ಕೋವಿಡ್-19 ಅಗತ್ಯ ಸೇವೆಯ ಪಾಸುಗಳ ದುರುಪಯೋಗ: ಅಸಹಾಯಕ ಸ್ಥಿತಿಯಲ್ಲಿ ಪೊಲೀಸರು

ಗಂಗಾವತಿ: ಲಾಕ್ ಡೌನ್ ವಿಧಿಸಿದಾಗಿನಿಂದ ಪ್ರತಿನಿತ್ಯ ಸರಕಾರಿ ಅರೆ ಸರಕಾರಿ ನಗರಸಭೆ ಸೇರಿ ಸ್ಥಳೀಯ ಸಂಸ್ಥೆಗಳ ಕೆಲ ಅಧಿಕಾರಿಗಳಿಗೆ ವಿತರಿಸಿರುವ ಕೋವಿಡ್-19 ಲಾಕ್ ಡೌನ್ ವಿನಾಯಿತಿ ಸಂಚಾರದ ಪಾಸ್ ಗಳ ದುರುಪಯೋಗವಾಗುತ್ತಿರುವ ಪ್ರಕರಣಗಳು ಪೊಲೀಸರಿಗೆ ತಲೆನೋವಾಗಿದೆ.

ಕಾರು ಬೈಕ್ ಗಳಿಗೆ ಪಾಸ್ ಅಂಟಿಸಿಕೊಂಡು ವೈಯಕ್ತಿಕ ಕೆಲಸಕಾರ್ಯಗಳಿಗೆ ವಿನಾಕಾರಣ ತಿರುಗಾಡುವವರು ಹೆಚ್ಚಾಗಿದ್ದಾರೆ. ಖಾಸಗಿ ವ್ಯಕ್ತಿಗಳು ತಮ್ಮ ಸಂಬಂಧಿಕರ ಹೆಸರಿನಲ್ಲಿ ಪಾಸ್ ಗಳನ್ನು ಪಡೆದು ದುರುಪಯೋಗ ಮಾಡುತ್ತಿದ್ದಾರೆ.

ವಿವಿಧ ರಾಜಕೀಯ ಪಕ್ಷಗಳ ಮುಖಂಡರು ಮಿನಿ ಮುಖಂಡರು ಕಾರ್ಯಕರ್ತರು, ಪೊಲೀಸ್ ಇಲಾಖೆ, ಅಧಿಕಾರಿಗಳು ಶಿಪಾರಸ್ಸಿನ ಪಾಸ್ ಪಡೆದು ಪೊಲೀಸರಿಗೆ ನಿರ್ಗತಿಕರಿಗೆ ಊಟ ಚಹಾ ಕೊಡುವ ನೆಪದಲ್ಲಿ ತಿರುಗುತ್ತಿದ್ದಾರೆ.

ಜಿಲ್ಲಾಡಳಿತ ಅಗತ್ಯ ಸೇವೆಗೆ ನಿಯೋಜನೆಯಾಗಿರುವ ಅಧಿಕಾರಿಗಳ ಹೊರತು ಬೇರೆಯವರಿಗೆ  ಕೊಟ್ಟಿರುವ ಪಾಸ್ ಕೂಡಲೇ ಜಪ್ತಿ ಮಾಡಿಕೊಳ್ಳಬೇಕು. ವಿನಾಕಾರಣ ಬೈಕ್ ಕಾರಿನಲ್ಲಿ ತಿರುಗುವವರ ವಿರುದ್ದ ಕೇಸ್ ದಾಖಲಿಸಬೇಕೆಂದು ಜನತೆ ಒತ್ತಾಯಿಸುತ್ತಿದ್ದಾರೆ.