ಮಾಣಿಯಲ್ಲಿ ಅಪಘಾತವಾದ ಬಸ್‌ ನಂಬರ್‌ –ಟಿಕೆಟ್‌ ತಾಳೆಯಾಗುತ್ತಿಲ್ಲ!

ಉಪ್ಪಿನಂಗಡಿ: ಬುಧವಾರ ಮಾಣಿಯಲ್ಲಿ ಸಂಭವಿಸಿದ ಬಸ್‌ ಅಪಘಾತ ಮತ್ತು ತನ್ನ ಪತ್ನಿ ದಿವ್ಯಾ ಪ್ರಭು (40) ಸಾವಿಗೆ ಬಸ್‌ ಚಾಲಕನ ನಿರ್ಲಕ್ಷ್ಯದ ಚಾಲನೆಯೇ ಕಾರಣ ಎಂದು ಮೃತರ ಪತಿ ದೂರು ನೀಡಿದ ಬೆನ್ನಲ್ಲೇ, ಬಸ್ಸಿನ ನಂಬರ್‌ ಹಾಗೂ ಟಿಕೆಟ್‌  ತಾಳೆಯಾಗದಿರುವುದು ಕಂಡು ಬಂದಿದೆ. ನಷ್ಟ ಪರಿಹಾರ ತಪ್ಪಿಸಲು ಕೆಎಸ್‌ಆರ್‌ಟಿಸಿ ಉದ್ದೇಶ ಪೂರ್ವಕವಾಗಿಯೇ ಈ ತಂತ್ರಗಾರಿಕೆ ನಡೆಸುತ್ತಿದೆಯೇ ಎಂಬ ಪ್ರಶ್ನೆ ಉದ್ಭವಿಸಿದೆ.

ದಿವ್ಯಾ ಪ್ರಭು ಪ್ರಯಾಣಿಸಿದ ಬಸ್ಸಿನ ನಂಬ್ರ ಕೆಎ 19 ಎಫ್ 3143 ಆಗಿದ್ದು, ನೀಡಲಾದ ಟಿಕೆಟ್‌ನಲ್ಲಿ ಬಸ್ಸಿನ ಸಂಖ್ಯೆ ಕೆಎ 19 ಎಫ್ 2707 ಎಂದು ನಮೂದಾಗಿದೆ. ಪ್ರಕರಣದ ವಿಚಾರಣೆ ವೇಳೆ ಟಿಕೆಟ್‌ನಲ್ಲಿರುವ ಬಸ್ಸಿನ ಸಂಖ್ಯೆ ಪ್ರಮುಖ ದಾಖಲೆ ಆಗಿರುವುದರಿಂದ ನ್ಯಾಯಾಲಯದಲ್ಲಿ ಮೃತ ಮಹಿಳೆಯ ಪರವಾಗಿ ಸಲ್ಲಿಸುವ ದಾಖಲೆಗೂ ಅಪಘಾತಕ್ಕೀಡಾದ ಬಸ್ಸಿನ ಸಂಖ್ಯೆಗೂ ಹೊಂದಾಣಿಕೆಯಾಗದೆ ಕುಟುಂಬಕ್ಕೆ ಪರಿಹಾರ ಸಿಗಲು ತೊಂದರೆಯಾಗಲಿದೆ.

ಹಲವು ಬಸ್‌ಗಳಲ್ಲಿ ಇಂಥ ಲೋಪ
ಮಾ. 15ರಂದು ತಾನು ಮಂಗಳೂರಿನಿಂದ ಪುತ್ತೂರಿಗೆ ಕೆಎ 21 ಎಫ್ 0100 ನಂಬರಿನ ಬಸ್ಸಿನಲ್ಲಿ ಪ್ರಯಾಣಿಸಿದ್ದು, ಟಿಕೆಟ್‌ನಲ್ಲಿ ಬಸ್ಸಿನ ಸಂಖ್ಯೆ ಕೆಎ 19 ಎಫ್ 2660 ಎಂದಿತ್ತು.  ನಿರ್ವಾಹಕನನ್ನು ವಿಚಾರಿಸಿದಾಗ “ನಾವೇನು ಮಾಡೋದು ಸರ್‌, ಆಫೀಸಿನಲ್ಲಿ ನಮಗೆ ಕೊಡುವ ಮಿಷಿನ್‌ನಲ್ಲಿ ಟಿಕೆಟ್‌ ಕೊಡುವುದು ಮಾತ್ರ ನಮ್ಮ ಕೆಲಸ. ಅದರಲ್ಲಿ ಯಾವ ಬಸ್ಸಿನ ನಂಬ್ರ ಫೀಡ್‌ ಆಗಿದೆ ಎನ್ನುವುದು ನಮಗೆ ಗೊತ್ತಾಗುವುದಿಲ್ಲ’ ಎಂದು ತಿಳಿಸಿದ್ದಾರೆ ಎಂದು ಉಪ್ಪಿನಂಗಡಿ ನಿವಾಸಿ ವಿನಾಯಕ ಪ್ರಭು ಯಾನೆ ಮುನ್ನಾ ಹೇಳುತ್ತಿದ್ದಾರೆ.