ಕೌಲಾಲಂಪುರ:ಕೌಲಾಲಂಪುರದಲ್ಲಿ ಭಾನುವಾರ ನಡೆದ ಮಹಿಳಾ ಏಷ್ಯಾ ಕಪ್ ಟಿ20 ಕ್ರಿಕೆಟ್ ಪಂದ್ಯಾಟದಲ್ಲಿ ಮಲೇಷ್ಯಾ ವಿರುದ್ಧ ಅಬ್ಬರಿಸಿ ಭರ್ಜರಿ ಬ್ಯಾಟಿಂಗ್(97 ರನ್) ನಡೆಸಿ ಭಾರೀ ಅಂತರದಿಂದ ಗೆಲ್ಲಿಸಿಕೊಟ್ಟ ಕೀರ್ತಿ ಮಿಥಾಲಿ ರಾಜ್ ಅವರದ್ದು. ಆದರೆ ಆಕೆಗೆ ಸಿಕ್ಕಿದ ಬಹುಮಾನದ ಮೊತ್ತ ಎಷ್ಟು ಎಂದು ಕೇಳಿದರೆ ನಿಮ್ಮ ಹುಬ್ಬೇರುವಂತೆ ಮಾಡುತ್ತೆ!
ಅದ್ಭುತ ಬ್ಯಾಟಿಂಗ್ ಮೂಲಕ ತಂಡದ ಬೃಹತ್ ಮೊತ್ತಕ್ಕೆ ಕಾರಣರಾಗಿದ್ದ ಮಿಥಾಲಿ ರಾಜ್ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೂ ಭಾಜನರಾಗಿದ್ದರು. ಆದರೆ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ಚರ್ಚೆಗೆ, ವಿವಾದಕ್ಕೀಡಾಗಿದ್ದು ಆಕೆಗೆ ಕೊಟ್ಟ ಬಹುಮಾನದ ಮೊತ್ತ!
ತಂಡವನ್ನು ಜಯಿಸಿಕೊಟ್ಟ ಮಿಥಾಲಿ ರಾಜ್ ಗೆ ಸಿಕ್ಕ ಬಹುಮಾನದ ಮೊತ್ತ 250 ಅಮೆರಿಕನ್ ಡಾಲರ್..ಅಂದರೆ ಕೇವಲ 16 ಸಾವಿರ ರೂಪಾಯಿ ಮಾತ್ರ. ಪಂದ್ಯ ಶ್ರೇಷ್ಠ ಪುರುಷ ಕ್ರಿಕೆಟಿಗರಿಗೆ 2000 ಅಮೆರಿಕನ್(ಒಂದು ಲಕ್ಷ ರೂಪಾಯಿ) ಡಾಲರ್ ಬಹುಮಾನ ಕೊಡುತ್ತಾರೆ.
ಮಿಥಾಲಿ ರಾಜ್ ಗೆ ನೀಡಿದ್ದ ಬಹುಮಾನ ಮೊತ್ತದ ಚೆಕ್ ನ ಫೋಟೋವನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಅಪ್ ಲೋಡ್ ಮಾಡಿದ ಬಳಿಕ ಕ್ರೀಡೆಯಲ್ಲಿ ಮಹಿಳಾ ಮತ್ತು ಪುರುಷ ಆಟಗಾರರಿಗೆ ನೀಡುವ ಬಹುಮಾನ ಮೊತ್ತದ ತಾರತಮ್ಯದ ಬಗ್ಗೆ ಆಕ್ರೋಶ ವ್ಯಕ್ತಪಡಿಸತೊಡಗಿದ್ದಾರೆ.
