ಮಂಗಳೂರು: ಇಂದಿನಿಂದ ನೀರಿನ ರೇಷನಿಂಗ್‌

ಮಹಾನಗರ: ಮಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ನೀರಿನ ರೇಷನಿಂಗ್‌ ಎ. 18ರಿಂದ ಆರಂಭವಾಗಲಿದೆ. ಅದರಂತೆ 18ರ ಸಂಜೆ 6ರಿಂದ 20ರಂದು ಬೆಳಗ್ಗೆ 6 ಗಂಟೆಯವರೆಗೆ ಪಾಲಿಕೆ ವ್ಯಾಪ್ತಿಯಲ್ಲಿ ನೀರು ಪೂರೈಕೆ ಸಂಪೂರ್ಣ ಸ್ಥಗಿತಗೊಳ್ಳಲಿದೆ.

ಮುಂದಿನ ದಿನಗಳಲ್ಲಿ ನಗರಕ್ಕೆ ವಾರದಲ್ಲಿ ನಾಲ್ಕು ದಿನ ನೀರು ಬಿಡಲಾಗುತ್ತಿದ್ದು, ಎರಡು ದಿನ ಪೂರೈಕೆ ಸ್ಥಗಿತಗೊಳ್ಳಲಿದೆ. ರೇಷನಿಂಗ್‌ ಪ್ರಕ್ರಿಯೆ ಹೀಗೇ ಮುಂದುವರಿಯಲಿದೆ ಎಂದು ಪಾಲಿಕೆ ತಿಳಿಸಿದೆ.

ತುಂಬೆ ಡ್ಯಾಂನಲ್ಲಿ ನೀರಿನ ಪ್ರಮಾಣ ಕಡಿಮೆಯಾಗುತ್ತಿರುವ ಹಿನ್ನೆಲೆಯಲ್ಲಿ, ಪಾಲಿಕೆ ವ್ಯಾಪ್ತಿಯಲ್ಲಿ ಸಾರ್ವಜನಿಕರಿಗೆ ಕುಡಿಯುವ ನೀರನ್ನು ಮಳೆಗಾಲ ಆರಂಭವಾಗುವವರೆಗೆ ಸಮರ್ಪಕವಾಗಿ ವಿತರಣೆ ಮಾಡಲು ಅನುಕೂಲವಾಗುವ ನಿಟ್ಟಿನಲ್ಲಿ ಎ. 11ರಿಂದಲೇ ನೀರು ರೇಷನಿಂಗ್‌ ಆರಂಭಿಸಲು ಪಾಲಿಕೆ ಪಾಲಿಕೆ ನಿರ್ಧರಿಸಿತ್ತು. ಆದರೆ, ಬಳಿಕ ಚುನಾವಣೆ ಮುಗಿಯುವವರೆಗೆ ನೀರು ಸ್ಥಗಿತಗೊಳಿಸದಿರಲು ನಿರ್ಧಾರವಾಗಿತ್ತು. ಈಗ ಎ. 18ರಂದು ಸಂಜೆ 6 ಗಂಟೆಗೆ ಚುನಾವಣೆ ಮುಗಿಯಲಿದೆ. ಚುನಾವಣೆ ಮುಗಿಯುತ್ತಿದ್ದಂತೆ ನೀರಿನ ರೇಷನಿಂಗ್‌ ಕೂಡ ನಗರದಲ್ಲಿ ಆರಂಭವಾಗಲಿದೆ.