ಹೆಸರು ಬದಲಾಯಿಸಿ ಟೆಬ್ಮಾ ಕಾರ್ಯಾಚರಣೆ: ಬಂದರಿನ ಜಾಗ ಇತರರ ಕೈವಶವಾದರೆ ಹೋರಾಟದ ಎಚ್ಚರಿಕೆ

ಮಲ್ಪೆ: ಮೀನುಗಾರಿಕೆ ಬಂದರಿನ ಅಭಿವೃದ್ಧಿಗೆ ಮೀಸಲಾಗಿರಿಸಿದ್ದ ಈಗಿರುವ ಟೆಬ್ಮಾ ಶಿಪ್‌ ಯಾರ್ಡ್‌ ಜಾಗವನ್ನು ಕೇಂದ್ರ ಸರಕಾರದ ಅಧೀನದ ಉಡುಪಿ ಕೊಚ್ಚಿನ್‌ ಶಿಪ್‌ಯಾರ್ಡ್‌ ಲಿಮಿಟೆಡ್‌ ಎಂಬ ಹೆಸರಿನಲ್ಲಿ ತನ್ನ ಅಧೀನಕ್ಕೆ ತೆಗೆದುಕೊಂಡು ಕಾರ್ಯಾ ಚರಿಸುತ್ತಿರುವುದು ಕಂಡು ಬಂದಿದೆ.

ಟೆಬ್ಮಾ ಶಿಪ್‌ ಯಾರ್ಡ್‌ಗೆ ಈ ಹಿಂದೆ ನಡೆದ ಒಪ್ಪಂದದಂತೆ 2023ರ ಡಿಸೆಂಬರ್‌ 31ರಂದು ಅವಧಿ ಮುಗಿ ಯ ಲಿದ್ದು, ಒಪ್ಪಂದದಂತೆ ಸರಕಾರ ಹಿಂದೆ ಪಡೆಯಬೇಕು. ಒಂದು ವೇಳೆ ಒಪ್ಪಂದವನ್ನು ಮುರಿದರೆ ಸಮಸ್ತ ಮೀನುಗಾರರ ನೇತೃತ್ವದಲ್ಲಿ ಉಗ್ರ ಹೋರಾಟದ ಹಾದಿಯನ್ನು ತುಳಿಯಬೇಕಾಗುತ್ತದೆ ಎಂದು ಮಲ್ಪೆ ಮೀನುಗಾರ ಸಂಘ ಎಚ್ಚರಿಸಿದೆ.

ಮೀನುಗಾರರ ಕೈಜಾರಿದ ಜಾಗ:

ಬಂದರಿನಲ್ಲಿ ಬೋಟುಗಳ ಲ್ಯಾಂಡಿಂಗ್‌, ಬರ್ತಿಂಗ್‌ ಮಾಡಲು ಈಗಿರುವ ಜಾಗದಲ್ಲಿ ಸ್ಲಿಪ್‌ವೇ ಮಾಡು ವುದೆಂದು ನಿರ್ಧರಿಸಲಾಗಿದ್ದು, ಕಾರಣಾಂತರಗಳಿಂದ ಸ್ಲಿಪ್‌ವೇ

ವಿಳಂಬವಾಗಿತ್ತು. ಅನಂತರ ಬೋಟು, ಸ್ಲಿಪ್‌ವೇ ನಿರ್ಮಾಣಕ್ಕೆ ಸರಕಾರ ಜಾಗವನ್ನು ಖಾಸಾಗಿ ಸಂಸ್ಥೆಗೆ ನೀಡಿತ್ತು. ಅದು ಮುಂದೆ ಟೆಬ್ಮಾ ಶಿಪ್‌ಯಾರ್ಡ್‌ ಆಗಿ ಪರಿವರ್ತನೆಗೊಂಡು ದೊಡ್ಡ ಪ್ರಮಾಣದ ಹಡಗು ನಿರ್ಮಾಣ ಗೊಳ್ಳಲಿದೆ ಎಂದು ಮೀನುಗಾರರ ಅರಿವಿಗೆ ಬರುವಾಗ ತಡವಾಗಿತ್ತು. ಮೀನುಗಾರರಿಂದ ಒಂದು ತಿಂಗಳ ಕಾಲ ಹೋರಾಟ ನಡೆದಿತ್ತು. ಅದಾಗಲೇ ಸರಕಾರ ಬಂದರು ಇಲಾಖೆಗೆ ಸೇರಿದ ಜಾಗವನ್ನು ಟೆಬ್ಮಾ ಶಿಪ್‌ಯಾರ್ಡ್‌ಗೆ 30 ವರ್ಷದ ಅವಧಿಗೆ ಲೀಸ್‌ಗೆ ನೀಡಲಾಗಿತ್ತು.

