ಅಶೋಕ ಹೋಟೆಲ್‌ನಲ್ಲಿದ್ದ ಮಸೂದ್‌!

ಹೊಸದಿಲ್ಲಿ: ಜೈಶ್‌ ಎ ಮೊಹಮ್ಮದ್‌ ಉಗ್ರ ಮಸೂದ್‌ ಅಜರ್‌ ಭಾರತದ ಅಧಿಕಾರಿಗಳಿಗೆ ಸಿಕ್ಕಿ ಬೀಳುವುದಕ್ಕಿಂತ ಮೊದಲು ಅಂದರೆ, 1994ರಲ್ಲಿ ಮೊದಲ ಬಾರಿಗೆ ದಿಲ್ಲಿಗೆ ಆಗಮಿಸಿದ್ದಾಗ ಅಲ್ಲಿನ ಚಾಣಕ್ಯಪುರಿಯಲ್ಲಿನ ಅಶೋಕ ಹೋಟೆಲ್‌ನಲ್ಲಿ ತಂಗಿದ್ದ. ಈತ ತಾನು ಗುಜರಾತಿ ಮೂಲದವನು ಎಂದು ಹೇಳಿಕೊಂಡು, ಪೋರ್ಚುಗೀಸ್‌ ಪಾಸ್‌ಪೋರ್ಟ್‌ ಬಳಸಿ ಭಾರತಕ್ಕೆ ಬಂದಿದ್ದ. ಭಾರತಕ್ಕೆ ಬಂದ ಎರಡೇ ವಾರಗಳಲ್ಲಿ ಜಮ್ಮು ಕಾಶ್ಮೀರದಲ್ಲಿ  ಈತನನ್ನು ಬಂಧಿಸಲಾಗಿತ್ತು. ಈತ ದಿಲ್ಲಿಯ ಜನ್‌ಪಥ್‌ ಹೋಟೆಲ್‌ನಲ್ಲೂ ವಾಸಿಸಿದ್ದ. ಅಲ್ಲದೆ ಲಖನೌ, ಸಹರಾನ್‌ಪುರಕ್ಕೆ ಭೇಟಿ ನೀಡಿದ್ದ ಎಂದು ತಿಳಿದುಬಂದಿದೆ.

ಬಾಂಗ್ಲಾದೇಶದಿಂದ ಬಾಂಗ್ಲಾದೇಶ ಏರ್‌ಲೈನ್ಸ್‌ನಲ್ಲಿ ದಿಲ್ಲಿಗೆ ಆಗಮಿಸಿದ್ದೆ ಎಂದು ವಿಚಾರಣೆಯ ವೇಳೆ ಮಸೂದ್‌ ಅಜರ್‌ ಹೇಳಿಕೊಂಡಿದ್ದ. ಅಶೋಕ ಹೋಟೆಲ್‌ನಲ್ಲೇ ಹರ್ಕತ್‌ ಉಲ್‌ ಅನ್ಸರ್‌ನ ಉಗ್ರ ಅಬು ಮೆಹಮೂದ್‌ನನ್ನು ಭೇಟಿ ಮಾಡಿದ್ದ . ಅಲ್ಲದೆ ಆತನೊಂದಿಗೆ ದಾರುಲ್‌ ಉಲೂಮ್‌ ದಿಯೋಬಂದ್‌ಗೆ ಭೇಟಿ ನೀಡಿದ್ದ. ಅಲ್ಲಿಂದ ಆತ ಸಹರಾನ್‌ಪುರಕ್ಕೆ ತೆರಳಿ ಮಸೀದಿಯಲ್ಲಿ ಉಳಿದುಕೊಂಡಿದ್ದ. ಆದರೆ ಅಲ್ಲೆಲ್ಲೂ ಆತ ತನ್ನ ಮೂಲ ಗುರುತನ್ನು ಹೇಳಿಕೊಂಡಿರಲಿಲ್ಲ.