Hasanambe Temple: ಇಂಥ ಹಲವು ಡಿಸಿಗಳನ್ನು ನೋಡಿದ್ದೇನೆ: ಎಚ್‌.ಡಿ.ರೇವಣ್ಣ ಕಿಡಿ

ಹಾಸನ: ಹಾಸನಾಂಬೆ ದೇಗುಲದ ಬಾಗಿಲು ತೆರೆದ 7 ದಿನಗಳ ಅನಂತರ ಮಾಜಿ ಸಚಿವ ಎಚ್‌.ಡಿ. ರೇವಣ್ಣ ಗುರುವಾರ ಪತ್ನಿಯೊಂದಿಗೆ ಆಗಮಿಸಿ ದೇವಿಯ ದರ್ಶನ ಪಡೆದರು.

ಇದೇ ವೇಳೆ ವಿಶೇಷ ಪಾಸ್‌ಗಳನ್ನು ಬೇಕಾಬಿಟ್ಟಿ ಹಂಚಲಾಗಿದೆ ಎಂದು ಹಾಸನ ಜಿಲ್ಲಾಧಿಕಾರಿ ಸತ್ಯಭಾಮಾ ವಿರುದ್ಧ ಹರಿಹಾಯ್ದರು. ಹಾರ ಹಾಕಿ ಸ್ವಾಗತಿಸಲು ಮುಂದಾದ ಎಸಿ ಮಾರುತಿ ವಿರುದ್ಧವೂ ಗರಂ ಆದರು. ಹಾರ ಹಾಕಿಸಿಕೊಳ್ಳದೆ ಕೈಯಿಂದ ಮಾರುತಿ ಅವರನ್ನು ತಳ್ಳಿದರು.

ದೇವರ ದರ್ಶನ ಬಳಿಕ ಮಾತನಾಡಿ, ವಿಶೇಷ ಪಾಸ್‌ ಅಂತ ಕೊಟ್ಟು ಶಾಸಕರ ಗೌರವವನ್ನು ಗಾಳಿಗೆ ತೂರಿದ್ದಾರೆ. ನಾವೇನಾದರೂ ಪಾಸ್‌ ಕೊಡಿ ಅಂತ ಕೇಳಿದ್ದೆವಾ, ಯಾರನ್ನು ಕೇಳಿ ಪಾಸ್‌ ಮಾಡಿಸಿದಿರಿ? ನನ್ನ ಜೀವನದಲ್ಲಿ ಇಂತಹ ಹಲವು ಜಿಲ್ಲಾಧಿಕಾರಿಗಳನ್ನು ನೋಡಿದ್ದೇನೆ. ಜಿಲ್ಲೆಯಲ್ಲಿ ಏನೇನು ನಡೆಯುತ್ತಿದೆ ಎಂಬ ಬಗ್ಗೆ ಸಮಗ್ರವಾಗಿ ಮುಖ್ಯ ಕಾರ್ಯದರ್ಶಿಗಳಿಗೆ ಪತ್ರ ಬರೆಯುತ್ತೇನೆ. ಎರಡೂವರೆ ಲಕ್ಷ ವಿಐಪಿ, ವಿವಿಐಪಿ ಪಾಸ್‌ ಹಂಚಿರುವ ಬಗ್ಗೆ ತನಿಖೆ ನಡೆಯಲಿ ಎಂದು ರೇವಣ್ಣ ಆಗ್ರಹಿಸಿದರು.