ಕೋವಿಡ್ ಲಾಕ್ ಡೌನ್ ತೆರವಾದ ಬಳಿಕ ಚಿತ್ರರಂಗ ಇದೀಗ ನಿಧಾನವಾಗಿ ರಂಗೇರುತ್ತಿದೆ. ಸ್ಯಾಂಡಲ್ ವುಡ್ ನಲ್ಲಿ ಬಿಡುಗಡೆಯಾದ ಸ್ಟಾರ್ ಚಿತ್ರಗಳಾದ ಸಲಗ, ಕೋಟಿಗೊಬ್ಬ 3, ಭಜರಂಗಿ 2 ಪ್ರೇಕ್ಷಕರನ್ನು ಮತ್ತೆ ಚಿತ್ರಮಂದಿರದತ್ತ ಕರೆದುಕೊಂಡು ಬರುವಲ್ಲಿ ಸಫಲವಾಗಿದೆ. ಈ ವಾರ ತೆರೆಕಂಡ ಪ್ರೇಮಂ ಪೂಜ್ಯಂ ಚಿತ್ರ ಕೂಡಾ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ.
ಡಿಸೆಂಬರ್ ತಿಂಗಳಿನಲ್ಲಿ ಹಲವಾರು ಚಿತ್ರಗಳು ಬೆಳ್ಳಿಪರದೆಗೆ ಅಪ್ಪಳಿಸಲು ಕಾಯುತ್ತಿದೆ. ಸಿನಿ ಪ್ರಿಯರಿಗಂತೂ ಡಿಸೆಂಬರ್ ನಲ್ಲಿ ಹಬ್ಬವೇ ಸರಿ. ಸ್ಯಾಂಡಲ್ ವುಡ್, ಟಾಲಿವುಡ್, ಬಾಲಿವುಡ್ ಸೇರಿ ಹಲವು ಭಾಷೆಯ ದೊಡ್ಡ ಚಿತ್ರಗಳು ಡಿಸೆಂಬರ್ ನಲ್ಲಿ ಬಿಡುಗಡೆಯಾಗುತ್ತಿದೆ.
ಇದನ್ನೂ ಓದಿ:‘ಟಾಮ್‌ ಅಂಡ್‌ ಜೆರ್ರಿ’ ಚಿತ್ರ ವಿಮರ್ಶೆ: ಆಟದ ನಡುವೆ ಜೀವನ ಪಾಠ
ರೋರಿಂಗ್ ಸ್ಟಾರ್ ಶ್ರೀಮುರಳಿ ಅಭಿನಯದ ‘ಮದಗಜ’ ಚಿತ್ರ ಡಿ.3ರಂದು ಬಿಡುಗಡೆಯಾಗುತ್ತಿದೆ. ಸಿಂಪಲ್ ಸುನಿ ನಿರ್ದೇಶನದ, ಶರಣ್ ಅಭಿನಯದ ‘ಅವತಾರ್ ಪುರುಷ’ ಚಿತ್ರ ಡಿ.10ರಂದು ರಿಲೀಸ್ ಆಗುತ್ತಿದೆ. ಡಿ.24ರಂದು ಡಾಲಿ ಧನಂಜಯ್ ರ ‘ಬಡವ ರಾಸ್ಕಲ್’ ಚಿತ್ರ ಮತ್ತು ಡಿ.31ರಂದು ರಕ್ಷಿತ್ ಶೆಟ್ಟಿ ಅವರ ‘ಚಾರ್ಲಿ 777’ ಚಿತ್ರ ತೆರೆಗೆ ಬರುತ್ತಿದೆ.
ಬಾಲಿವುಡ್ ನಲ್ಲೂ ಹಲವು ಚಿತ್ರಗಳು ಬಿಡುಗಡೆಗೆ ಸಾಲುಕಟ್ಟಿ ನಿಂತಿದೆ. ಪ್ರಮುಖವಾಗಿ ಆಯುಷ್ಮಾನ್ ಖುರಾನಾ ನಟಿಸಿರುವ ‘ಚಂಡೀಗಡ್ ಕರೆ ಆಶಿಕಿ’ ಚಿತ್ರ ಡಿ.10 ರಂದು ತೆರೆಗೆ ಬರುತ್ತಿದ್ದರೆ, ರಣವೀರ್ ಸಿಂಗ್ ಅವರ’83’ ಚಿತ್ರ ಡಿ.24ರಂದು ತೆರೆ ಕಾಣುತ್ತಿದೆ. ಶಹೀದ್ ಕಪೂರ್ ಅಭಿನಯದ ‘ಜೆರ್ಸಿ’ ಚಿತ್ರ ಡಿ.31ರಂದು ಬಿಡುಗಡೆಯಾಗಲಿದೆ.
