ಯುಎಸ್‌ ಓಪನ್‌: ಶರಪೋವಾಗೆ ವೈಲ್ಡ್‌ಕಾರ್ಡ್‌

ನ್ಯೂಯಾರ್ಕ್‌: ಮಾಜಿ ನಂ. ವನ್‌ ರಶ್ಯದ ಮರಿಯಾ ಶರಪೋವಾ ಅವರಿಗೆ ಮುಂಬರುವ ಯುಎಸ್‌ ಓಪನ್‌ ಗ್ರ್ಯಾನ್‌ ಸ್ಲಾಮ್‌ ಟೆನಿಸ್‌ ಕೂಟದ ಮುಖ್ಯ ಡ್ರಾಕ್ಕೆ ವೈಲ್ಡ್‌ ಕಾರ್ಡ್‌ ನೀಡಲಾಗಿದೆ ಎಂದು ಕೂಟದ ಸಂಘಟಕರು ದೃಢಪಡಿಸಿದ್ದಾರೆ. ಹಾಗಾಗಿ ಅವರು 18 ತಿಂಗಳ ಬಳಿಕ ತನ್ನ ಮೊದಲ ಗ್ರ್ಯಾನ್‌ ಸ್ಲಾಮ್‌ ಕೂಟದಲ್ಲಿ ಆಡಲಿದ್ದಾರೆ.

ನಿಷೇಧಿತ ದ್ರವ್ಯ ಸೇವಿಸಿದ ಕಾರಣಕ್ಕೆ 15 ತಿಂಗಳ ನಿಷೇಧಕ್ಕೆ ಒಳಗಾಗಿದ್ದ 30ರ ಹರೆಯದ ಶರಪೋವಾ ಈ ವರ್ಷದ ಆರಂಭದಲ್ಲಿ ಟೆನಿಸ್‌ ಕಣಕ್ಕೆ ಮರಳಿದ್ದರು. ಆದರೆ ಅವರಿಗೆ ಫ್ರೆಂಚ್‌ ಓಪನ್‌ನಲ್ಲಿ ವೈಲ್ಡ್‌ಕಾರ್ಡ್‌ ನೀಡಿರಲಿಲ್ಲ. ತೊಡೆಗೆ ಆದ ಗಾಯದಿಂದಾಗಿ ಅವರು ವಿಂಬಲ್ಡನ್‌ ಸಹಿತ ಕೆಲವು ಹುಲ್ಲುಹಾಸಿನ ಟೆನಿಸ್‌ ಕೂಟಗಳನ್ನು ಕಳೆದುಕೊಂಡಿದ್ದರು.