ಮಂಗಳೂರು : ತಡರಾತ್ರಿ ಭೀಕರ ಅಪಘಾತಕ್ಕೆ ಯುವಕ ಬಲಿ, ಮೂವರಿಗೆ ಗಾಯ

 ಮಂಗಳೂರು: ನಗರದ ಹೊರವಲಯದ ಅಡ್ಯಾರ್ ಕಣ್ಣೂರು ಮಸೀದಿಯ ಬಳಿ ಬುಧವಾರ ನಸುಕಿನ 1 ಗಂಟೆಯ ವೇಳೆಗೆ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಯುವಕನೊಬ್ಬ ದಾರುಣವಾಗಿ ಸಾವನ್ನಪ್ಪಿ, ಇತರ ಮೂವರು ಗಂಭೀರವಾಗಿ ಗಾಯಗೊಂಡಿದ್ದಾರೆ. 

ನಿಂತಿದ್ದ ಕಾರಿಗೆ ಹಿಂಬದಿಯಿಂದ ಶರವೇಗದಲ್ಲಿ ಬಂದ ಕಾರು ಢಿಕ್ಕಿಯಾದ ಪರಿಣಾಮ ಅವಘಡ ಸಂಭವಿಸಿದೆ. ಅಪಘಾತದಲ್ಲಿ  2 ಕಾರು, ರಿಕ್ಷಾ ಮತ್ತು ಸ್ಕೂಟರ್‌ ಜಖಂಗೊಂಡಿವೆ. 

ಮೃತ ಯುವಕ ಅಡ್ಯಾರ್‌ನ ಫಾರೂಕ್‌ (25) ಎಂದು ತಿಳಿದು ಬಂದಿದ್ದು, ಸ್ಕೂಟರ್‌ ನಿಲ್ಲಿಸಿ ಮಳೆ ಬರುತ್ತಿದ್ದ ಕಾರಣ ಕಾರಿನೊಳಗೆ ಸ್ನೇಹಿತರೊಂದಿಗೆ ಮಾತನಾಡುತ್ತಿದ್ದ ವೇಳೆ ಹಿಂಬದಿಯಿಂದ ಇನ್ನೊಂದು ಕಾರು ಗುದ್ದಿದೆ ಪರಿಣಾಮವಾಗಿ ಫಾರೂಕ್‌ ಸಾವನ್ನಪ್ಪಿದ್ದು, ಕಾರಿನಲ್ಲಿದ್ದ ಹನೀಫ್,ಜುನೈದ್‌ ಮತ್ತು ಸಫ‌ìರಾಜ್‌ ಗಾಯಗೊಂಡಿದ್ದಾರೆ. 

ಸಂಚಾರಿ ವಿಭಾಗದ ಪೊಲೀಸರು ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.