Mangaluru: ಮತ್ತೆ ನಗರಕ್ಕೆ ಕೊಳೆತ ಮೀನಿನ ದುರ್ವಾಸನೆ ಶಿಕ್ಷೆ

ಮಹಾನಗರ: ಮತ್ತೆ ನಗರದ ದಕ್ಷಿಣ ಭಾಗದ ನಿವಾಸಿಗಳಿಗೆ ಮೀನಿನ ತೈಲ ಸಂಸ್ಕರಣ ಘಟಕಗಳಿಂದ ದುರ್ವಾಸನೆಯ ಕಾಟ ಶುರುವಾಗಿದೆ.

ಬೋಳಾರ, ಮುಳಿಹಿತ್ಲು, ಲೀವೆಲ್‌ ರೋಡ್‌, ಜೆಪ್ಪು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಈ ದುರ್ವಾಸನೆ ಹಬ್ಬಿದ್ದು ಜನ ಕಿರಿಕಿರಿ ಅನುಭವಿಸುತ್ತಿದ್ದಾರೆ.

ಮುಖ್ಯವಾಗಿ ಮಕ್ಕಳು, ಅಸ್ತಮಾದಂತಹ ಕಾಯಿಲೆ ಹೊಂದಿರುವವರು, ವೃದ್ಧರಿಗಂತೂ ಇದು ಅಸಹನೀಯವಾಗಿ ಪರಿಣಮಿಸಿದೆ.
ಪ್ರತಿವರ್ಷವೂ ಮೀನುಗಾರಿಕೆ ಸೀಸನ್‌ನಲ್ಲಿ ಈ ಸಮಸ್ಯೆ ಮರುಕಳಿಸುತ್ತದೆ. ಉಳ್ಳಾಲ ಕೋಟೆಪುರ ಭಾಗದಲ್ಲಿ ಮೀನು ಸಂಸ್ಕರಣೆ ಘಟಕಗಳಿದ್ದು, ಅಲ್ಲಿ ಕೊಳೆತ ಮೀನನ್ನು ಬೃಹತ್‌ ಪ್ರಮಾಣದಲ್ಲಿ ತಂದು ಫಿಶ್‌ ಮೀಲ್‌ ಉತ್ಪಾದಿಸಲಾಗುತ್ತದೆ. ಈ ವೇಳೆ ಇಡೀ ಪರಿಸರದಲ್ಲಿ ಅದು ಬೃಹತ್‌ ಪ್ರಮಾಣದಲ್ಲಿ ದುರ್ವಾಸನೆ ಹರಡುತ್ತದೆ.

ಇದು ಸ್ಥಳೀಯವಾಗಿ ಅನಾರೋಗ್ಯಕರ ಪರಿಸರ ಸೃಷ್ಟಿಸುತ್ತದೆ. ನಾವು ಅಂಬಾಮಹೇಶ್ವರಿ ಸೇವಾ ಟ್ರಸ್ಟ್‌ನಿಂದ ಮಾದರಿ ವಾರ್ಡ್‌ ನಿರ್ಮಾಣದ ಯತ್ನ ಮಾಡಲಾಗುತ್ತಿದೆ. ಸ್ಥಳೀಯವಾಗಿ ಮಹಾನಗರ ಪಾಲಿಕೆಯ ಯತ್ನಗಳಿಗೆ ಕೈ ಜೋಡಿಸುತ್ತಿದ್ದೇವೆ. ಆದರೆ ಈ ಮೀನು ಸಂಸ್ಕರಣೆಯ ಸಮಸ್ಯೆ ನಮ್ಮೆಲ್ಲ ಯತ್ನಕ್ಕೆ ತಡೆಯೊಡ್ಡಿದೆ ಎಂದು ಟ್ರಸ್ಟ್‌ ಅಧ್ಯಕ್ಷ ಸೀತಾರಾಮ ಅವರು ಈ ಕುರಿತು ಜಿಲ್ಲಾಧಿಕಾರಿಯವರಿಗೆ ಬರೆದ ಪತ್ರದಲ್ಲಿ ಅಳಲು ತೋಡಿಕೊಂಡಿದ್ದಾರೆ.

ಈ ಸಮಸ್ಯೆಯನ್ನು ಆದ್ಯತೆ ಮೇರೆಗೆ ಕೈಗೆತ್ತಿಕೊಂಡು, ಮೀನು ಸಂಸ್ಕರಣ ಕಾರ್ಖಾನೆ ಗಳಿಂದ ಆಗುವ ಸಮಸ್ಯೆ ನಿಯಂತ್ರಿಸಬೇಕು ಎಂದು ಆಗ್ರಹಿಸಿದ್ದಾರೆ.