ಮಾರಿಪಳ್ಳ: ಕಂಟೈನರ್‌ ಲಾರಿ –ಪಿಕಪ್‌ ಢಿಕ್ಕಿ; ಓರ್ವನಿಗೆ ಗಾಯ

ಬಂಟ್ವಾಳ: ಮಂಗಳೂರು – ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿಯ ಮಾರಿಪಳ್ಳ ಕಡೆಗೋಳಿಯಲ್ಲಿ ಸೋಮವಾರ ತ್ಯಾಜ್ಯ ಸಾಗಾಟದ ಪಿಕಪ್‌ ಮತ್ತು ಕಂಟೈನರ್‌ ಲಾರಿ ಢಿಕ್ಕಿ ಹೊಡೆದಿದೆ. ಪರಿಣಾಮ ಕಂಟೈನರ್‌ ಚಾಲಕ ವಾಮಂಜೂರು ನಿವಾಸಿ ಶಿವಾನಂದ ಗಾಯಗೊಂಡಿದ್ದು, ಅವರನ್ನು ತುಂಬೆಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಮಂಗಳೂರಿನಿಂದ ಬಿ.ಸಿ. ರೋಡ್‌ ಕಡೆಗೆ ತೆರಳುತ್ತಿದ್ದ ಕಂಟೈನರ್‌ ಲಾರಿಯು ಮಾರಿಪಳ್ಳ ಸಮೀಪದ ಕಡೆಗೋಳಿಯಲ್ಲಿ ನಿಯಂತ್ರಣ ತಪ್ಪಿ ರಸ್ತೆಯ ವಿಭಾಜಕಕ್ಕೇರಿ ವಿರುದ್ಧ ದಿಕ್ಕಿನ ರಸ್ತೆಯಲ್ಲಿ ಮಂಗಳೂರು ಕಡೆಗೆ ತೆರಳುತ್ತಿದ್ದ ತ್ಯಾಜ್ಯ ಸಾಗಾಟದ ಪಿಕಪ್‌ಗೆ ಢಿಕ್ಕಿಯಾಗಿ, ಚರಂಡಿಗೆ ಜಾರಿದೆ.

ಢಿಕ್ಕಿಯ ರಭಸಕ್ಕೆ ಪಿಕಪ್‌ ವಾಹನದ ಡಿಸ್ಕ್ ತುಂಡಾಗಿ ತ್ಯಾಜ್ಯ ರಸ್ತೆಗೆ ಬಿದ್ದಿದೆ. ಚಾಲಕ ಅಪಾಯದಿಂದ ಪಾರಾಗಿದ್ದಾರೆ. ಕಂಟೈನರ್‌ ಲಾರಿಯ ಮುಂಭಾಗ ಜಖಂಗೊಂಡಿದೆ. ಸ್ಥಳಕ್ಕೆ ಸಂಚಾರ ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿದ್ದಾರೆ. ಸ್ವಲ್ಪ ಹೊತ್ತು ಸಂಚಾರ ವ್ಯತ್ಯಯವಾಗಿತ್ತು.