ವಾನ್‌ ವಿರುದ್ಧ ಹರಿಹಾಯ್ದ ಅಭಿಮಾನಿಗಳು

ಹೊಸದಿಲ್ಲಿ: ನ್ಯೂಜಿಲ್ಯಾಂಡ್‌ ವಿರುದ್ಧ ಭಾರತ 92 ರನ್‌ಗೆ ಆಲೌಟಾಗಿದ್ದೇ ತಡ, ವಿಶ್ವದ ಹಲವು ಮೂಲೆಗಳಿಂದ ಸಣ್ಣದಾಗಿ ಟೀಕೆಗಳು ಕೇಳಿಬಂದಿವೆ. ಇವರಲ್ಲಿ ಇಂಗ್ಲೆಂಡ್‌ ಕ್ರಿಕೆಟ್‌ ತಂಡದ ಮಾಜಿ ನಾಯಕ ಮೈಕಲ್‌ ವಾನ್‌. ಈಗಿನ ಕಾಲದಲ್ಲೂ ತಂಡವೊಂದು 92 ರನ್‌ಗಳಿಗೆ ಆಲೌಟಾಗುತ್ತದೆ ಎನ್ನುವುದನ್ನು ನಂಬಲಸಾಧ್ಯ ಎಂದು ಅವರು ಹೇಳಿದ್ದಾರೆ. ಅವರು ಯಾವ ಅರ್ಥದಲ್ಲಿ ಇದನ್ನು ಹೇಳಿದ್ದಾರೆನ್ನುವುದು ಖಚಿತವಿಲ್ಲ.

ಭಾರತೀಯ ಅಭಿಮಾನಿಗಳು ಮಾತ್ರ ವಾನ್‌ ಹೇಳಿಕೆಯಿಂದ ಸಿಟ್ಟಾಗಿದ್ದಾರೆ. “ಮೊನ್ನೆಯಷ್ಟೇ ವೆಸ್ಟ್‌ ಇಂಡೀಸ್‌ ವಿರುದ್ಧದ ಟೆಸ್ಟ್‌ ಪಂದ್ಯದಲ್ಲಿ ಇಂಗ್ಲೆಂಡ್‌ 77 ರನ್‌ಗಳಿಗೆ ಆಲೌಟಾಗಿದ್ದನ್ನು ಮರೆಯಬೇಡಿ’ ಎಂದು ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ.