ಮೆಕ್ಸಿಕನ್‌ ಓಪನ್‌ ಟೆನಿಸ್‌: ಕ್ವಾರ್ಟರ್‌ ಫೈನಲಿಗೆ ಡೊಮಿನಿಕ್‌ ಥೀಮ್

ಅಕಪುಲ್ಕೊ (ಮೆಕ್ಸಿಕೊ): ಆಸ್ಟ್ರಿಯಾದ ಡೊಮಿನಿಕ್‌ ಥೀಮ್‌ “ಮೆಕ್ಸಿಕನ್‌ ಓಪನ್‌’ ಟೆನಿಸ್‌ ಪಂದ್ಯಾವಳಿಯ ಕ್ವಾರ್ಟರ್‌ ಫೈನಲ್‌ ತಲುಪಿದ್ದಾರೆ. ಬುಧವಾರ ರಾತ್ರಿಯ ಪಂದ್ಯದಲ್ಲಿ ಅವರು ಕೆನಡಾದ 18ರ ಹರೆಯದ ಉದಯೋನ್ಮುಖ ಆಟಗಾರ ಡೆನ್ನಿಸ್‌ ಶಪೊವಲೋವ್‌ ಅವರನ್ನು 6-2, 6-3 ಅಂತರದಿಂದ ಮಣಿಸಿದರು.

2016ರ ಚಾಂಪಿಯನ್‌ ಥೀಮ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ ಆರ್ಜೆಂಟೀನಾದ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ ವಿರುದ್ಧ ಸೆಣಸಲಿದ್ದಾರೆ. ಡೆಲ್‌ ಪೊಟ್ರೊ ಸ್ಪೇನಿನ ಡೇವಿಡ್‌ ಫೆರರ್‌ ಅವರನ್ನು 6-4, 4-6, 6-3ರಿಂದ ಕೆಡವಿದರು.

ಜರ್ಮನಿಯ ದ್ವಿತೀಯ ಶ್ರೇಯಾಂಕದ ಆಟಗಾರ ಅಲೆಕ್ಸಾಂಡರ್‌ ಜ್ವೆರೇವ್‌ ತಮ್ಮದೇ ನಾಡಿನ ಪೀಟರ್‌ ಗೊಜೋವಿಕ್‌ ವಿರುದ್ಧ 7-6 (8-6), 6-3 ಅಂತರದ ಜಯ ಸಾಧಿಸುವಲ್ಲಿ ಯಶಸ್ವಿಯಾದರು. ದಕ್ಷಿಣ ಕೊರಿಯಾದ ಚುಂಗ್‌ ಹಿಯಾನ್‌ 6-3, 6-1ರಿಂದ ಅಮೆರಿಕದ ಎರ್ನೆಸ್ಟೊ ಎಸ್ಕೊಬೆಡೊ ವಿರುದ್ಧ ಗೆಲುವು ಒಲಿಸಿಕೊಂಡರು. ಇದು ಪ್ರಸಕ್ತ ಟೆನಿಸ್‌ ಋತುವಿನಲ್ಲಿ ಚುಂಗ್‌ ಕಾಣುತ್ತಿರುವ 4ನೇ ಕ್ವಾರ್ಟರ್‌ ಫೈನಲ್‌. ಇಲ್ಲಿ ಅವರು ದಕ್ಷಿಣ ಆಫ್ರಿಕಾದ ಕೆವಿನ್‌ ಆ್ಯಂಡರ್ಸನ್‌ ವಿರುದ್ಧ ಆಡಲಿದ್ದಾರೆ. ಆ್ಯಂಡರ್ಸನ್‌ ಫ್ರಾನ್ಸ್‌ನ ಅಡ್ರಿಯಾನ್‌ ಮನ್ನಾರಿನೊ ವಿರುದ್ಧ 6-3, 6-4 ಅಂತರದ ಗೆಲುವು ಕಂಡರು.