ಬುಲಂದ್‌ಶಹರ್‌: ಬಾಲಕಿಯ ಮೇಲೆ 10 ಕಾಮಾಂಧರಿಂದ ಅತ್ಯಾಚಾರ

ಬುಲಂದ್‌ಶಹರ್‌ : ಹದಿನೈದು ವರ್ಷ ಪ್ರಾಯದ ಬಾಲಕಿಯನ್ನು ಹತ್ತು ಮಂದಿ ಕಾಮಾಂಧರು ಅತ್ಯಾಚಾರ ಮಾಡಿದ ಘಟನೆ ಜಹಾಂಗಿರಾಬಾದ್‌ ಪೊಲೀಸ್‌ ಠಾಣೆ ವ್ಯಾಪ್ತಿಗೆ ಒಳಪಡುವ ಚಚೇರಿ ಗ್ರಾಮದಲ್ಲಿ ನಡೆದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಬಾಲಕಿಯು ಕಳೆದ ಸೋಮವಾರ ನಿಶ್ಚಿತಾರ್ಥ ಸಮಾರಂಭಕ್ಕೆ ತನ್ನ ಮನೆಯವರೊಂದಿಗೆ ಹೋಗಿದ್ದಾಗ ಈ ಅತ್ಯಮಾನುಷ ಘಟನೆ ನಡೆಯಿತೆಂದು ಸರ್ಕಲ್‌ ಪೊಲೀಸ್‌ ಆಫೀಸರ್‌ ಜಿತೇಂದ್ರ ಸಿಂಗ್‌ ಹೇಳಿದರು. 

ಬಾಲಕಿಗೆ ಪರಿಚತರೇ ಇರುವ ಇಬ್ಬರು ಸಮೀಪದ ದೇವಸ್ಥಾನಕ್ಕೆ ಹೋಗಿ ಬರೋಣ ಎಂದು ಪುಸಲಾಯಿಸಿ ಬೈಕಿನಲ್ಲಿ ಕೂರಿಸಿ ಒಯ್ದಿದ್ದರು. ಅನಂತರ ಅವರನ್ನು ಇನ್ನೂ 8 ಮಂದಿ ಕೂಡಿಕೊಂಡರು. ಈ ಎಲ್ಲ ಹತ್ತು ಮಂದಿ ಸೇರಿ ಬಾಲಕಿಯ ಮೇಲೆ ಅತ್ಯಾಚಾರ ಎಸಗಿದರು. 

ಬಾಲಕಿಯು ಪ್ರಜ್ಞಾಹೀನ ಸ್ಥಿತಿಯಲ್ಲಿ ಹೊಲವೊಂದರಲ್ಲಿ ಬಿದ್ದುಕೊಂಡಿದ್ದುದು ಪತ್ತೆಯಾಯಿತು. ಬಾಲಕಿಯ ತಂದೆ ನೀಡಿದ ದೂರಿನ ಪ್ರಕಾರ ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ಎಲ್ಲ ಆರೋಪಿಗಳು ತಲೆಮರೆಸಿಕೊಂಡಿದ್ದು ಅವರಿಗಾಗಿ ಶೋಧ ಕಾರ್ಯ ನಡೆಯುತ್ತಿದೆ ಎಂದು ಜಿತೇಂದ್ರ ಸಿಂಗ್‌ ತಿಳಿಸಿದ್ದಾರೆ.