ಆತ್ಮ ವದಂತಿಯ ಸವಾರಿ

ಹೊಸದಿಲ್ಲಿ: ದೆಹಲಿಯ ಬುರಾರಿಯಲ್ಲಿ ನಡೆದ ಒಂದೇ ಕುಟುಂಬದ 11 ಮಂದಿಯ ಆತ್ಮಹತ್ಯೆ ಪ್ರಕರಣ ಹಲವು ರೋಚಕ ತಿರುವು ಗಳನ್ನು ಪಡೆದುಕೊಂಡ ಬೆನ್ನಲ್ಲೇ, ಇದೀಗ ಆ ಮನೆಯ ಸುತ್ತಮುತ್ತ ಅವರ ಆತ್ಮಗಳು ಸಂಚರಿಸುತ್ತಿವೆ ಎಂಬ ವದಂತಿಗಳು ಕೇಳಿಬರ ತೊಡಗಿವೆ. ಇದು ಬುರಾರಿಯ ನಿವಾಸಿಗಳಲ್ಲಿ ತೀವ್ರ ಆತಂಕ ಸೃಷ್ಟಿ ಮಾಡಿದ್ದು, ಹೆಣ್ಣು ಮಕ್ಕಳಂತೂ ಮನೆಯಿಂದ ಹೋರ ಬರಲು ಹೆದರುತ್ತಿರುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ದಿನೇ ದಿನೆ 11 ಮಂದಿಯ ಆತ್ಮ ಇಲ್ಲೇ ಸುತ್ತುತ್ತಿವೆ ಎಂಬ ಸುಳ್ಳು ಸುದ್ದಿಗಳು, ಆತ್ಮಹತ್ಯೆ ಕುರಿತ ವದಂತಿಗಳು ಹೆಚ್ಚುತ್ತಿದ್ದು, ಸುತ್ತಮುತ್ತಲಿನ ಪ್ರದೇಶದಲ್ಲಿ ಅನೇಕ ಮಂದಿ ಮನೆ ಖಾಲಿ ಮಾಡಿಕೊಂಡು ಹೋಗುತ್ತಿದ್ದಾರೆ, ಬಾಡಿಗೆಗೂ ಯಾರೂ ಬರುತ್ತಿಲ್ಲ, ಕಟ್ಟಡ, ಅಪಾರ್ಟ್‌ಮೆಂಟ್‌ಗಳನ್ನು ಕೊಳ್ಳಲು ಯಾರೂ ಮುಂದೆ ಬರುತ್ತಿಲ್ಲ ಎಂದು ಸ್ಥಳೀಯರು ಆತಂಕ ವ್ಯಕ್ತಪಡಿಸಿದ್ದಾರೆ.

ಆಟೋದವರೂ ಬರಲ್ಲ: ಸದಾ ಗಿಜಿಗುಡುತ್ತಿದ್ದ ಬುರಾರಿಯಲ್ಲೀಗ ಸ್ಮಶಾನ ಮೌನ, ಕ್ಷಣ ಕ್ಷಣವೂ ಭಯ ಆವರಿಸಿದೆ. ಆಟೋ, ಟ್ಯಾಕ್ಸಿಗಳೂ ಬುರಾರಿ ಎಂದ ಕೂಡಲೇ ಅಲ್ಲಿಗೆ ಬರಲು ಹಿಂದೇಟು ಹಾಕುತ್ತಿದ್ದಾರೆ. ಈ ಬೆಳವಣಿಗೆಗಳಿಂದ ಹೆದರಿ ಅನೇಕ ಮನೆಯವರು “ಶುದ್ಧೀಕರಣ ಕ್ರಿಯೆ,’ ಪೂಜೆ, ಹವನಗಳನ್ನು ನಡೆಸುತ್ತಿದ್ದಾರೆ ಎಂದು ಸ್ಥಳೀಯ ಪ್ರಾಪರ್ಟಿ ಡೀಲರ್‌ ಪವನ್‌ ಕುಮಾರ್‌ ತ್ಯಾಗಿ ಹೇಳಿದ್ದಾರೆ. ಇದೇ ವೇಳೆ, ಕೆಲವು ರಿಯಲ್‌ ಎಸ್ಟೇಟ್‌ ಕುಳಗಳು ಇಂಥ ವದಂತಿ ಹಬ್ಬಿಸುತ್ತಿದ್ದು, ಆಸ್ತಿಗಳ ದರ ಕಡಿಮೆಯಾದರೆ, ಅದನ್ನು ತಾವೇ ಖರೀದಿಸಿ ಮಾರುವುದು ಅವರ ಉದ್ದೇಶ ಎಂದೂ ಕೆಲವರು ಅಭಿಪ್ರಾಯಪಟ್ಟಿದ್ದಾರೆ.