ಮನ್‌ಪ್ರೀತ್‌, ರಾಣಿ ವರ್ಷದ ಹಾಕಿ ಆಟಗಾರರು

ಹೊಸದಿಲ್ಲಿ: ಭಾರತದ ರಾಷ್ಟ್ರೀಯ ಹಾಕಿ ತಂಡಗಳ ನಾಯಕರಾದ ಮನ್‌ಪ್ರೀತ್‌ ಸಿಂಗ್‌ ಮತ್ತು ರಾಣಿ ರಾಮ್‌ಪಾಲ್‌ ಅವರು 2019ರ “ಧ್ರುವ ಬಾತ್ರಾ ವರ್ಷದ ಆಟಗಾರ’ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ರವಿವಾರ ನಡೆದ 3ನೇ ಹಾಕಿ ಇಂಡಿಯಾ ವಾರ್ಷಿಕ ಪ್ರಶಸ್ತಿ ಸಮಾರಂಭದಲ್ಲಿ ಇಬ್ಬರೂ ಪ್ರಶಸ್ತಿ ಜತೆಗೆ 25 ಲಕ್ಷ ರೂ. ಬಹುಮಾನವನ್ನು ತಮ್ಮದಾಗಿಸಿಕೊಂಡರು.

2019ರ ಹಾಕಿ ಋತು ಮನ್‌ಪ್ರೀತ್‌ ಸಿಂಗ್‌ ಮತ್ತು ರಾಣಿ ರಾಮ್‌ಪಾಲ್‌ ಇಬ್ಬರಿಗೂ ಸ್ಮರಣೀಯವಾಗಿದ್ದು, ಇವರ ಸಾರಥ್ಯದಲ್ಲೇ ಭಾರತ ತಂಡ ಟೋಕಿಯೊ ಒಲಿಂಪಿಕ್ಸ್‌ ಟಿಕೆಟ್‌ ಪಡೆಯುವಲ್ಲಿ ಯಶಸ್ವಿಯಾಗಿತ್ತು.

ವಿವಿಧ ಪ್ರಶಸ್ತಿಗಳಿಗಾಗಿ ಹಾಕಿ ಇಂಡಿಯಾ ಒಟ್ಟು 1.64 ಕೋಟಿ ರೂ. ಮೊತ್ತವನ್ನು ವ್ಯಯಿಸಲಿದೆ. ಕೇಂದ್ರ ಕ್ರೀಡಾ ಸಚಿವ ಕಿರಣ್‌ ರಿಜಿಜು ಸಮಾರಂಭದ ಮುಖ್ಯ ಅತಿಥಿಯಾಗಿದ್ದರು.