MGM “ಅಮೃತ ಸಂಗಮ” ಜಾಹೀರಾತು ಫ‌ಲಕ ಬಿಡುಗಡೆ

ಉಡುಪಿ: ಎಂಜಿಎಂ ಕಾಲೇಜಿನ 75ರ ಸಂಭ್ರಮದ ಪ್ರಯುಕ್ತ ಕಾಲೇಜಿನ ಹಳೆವಿದ್ಯಾರ್ಥಿ ಸಂಘದ “ಅಮೃತ ಸಂಗಮ’ ಎನ್ನುವ ಪ್ರಾಕ್ತನ ವಿದ್ಯಾರ್ಥಿಗಳ ಸಮಾವೇಶವು ಸಾಂಸ್ಕೃತಿಕ, ಕ್ರೀಡೆ, ಪ್ರತಿಭಾ, ಗುರುವಂದನೆ, ನಿವೃತ್ತರಿಗೆ ಸಮ್ಮಾನ, ಸಭೆ, ಫೋಟೋ ಗ್ಯಾಲರಿ, ಸಾಂಸ್ಕೃತಿಕ ವೈಭವ ಮೊದಲಾದ ವಿನೂತನ ಕಾರ್ಯಕ್ರಮಗಳೊಂದಿಗೆ ನೆರವೇರಲಿದೆ.

ಈ ಮಾಹಿತಿಯನ್ನು ಹಳೆವಿದ್ಯಾರ್ಥಿ ಗಳು ಮತ್ತು ಸಂಸ್ಥೆಯಲ್ಲಿ ದುಡಿದು ನಿವೃತ್ತರಾದ ಶಿಕ್ಷಕರು, ಶಿಕ್ಷಕೇತರ ವರ್ಗಕ್ಕೆ ತಲುಪಿಸುವ ನಿಟ್ಟಿನಲ್ಲಿ ಜಾಹೀರಾತು ಫ‌ಲಕವನ್ನು ಕಾಲೇಜಿನ ಮಾಧವ ರಕ್ಷಾ ಆಡಳಿತ ಸೌಧದ ಆವರಣದಲ್ಲಿ ಬಿಡುಗಡೆ ಮಾಡಲಾಯಿತು.

ನಿವೃತ್ತ ಪ್ರಾಂಶುಪಾಲ, ಹಳೆ ವಿದ್ಯಾರ್ಥಿ ಸಂಘದ ಪೂರ್ವಾಧ್ಯಕ್ಷ ಪ್ರೊ| ಎಂ.ಎಲ್‌. ಸಾಮಗ, ಅಧ್ಯಕ್ಷ ಪ್ರೊ| ಕೊಕ್ಕರ್ಣೆ ಸುರೇಂದ್ರನಾಥ ಶೆಟ್ಟಿ, ಪ್ರಾಂಶುಪಾಲ ಪ್ರೊ| ಲಕ್ಷ್ಮೀ ನಾರಾಯಣ ಕಾರಂತ, ಪ.ಪೂ. ಕಾಲೇಜಿನ ಪ್ರಾಂಶುಪಾಲೆ ಮಾಲತಿದೇವಿ, ನಿವೃತ್ತ ಪ್ರಾಂಶುಪಾಲೆ ಡಾ| ಸಂಧ್ಯಾ ನಂಬಿಯಾರ್‌, ಸಂಘದ ಕಾರ್ಯದರ್ಶಿ ಡಾ| ಎಂ. ವಿಶ್ವನಾಥ ಪೈ, ವಿವಿಧ ಸಮಿತಿಗಳ ಸದಸ್ಯರಾದ ರಾಮದಾಸ ಪೈ, ರಾಘವೇಂದ್ರ ಕಿಣಿ, ಸಬಿತಾದೇವಿ, ಸುಮಿತ್ರಾ, ಪ್ರೊ| ವಿಟಲದಾಸ ಭಟ್‌, ರಾಜಾರಾಮ ರಾವ್‌, ಭುಜಂಗೇಶ್‌ ಕಾಮತ್‌, ರಮೇಶ್‌ ರಾವ್‌ ಉಪಸ್ಥಿತರಿದ್ದರು.