ ತವರು ಮನೆ ಸರಡಗಿ ಮನೆಗೆ ಬಂದಿದ್ದರು. ಜ್ವರ ಕಾಣಿಸಿಕೊಂಡ ನಂತರ ಆಸ್ಪತ್ರೆಗೆ ದಾಖಲಾಸಿದ್ದಾಗ ಪಾಸಿಟಿವ್ ವರದಿ ಬಂದಿದೆ. ಸರಡಗಿ ಮನೆಯಲ್ಲಿರುವ 14 ಜನರನ್ನು ಹಾಗೂ ಕವಲಗಾ 8 ಜನರನ್ನು ಪರೀಕ್ಷೆಗಾಗಿ ಇಎಸ್ಐ ಆಸ್ಪತ್ರೆಗೆ ಸೇರಿಸಲಾಗಿದೆ.

ಇಷ್ಟು ದಿನ ನಗರ ಪ್ರದೇಶದಲ್ಲೇ ಕೋವಿಡ್-19 ಪಾಸಿಟಿವ್ ಪ್ರಕರಣಗಳು ವರದಿಯಾಗಿದ್ದರೆ ಇದೇ ಮೊದಲ ಸಲ ಗ್ರಾಮೀಣದಲ್ಲಿ ವರದಿಯಾಗಿರುವುದು ಆತಂಕ ಉಂಟು ಮಾಡಿದೆ. ಹಳ್ಳಿಗಳಲ್ಲಿ ಜನರು ಶುಚಿತ್ವ ಬಗ್ಗೆ ಕಾಳಜಿ ವಹಿಸುವುದರ ಜತೆಗೆ ಒಂದೇಡೆ ಸೇರುವುದನ್ನು ತಪ್ಪಿಸಬೇಕೆಂದು ಶಾಸಕ ಎಂ.ವೈ ಪಾಟೀಲ್ ಸಲಹೆ ನೀಡಿದರು.