ಮತ್ಸ್ಯಗಂಧ ರೈಲಿನಲ್ಲಿ ಅಗ್ನಿ ಅವಘಡ

ಬೆಳ್ತಂಗಡಿ: ಮುಂಬಯಿಯಿಂದ ಮಂಗಳೂರಿಗೆ ಆಗಮಿಸುತ್ತಿದ್ದ ಮತ್ಸ್ಯಗಂಧ ಎಕ್ಸ್‌ಪ್ರೆಸ್‌ ರೈಲಿನ ಇಂಜಿನ್‌ ಸಮೀಪ ಮಂಗಳವಾರ ತಡ ರಾತ್ರಿ 2 ಗಂಟೆಗೆ ಬೆಂಕಿ ಅವಘಡ ಉಂಟಾದ ಘಟನೆ ಗೋವಾ-ಕರ್ನಾಟಕ ಗಡಿಭಾಗದ ಕಾನಕೋನ ಸಮೀಪ ನಡೆದಿದೆ.

ಮುಂಬಯಿಯಿಂದ ಮಡಗಾವ್‌ ರೈಲ್ವೇ ನಿಲ್ದಾಣಕ್ಕೆ ರಾತ್ರಿ 1.45ಕ್ಕೆ ಆಗಮಿಸಿದ ಮತ್ಸ್ಯಗಂಧ ಎಕ್ಸ್‌ಪ್ರೆಸ್‌ ರೈಲು ಬಳಿಕ ಸ್ವಲ್ಪ ದೂರ ಚಲಿಸುತ್ತಿದ್ದಂತೆ ರೈಲಿನ ಚಕ್ರ ಸುತ್ತ ಬೆಂಕಿ ಆವರಿಸಿತ್ತು. ಇದಕ್ಕೂ ಮೊದಲು ಕಾಣಿಸಿದ ದಟ್ಟ ಹೊಗೆಯಿಂದ ಪ್ರಯಾಣಿಕರು ಆತಂಕಕ್ಕೀಡಾಗಿದ್ದರು. ಟ್ರ್ಯಾಕ್‌ವೆುನ್‌ ತುರ್ತಾಗಿ ನಿಲುಗಡೆಗೆ ಸೂಚನೆ ನೀಡಿದ್ದ ಹಿನ್ನೆಲೆಯಲ್ಲಿ ರೈಲು ನಿಲುಗಡೆಯಾಯಿತು.

ಹಠಾತ್ತಾಗಿ ಬೆಂಕಿ ಹತ್ತಿಕೊಂಡ ಪರಿಣಾಮ ಸ್ವಲ್ಪ ಹೊತ್ತು ರೈಲು ಸಂಚಾರ ಸ್ಥಗಿತಗೊಂಡಿತ್ತು. ಬೆಂಕಿ ಜೋರಾಗಿ ಉರಿಯುತ್ತಿದ್ದರೂ ನಂದಿಸಲು ಯಾವುದೇ ಉಪಕರಣಗಳು ಇರದೆ ಜನ ಗಲಿಬಿಲಿಗೊಂಡಿದ್ದರು. ಬೆಂಕಿ ಕಾಣಿಸಿಕೊಂಡ ಸಮೀಪವೇ ಬೃಹತ್‌ ಗಾತ್ರದ ತೈಲ ತುಂಬಿದ ಟ್ಯಾಂಕ್‌ ಇದ್ದುದರಿಂದ ಆತಂಕ ಹೆಚ್ಚಾಗಿತ್ತು.

ನಿರುಪಯುಕ್ತ ಉಪಕರಣ
ಬೆಂಕಿ ನಂದಿಸಲು ರೈಲ್ವೇ ಸಿಬಂದಿ ತುರ್ತು ಅಗ್ನಿ ನಂದಿಸುವ ಉಪಕರಣ ಪ್ರಯೋಗಿಸಲು ಮುಂದಾದರು. ಆದರೆ ಅದನ್ನು ಬಳಸುವುದು ಸಿಬಂದಿಗೆ ತಿಳಿದಿರಲಿಲ್ಲ. ಬಳಿಕ ಪ್ರಯಾಣಿಕರೋರ್ವರ ಸಮಯ ಪ್ರಜ್ಞೆಯಿಂದ ಬೆಂಕಿ ನಂದಿಸಲಾಯಿತು.

30 ನಿಮಿಷದ ಬಳಿಕ ಪ್ರಯಾಣ ಆರಂಭಿಸಿದ ಅನಂತರ 25 ಕಿ.ಮೀ. ದೂರದ ಕಾನಕೋನ ನಿಲ್ದಾಣದಲ್ಲಿ ತಾಂತ್ರಿಕ ತಂಡದಿಂದ ಪರಿಶೀಲನೆ ನಡೆಸಿ ದುರಸ್ತಿಪಡಿಸಲಾಯಿತು.

ಮರುಕಳಿಸಿದ ಅಗ್ನಿ ಅವಘಡ
ಶನಿವಾರವಷ್ಟೇ ಕೇರಳದತ್ತ ಪ್ರಯಾಣಿಸುತ್ತಿದ್ದ ಮಂಗಳಾ -ಲಕ್ಷದ್ವೀಪ ಎಕ್ಸ್‌ಪ್ರೆಸ್‌ ರೈಲಿನ ಎ.ಸಿ. ಬೋಗಿಯಲ್ಲಿ ಬೆಂಕಿ ಕಾಣಿಸಿಕೊಂಡಿತ್ತು. ಆದರೂ ರೈಲ್ವೇ ಇಲಾಖೆ ಅವಧಿ ಮುಗಿದ ಅಗ್ನಿಶಮನ ಸಾಧನಗಳು, ಬೆಂಕಿ ನಂದಿಸಲು ಬಳಸುವ
ಪರಿಕರಗಳ ಕುರಿತು ಮುನ್ನೆಚ್ಚರಿಕೆ ವಹಿಸಿದಂತಿಲ್ಲ.