ಪೊಲೀಸ್‌ ಪೇದೆ ಜೊತೆ ಮೂರನೇ ಬಾರಿ ಗೃಹಿಣಿ ಪರಾರಿ: ನೊಂದ ಪತಿಯಿಂದ ದೂರು

ಮಂಡ್ಯ: ಪೊಲೀಸ್‌ ಪೇದೆಯೊಬ್ಬನ ಜೊತೆ ಗೃಹಿಣಿಯೊಬ್ಬಳು ಪರಾರಿಯಾಗಿರುವ ಘಟನೆ ನಡೆದಿದ್ದು, ಪತ್ತೆ ಮಾಡಿಕೊಡುವಂತೆ ಮಹಿಳೆ ಪತಿ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಗೆ ದೂರು ನೀಡಿದ್ದಾರೆ.

ಚಾಮರಾಜನಗರ ಜಿಲ್ಲೆ ಕೊಳ್ಳೆಗಾಲ ತಾಲೂಕಿನ ಮುಳ್ಳೂರು ಗ್ರಾಮದ ನಿವಾಸಿ ನಾಗರಾಜ ತಮ್ಮ ಪತ್ನಿ ಶೀಲಾ (ಹೆಸರು ಬದಲಿಸಿದೆ) ಪೇದೆ ಯೊಂದಿಗೆ ಪರಾರಿಯಾಗಿದ್ದಾಳೆ ಎಂದು ದೂರು ನೀಡಿದ್ದಾರೆ.

ಘಟನೆ ವಿವರ:
ಮಳವಳ್ಳಿ ತಾಲೂಕಿನ ಹಲಗೂರು ಪೊಲೀಸ್‌ ಠಾಣೆ ಯಲ್ಲಿ ಪೇದೆಯಾಗಿ ಕರ್ತವ್ಯ ನಿರ್ವಹಿಸುತ್ತಿರುವ ಕೊಳ್ಳೇಗಾಲ ಮೂಲದ ಹರೀಶ, ಶೀಲಾಳೊಂದಿಗೆ ಸ್ನೇಹ ಬೆಳೆಸಿದ್ದ ಎಂದು ಹೇಳಲಾಗಿದೆ. ಪೊಲೀಸ್‌ ಪೇದೆ ಹರೀಶ ತನ್ನ ಪತ್ನಿ ಶೀಲಾಳೊಂದಿಗೆ ಪರಾರಿಯಾಗಿದ್ದಾನೆ. ಮೊದಲು ಎರಡು ಬಾರಿಯೂ ಇದೇ ರೀತಿ ಇವರಿಬ್ಬರೂ ಪರಾರಿಯಾಗಿದ್ದರು. ನಂತರದ ದಿನಗಳಲ್ಲಿ ಅವರನ್ನು ಕರೆಸಿ ರಾಜೀ ಪಂಚಾಯಿತಿ ಮಾಡಿ ಮಹಿಳೆಯನ್ನು ಗಂಡನೊಂದಿಗೆ ಕಳುಹಿಸಲಾಗಿತ್ತು. ಆದರೂ, ಹರೀಶ ಮತ್ತು
ಶೀಲಾ ತಮ್ಮ ಚಾಳಿ ಬಿಡದೆ ಮತ್ತೆ ಮೂರನೇ ಬಾರಿಯೂ ಮನೆ ಯಿಂದ ಪರಾರಿಯಾಗಿದ್ದಾರೆ. ನಿಮ್ಮದೇ ಇಲಾಖೆಯಲ್ಲಿ ಕೆಲಸ ಮಾಡುವ ಪೊಲೀಸ್‌ ಪೇದೆ ವಿರುದ್ಧ ಕ್ರಮ ಕೈಗೊಂಡು ನನ್ನ ಪತ್ನಿಯನ್ನು ಹುಡುಕಿಸಿ ಕೊಡಿ ಎಂದು ಪತಿ ನಾಗರಾಜು ಜಿಲ್ಲಾ ಪೊಲೀಸ್‌ ಅಧೀಕ್ಷಕರಿಗೆ ದೂರು ಸಲ್ಲಿಸಿದ್ದಾರೆ. ನಾಗರಾಜು ಮತ್ತು ಶೀಲಾ ದಂಪತಿಗೆ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ.