Mandya:ಚೆಲುವನಾರಾಯಣಸ್ವಾಮಿಗೆ ವಿಶೇಷ ವಸ್ತ್ರ ಮಾರ್ಯಾದೆ

ಮೇಲುಕೋಟೆ: ತಮಿಳುನಾಡು ಸರ್ಕಾರದ ವಿಶೇಷ ಆದೇಶದಂತೆ ಅಲ್ಲಿನ ಮುಜರಾಯಿ ಇಲಾಖೆಯ ಉನ್ನತ ಅಧಿಕಾರಿಗಳು ಮತ್ತು ಅರ್ಚಕರ ತಂಡ ರಾಜಮುಡಿ ಉತ್ಸವದಂದು ಮೇಲುಕೋಟೆ ಶ್ರೀ ಚೆಲುವನಾರಾಯಣಸ್ವಾಮಿಗೆ ವಿಶೇಷ ವಸ್ತ್ರ ಮರ್ಯಾದೆ ಸಮರ್ಪಿಸಿದರು.

ರಾಮಾನುಜರ ತಿರುತ್ತಂಬಿ ಎಂದೇ ಹೆಸರಾದ ಕಾಂಚೀಪುರಂ ಜಿಲ್ಲೆಯ ಮದುರಮಂಗಲಮ್‌ನ ಅರುಲ್‌ಮಿಗು ಶ್ರೀವೈಕುಂಠ ಪೆರುಮಾಳ್‌, ಎಂಬಾರ್‌ ದೇವಾಲಯದಿಂದ ಎರಡನೇ ವರ್ಷದ ಪರಂಪರೆಯ ಸಮ್ಮಿಲನದ ಉದ್ದೇಶದಿಂದ ಕಾಂಚೀಪುರಂ ಜಿಲ್ಲೆಯ ಪ್ರವಾಸೋದ್ಯಮ ಮತ್ತು ಮುಜರಾಯಿ ಇಲಾಖೆ ಜಂಟಿ ಆಯುಕ್ತೆ ಆರ್‌.ವಾಗ್ಮತಿ ನೇತೃತ್ವದ ಅಧಿ ಕಾರಿಗಳ ತಂಡದೊಂದಿಗೆ ಆಗಮಿಸಿ ವಿಶೇಷವಾಗಿ ತಂದಿದ್ದ ರೇಷ್ಮೆ ವಸ್ತ್ರಗಳನ್ನು ಮೇಲುಕೋಟೆಯಲ್ಲಿ ಛತ್ರಿಚಾಮರ
ದೀವಟಿಗೆಗಳೊಂದಿಗೆ ದೇವಾಲಯದ ಸುತ್ತ ಮೆರವಣಿಗೆ ಮಾಡಿ ಚೆಲುವನಾರಾಯಣಸ್ವಾಮಿ ಮತ್ತು ರಾಮಾನುಜಚಾರ್ಯರಿಗೆ ಸಮರ್ಪಿಸಿದರು.

ಜಂಟಿ ಆಯುಕ್ತೆ ಆರ್‌.ವಾಗ¾ತಿ ಮಾತನಾಡಿ, ಮೇಲುಕೋಟೆ ಭಾರತದ ಶ್ರೀಮಂತಿಕೆಯ ಭವ್ಯ ಪರಂಪರೆಯ ತಾಣವಾಗಿದೆ. ತಮಿಳುನಾಡಿಗೂ ಕ್ಷೇತ್ರಕ್ಕೂ ಐತಿಹಾಸಿಕವಾಗಿ ಮತ್ತು ಸಾಂಸ್ಕೃತಿಕವಾಗಿ ಅಪಾರ ಬಾಂಧವ್ಯವಿದೆ. ತಮಿಳುನಾಡಿನಿಂದ ಸಾಕಷ್ಟು ಭಕ್ತರು ಮೇಲುಕೋಟೆಗೆ ಭೇಟಿ ನೀಡುತ್ತಾರೆ.

ರಾಮಾನುಜರೂ ಸಹ ತಮಿಳುನಾಡಿನಿಂದ ಬಂದು ಕರ್ನಾಟಕದಲ್ಲಿ ಇತಿಹಾಸ ಸೃಷ್ಟಿಸಿ ಭಾರತದ ಸಂಸ್ಕೃತಿ ಪರಂಪರೆಯನ್ನು ಶ್ರೀಮಂತಗೊಳಿಸಿದ್ದಾರೆ ಎಂದರು. ಸಾಂಸ್ಕೃತಿಕ ಪರಂಪರೆಯ ಮುಂದುವರೆಸುವ ದೃಷ್ಟಿಯಿಂದ ತಮಿಳುನಾಡು ಸರ್ಕಾರ ರಾಜಮುಡಿ ಉತ್ಸವದಂದು ಚೆಲುವನಾರಾಯಣನಿಗೆ ವಿಶೇಷ ವಸ್ತ್ರ ಸಮರ್ಪಣೆ ಮಾಡುತ್ತಾ ಬಂದಿದೆ.

