ಮಸೂದ್‌ ಅಜರ್‌ ಒಬ್ಬ ಕೆಟ್ಟ ಮನುಷ್ಯ: ಚೀನಕ್ಕೆ ಅಮೆರಿಕ

ವಾಷಿಂಗ್ಟನ್‌ : ಪಾಕಿಸ್ಥಾನದಲ್ಲಿ ನೆಲೆಗೊಂಡಿರುವ ಜೈಶ್‌ ಎ ಮೊಹಮ್ಮದ್‌ ಮುಖ್ಯಸ್ಥ ಮಸೂದ್‌ ಅಜರ್‌ ಒಬ್ಬ ಕೆಟ್ಟ ಮನುಷ್ಯ; ಆತನನ್ನು ಅಂತಾರಾಷ್ಟ್ರೀಯ ಭಯೋತ್ಪಾದಕನೆಂದು ಘೋಷಿಸಬೇಕು ಎಂದು ಅಮೆರಿಕ ಚೀನಕ್ಕೆ ಹೇಳಿದೆ.

ಮುಂಬಯಿ ದಾಳಿ ಹಾಗೂ ಪಠಾಣ್‌ ಕೋರ್ಟ್‌ ದಾಳಿಯ ಮಾಸ್ಟರ್‌ ಮೈಂಡ್‌ ಆಗಿರುವ ಮಸೂದ್‌ ಅಜರ್‌ ನನ್ನು ಅಂತಾರಾಷ್ಟ್ರೀಯ ಭಯೋತ್ಪಾದಕನೆಂದು ಘೋಷಿಸುವ ಪ್ರಸ್ತಾವಕ್ಕೆ ಚೀನ ವಿಶ್ವಸಂಸ್ಥೆಯಲ್ಲಿ ನಾಲ್ಕನೇ ಬಾರಿಗೆ ಅಡ್ಡಗಾಲು ಹಾಕಿರುವುದಕ್ಕೆ ಪ್ರತಿಕ್ರಿಯೆ ಎಂಬಂತೆ ಅಮೆರಿಕ ಈ ನಿಷ್ಠುರ ಮಾತುಗಳನ್ನು ಆಡಿದೆ.

ಅಮೆರಿಕ, ಫ್ರಾನ್ಸ್‌ ಮತ್ತು ಬ್ರಿಟನ್‌ ಬೆಂಬಲಿತ ಪ್ರಸ್ತಾವಕ್ಕೆ ಚೀನ ವಿಶ್ವಸಂಸ್ಥೆಯಲ್ಲಿ ಕಳೆದ ವಾರ ನಾಲ್ಕನೇ ಬಾರಿಗೆ ಅಡ್ಡಗಾಲು ಹಾಕಿದಾಗ ಅಲ್‌ ಕಾಯಿದಾ ನಿಷೇಧ ಮಂಡಳಿ ಮತ್ತು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ಮಸೂದ್‌ ಅಜರ್‌ನನ್ನು ಜಾಗತಿಕ ಭಯೋತ್ಪಾದಕನೆಂದು ಘೋಷಿಸುವುದಕ್ಕೆ ಒಮ್ಮತದ ಕೊರತೆ ಇದೆ ಎಂಬ ಕಾರಣ ನೀಡಿತ್ತು. 

ಉಗ್ರ ಮಸೂದ್‌ ಅಜರ್‌ ಸ್ಥಾಪಿಸಿರುವ ಜೈಶ್‌ ಎ ಮೊಹಮ್ಮದ್‌ ಸಂಘಟನೆಯನ್ನು ವಿಶ್ವಸಂಸ್ಥೆಯ ನಿಷೇಧಿತ ಉಗ್ರ ಪಟ್ಟಿಯಲ್ಲಿ ಈಗಾಗಲೇ ಸೇರಿಸಲಾಗಿದೆ.