ಸಿಎಂ ಮಧ್ಯೆ ಪ್ರವೇಶ, ಒಪ್ಪಂದ :

ಮಲ್ಪೆ ಬಂದರಿನಲ್ಲಿ ಬೋಟು ನಿಲ್ಲಲು ಸ್ಥಳಾವಕಾಶದ ಕೊರತೆಯಿಂದ ಮೀನುಗಾರರಿಗೆ ಆಗುತ್ತಿರುವ ಸಮಸ್ಯೆಯನ್ನು ಮನಗಂಡು 2008ರ ಡಿಸೆಂಬರ್‌ 18ರಂದು ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಟೆಬ್ಮಾ ಅಧಿಕಾರಿಗಳು, ಮೀನುಗಾರಿಕೆ ಇಲಾಖೆಯ ಅಧಿಕಾರಿಗಳು, ಶಾಸಕರು, ಸಚಿವರೊಂದಿಗೆ ಬೆಂಗಳೂರಿನಲ್ಲಿ ಮೀನುಗಾರ ಸಂಘದ ಜತೆ ಸಭೆ ನಡೆಸಿ 30 ವರ್ಷದ ಅವಧಿಯನ್ನು 15 ವರ್ಷಕ್ಕೆ ಸೀಮಿತಗೊಳಿಸುವ ಮೂಲಕ ಒಪ್ಪಂದ ಮಾಡಿದ್ದರು. ಈ ಬಗ್ಗೆ ರಾಜ್ಯಪಾಲರ ಅಧೀನ ಕಾರ್ಯದರ್ಶಿ ಆದೇಶವನ್ನು ನೀಡಿದ್ದರು. ಜಿಲ್ಲಾಧಿಕಾರಿ ಸೇರಿದಂತೆ ಸಭೆಯಲ್ಲಿದ್ದ ಎಲ್ಲರೂ ಸಹಿ ಹಾಕಿದ್ದ‌ರು. ಮೀನುಗಾರರಿಗೆ ಇದು ಅಸಮಾಧಾನವಾದರೂ ಒಪ್ಪಿಗೆ  ಸೂಚಿಸಿದ್ದರು. 2023ರ ಡಿ. 31ಕ್ಕೆ ಅವಧಿ ಮುಗಿಯಲಿದೆ. ಆದರೆ ಸರಕಾರ ಇದಕ್ಕೆ ಮೊದಲೇ ಕಳೆದ ವರ್ಷ ಉಡುಪಿ ಕೊಚ್ಚಿನ್‌ ಶಿಪ್‌ಯಾರ್ಡ್‌ ಎಂಬ ಹೆಸರಿನಲ್ಲಿ ಕಾರ್ಯಾಚರಿಸುತ್ತಿದೆ ಎಂದು ಮೀನುಗಾರ ಸಂಘಟನೆ ತಿಳಿಸಿದೆ.

ಮಲ್ಪೆ ಶಿಪ್‌ಯಾರ್ಡ್‌ ಬಗ್ಗೆ ಶುಕ್ರವಾರ ಬೆಂಗಳೂರಿನಲ್ಲಿ ಬಂದರು ಇಲಾಖೆ ಅಧಿಕಾರಿಗಳೊಂದಿಗೆ ಸಭೆ ನಡೆಸಿ ಮುಂದಿನ ತೀರ್ಮಾನ ಕೈಗೊಳ್ಳಲಾಗುವುದು.  – ಎಸ್‌. ಅಂಗಾರ  ಸಚಿವರು, ಮೀನುಗಾರಿಕೆ ಮತ್ತು ಬಂದರು ಇಲಾಖೆ

ಮೀನುಗಾರಿಕೆ ಬಂದರಿನ ಅಭಿವೃದ್ಧಿಗೆ ಮೀಸಲಾಗಿರಿಸಿದ ಜಾಗವನ್ನು ಬಂದರಿನ ಅಭಿವೃದ್ಧಿ ಹೊರತುಪಡಿಸಿ ಬೇರೆ ಯಾವುದೇ ಉದ್ದೇಶಕ್ಕೆ ಬಳಸಿಕೊಂಡಲ್ಲಿ ಮಲ್ಪೆ ಮೀನುಗಾರರ ಸಂಘದ ನೇತೃತ್ವದಲ್ಲಿ ಸಮಸ್ತ ಮೀನುಗಾರರು ಸೇರಿ ಬೀದಿಗಿಳಿದು ಹೋರಾಟ ನಡೆಸಲು ಸಿದ್ಧರಾಗಿದ್ದಾರೆ. -ದಯಾನಂದ ಕೆ. ಸುವರ್ಣ, ಮಲ್ಪೆ ಮೀನುಗಾರರ ಸಂಘದ ಅಧ್ಯಕ್ಷ