ಮಿಯಾಮಿ ಓಪನ್‌ ಟೆನಿಸ್‌ಗೆ ಶರಪೋವಾ ಇಲ್ಲ

ಮಾಸ್ಕೊ: ಪ್ರಸಕ್ತ ಋತುವಿನ ಆರಂಭದಿಂದಲೂ ಗಾಯದ ಸಮಸ್ಯೆ ಎದುರಿಸುತ್ತಿರುವ ರಶ್ಯದ ಸ್ಟಾರ್‌ ಆಟಗಾರ್ತಿ ಮರಿಯಾ ಶರಪೋವಾ ಅವರಿಗೆ ಮತ್ತೆ ಸಮಸ್ಯೆ ಎದುರಾಗಿದೆ. ತೋಳಿನ ಸ್ನಾಯು ಸೆಳೆತದಿಂದ ಮಿಯಾಮಿ ಓಪನ್‌ನಿಂದಲೂ ದೂರ ಸರಿದಿದ್ದಾರೆ.

ಒಟ್ಟು 5 ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿ ಜಯಿಸಿರುವ ಮಾಜಿ ನಂ. 1 ಆಟಗಾರ್ತಿ ಶರಪೋವಾ ಕಳೆದ ವರ್ಷ ಉದ್ದೀಪನ ಸೇವನೆ ಆರೋಪದಡಿಯಲ್ಲಿ ನಿಷೇಧಕೊಳಗಾಗಿದ್ದರು. ಅನಂತರ ಮರಳಿ ಪಾರ್ಮ್ಗೆ ಬರುವ ಅವರ ಪ್ರಯತ್ನವೆಲ್ಲ ವಿಫ‌ಲವಾಗಿತ್ತು. ಕಳೆದ ವಾರ ಇಂಡಿಯನ್‌ವೆಲ್ಸ್‌ ಟೂರ್ನಿಯ ಮೊದಲ ಸುತ್ತಿನಲ್ಲೇ ಸೋತು ಹೊರನಡೆದಿದ್ದರು.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಶರಪೋವಾ, “ಎಡ ತೋಳಿನ ಗಾಯದಿಂದಾಗಿ ನಾನು ನೆಚ್ಚಿನ ಮಿಯಾಮಿ ಓಪನ್‌ ಟೂರ್ನಮೆಂಟ್‌ನಿಂದ ಹಿಂದೆ ಸರಿಯುತ್ತಿದ್ದೇನೆ. ಇದಕ್ಕಾಗಿ ಕ್ಷಮಿಸಿ. ಸ್ಫರ್ಧಾ ಕಣಕ್ಕಿಳಿಯಲು ಏನೆಲ್ಲ ಬೇಕೋ ಅವನ್ನೆಲ್ಲ ಆದಷ್ಟು ಶೀಘ್ರ ಪ್ರಯತ್ನಿಸಿ, ಸುಧಾರಿಸಕೊಂಡು ಮತ್ತೆ ಪಾಲ್ಗೊಳ್ಳುತ್ತೇನೆ’ ಎಂದಿದ್ದಾರೆ.

ಶರಪೋವಾ ಬದಲು ಮಿಯಾಮಿ ಟೂರ್ನಿಯಲ್ಲಿ ಅಮೆರಿಕದ ಜೆನಿಫ‌ರ್‌ ಬ್ರ್ಯಾಡಿ ಆಡಲಿದ್ದಾರೆ. ಈ ಕೂಟ ಮಾ. 21ರಿಂದ ಎ. ಒಂದರ ವರೆಗೆ ನಡೆಯಲಿದೆ.