ತಮಿಳುನಾಡು ಸರ್ಕಾರ ಮೇಲುಕೋಟೆಯಲ್ಲಿ ಭಕ್ತರಿಗೆ ಮೂಲಸೌಕರ್ಯ ಕಲ್ಪಿಸಲು ಬದ್ಧವಾಗಿದ್ದು, ಈ ಸಂಬಂಧ ಕರ್ನಾಟಕ ಸರ್ಕಾರ ಸಹಮತ ನೀಡಿದರೆ ಮುಂದಿನ ಯೋಜನೆಯ ರೂಪುರೇಷೆ ಸಿದ್ಧ ಮಾಡಲು ಶ್ರಮಿಸುತ್ತೇವೆಂದು ತಿಳಿಸಿದರು.

ಮೇಲುಕೋಟೆಯ ಕಲ್ಯಾಣಿ ಸಮುಚ್ಛ ಯ, ಯೋಗ ನರಸಿಂಹಸ್ವಾಮಿಬೆಟ್ಟ, ಇಲ್ಲಿನ ಭವ್ಯ ಸ್ಮಾರಕಗಳು ಭಾರತೀಯ ಸಂಸ್ಕೃತಿಯನ್ನು ಶ್ರೀಮಂತಗೊಳಿಸಲು ತಮ್ಮದೇ ಕೊಡುಗೆ ನೀಡಿವೆ. ಇಂತಹ ಶ್ರೀಮಂತಿಕೆಯ ಮಹತ್ವವನ್ನು ಮುಂದಿನ ತಲೆಮಾರಿಗೂ ಕೊಂಡೊಯ್ಯಬೇಕಾದ ಅಗತ್ಯವಿದ್ದು, ಈ ನಿಟ್ಟಿನಲ್ಲಿ ನಾವೆಲ್ಲರೂ ಶ್ರಮಿಸಬೇಕಿದೆ ಎಂದರು.

ಶ್ರೀಪೆರಂಬೂದೂರಿನ ಚಕ್ರಪಾಣಿಯವರ ಸಂಘಟನೆಯಲ್ಲಿ ನಡೆದ ಅರ್ಥಪೂರ್ಣ ಕಾರ್ಯಕ್ರಮದ ವಸ್ತ್ರ ಸಮರ್ಪಣೆಯ
ಮೆರವಣಿಗೆಯಲ್ಲಿ ಮೇಲುಕೋಟೆ ದೇವಾಲಯದ ಸಿಇಒ ಮಹೇಶ್‌, ಪಾರುಪತ್ತೇಗಾರರಾದ ಸ್ಥಾನೀಕಂ ಶ್ರೀನಿವಾಸ ನರಸಿಂಹನ್‌ ಗುರೂಜಿ, ಪರಿಚಾರಕ ಎಂ.ಎನ್‌.ಪಾರ್ಥಸಾರಥಿ, ಶ್ರೀಪೆರಂಬೂದೂರು ವೈಕುಂಠ ಪೆರುಮಾಳ್‌ ಎಂಬಾರ್‌ ದೇವಾಲಯದ ಇಒ ರಾಜಾ ಎಸ್‌.ಇರುಂಪೆರುವಳದಿ, ಟ್ರಸ್ಟಿ ಪಿ.ನರಸಿಂಹನ್‌, ಲಕ್ಷ್ಮಣರಾವ್‌, ವೆಂಕಟೇಶನ್‌, ಕಾಂಚೀಪುರಂ ವರದರಾಜಸ್ವಾಮಿ ದೇವಾಲಯದ ಸಿಇಒಗಳಾದ ಎಸ್‌. ಶ್ರೀನಿವಾಸನ್‌, ಮುತ್ತುಲಕ್ಷ್ಮೀ, ಎಚ್‌ಆರ್‌ಎಂಸಿ ಇನ್ಸ್‌ಪೆಕ್ಟರ್‌ ಜೆ.ಸುರೇಶಕುಮಾರ್‌ ಮತ್ತಿತರರಿದ್ದರು.