ಕೊಡವ ಮಕ್ಕಡ ಕೂಟಕ್ಕೆ 4ನೇ ವರ್ಷದ ಸಂಭ್ರಮ

ಮಡಿಕೇರಿ: ಬದಲಾಗುತ್ತಿರುವ ಸಾಮಾಜಿಕ ಪರಿಸ್ಥಿತಿಗಳ ನಡುವೆ ಉನ್ನತ ಶಿಕ್ಷಣವನ್ನು ಹೊಂದಿ ಕೊಳ್ಳುವ ಸಲುವಾಗಿ ಹೊರ ಜಿಲ್ಲೆಗಳಿಗೆ ತೆರಳುವ ಕೊಡವ ಸಮುದಾಯ ಈ ನೆಲದ ಶ್ರೀಮಂತ ಸಂಸ್ಕೃತಿಯನ್ನು ಮರೆಯುತ್ತಿದೆ ಎಂದು ಮಡಿಕೇರಿ ಕೊಡವ ಸಮಾಜದ ಅಧ್ಯಕ್ಷರಾದ ಕೋದಂಡ ಎಸ್‌. ದೇವಯ್ಯ ವಿಷಾದ ವ್ಯಕ್ತಪಡಿಸಿದ್ದಾರೆ.

ನಗರದ ಬಾಲಭವನದಲ್ಲಿ ನಡೆದ ಕೊಡವ ಮಕ್ಕಡ ಕೂಟ ಸಂಘಟನೆಯ ನಾಲ್ಕನೇ ವಾರ್ಷಿಕೋತ್ಸವ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಕೊಡವ ಸಮುದಾಯದ ಸಂಸ್ಕೃತಿಯ ಬೆಳವಣಿಗೆ ಎಂದರೆ ಅದು ಕೇವಲ ನಡೆ ನುಡಿ, ಊಟೋಪಚಾ ರಕ್ಕಷ್ಟೇ ಅಲ್ಲ, ಸಾಹಿತ್ಯ ಸಂಸ್ಕೃತಿ ಹೀಗೆ ಎಲ್ಲಾ ಕ್ಷೇತ್ರ ಗಳಲ್ಲು ಬೆಳವಣಿಗೆಯನ್ನು ಸಾಧಿಸಬೇಕೆಂದರು. ಪ್ರತಿ ಯೊಬ್ಬ ಕೊಡವರು ನಮ್ಮ ಸಂಸ್ಕೃತಿಯ ಸಂರಕ್ಷಣೆೆಗೆ ಮುಂದಾಗಬೆೇಕೆಂದು ಕರೆ ನೀಡಿದರು.

ಕೊಡವ ಸಂಸ್ಕೃತಿ, ಆಚಾರ ವಿಚಾರಗಳನ್ನು ಸಂರಕ್ಷಿಸಿ ಬೆಳೆಸುವ ನಿಟ್ಟಿನಲ್ಲಿ ಪ್ರಸ್ತುತ ಸಂಕಷ್ಟ ಎದುರಾಗಿದೆ. ಕೊಡವ ಸಂಪ್ರದಾಯದ ವಿವಾಹ ಸಮಾರಂಭದಲ್ಲಿ ಗಂಗಾ ಪೂಜೆಗೆ ಪ್ರಧಾನ ಆದ್ಯತೆ ನೀಡಲಾಗುತ್ತಿದೆ. ಕಾರಣ, ನೀರು ತರುವ ವಧುವನ್ನು ತಡೆದು ಗಂಟೆಗಟ್ಟಲೆ ಕುಣಿಯುವ ಕಾರಣಕ್ಕಾಗಿ. ಅದೂ ವಿವಾಹ ಸಮಾರಂಭದಲ್ಲಿ ಪಾಲ್ಗೊಳ್ಳುವ ಇತರೆ ಸಮೂಹದ ಸ್ನೇಹಿತರ ಮನೋರಂಜನೆಯ ನೃತ್ಯಕ್ಕಾಗಿ ಎಂದು ಅತೀವ ಬೇಸರ ವ್ಯಕ್ತಪಡಿಸಿದರು. ಇಂದು ಸಂಸ್ಕೃತಿ ಸಂಪ್ರದಾಯದ ಪಾವಿತ್ರ್ಯ ಉಳಿದಿಲ್ಲವೆಂದರು.

ಕೊಡವ ಜನಾಂಗ ಬಾಂಧವರು ಎಂದಿಗೂ ಇತರ ಸಮಾಜ ಬಾಂಧವರ ಬಗ್ಗೆ ಮಾತನಾಡಿಲ್ಲ ಮತ್ತು ಮಾತನಾಡುವ ಅವಶ್ಯಕತೆಯೂ ಇಲ್ಲ. ಸೌಹಾರ್ದ ತೆಯಿಂದ ಬಾಳಬೇಕೆನ್ನುವುದೆ ನಮ್ಮ ಚಿಂತನೆ. ಆದರೆ, ಇದನ್ನೆ ನಮ್ಮ ದೌರ್ಬಲ್ಯವೆಂದು ಯಾರು ಭಾವಿಸುವ ಅಗತ್ಯವಿಲ್ಲವೆಂದು ಸ್ಪಷ್ಟಪಡಿಸಿ, ಕೊಡವ ಸಂಸ್ಕೃತಿಯ ಸಂರಕ್ಷಣೆಗೆ ಕೊಡವ ಮಕ್ಕಡ ಕೂಟದ ಯಾವುದೇ ಕಾರ್ಯಗಳಿಗೆ ಸಂಪೂರ್ಣ ಬೆಂಬಲ ನೀಡುವುದಾಗಿ ಕೆ.ಎಸ್‌. ದೇವಯ್ಯ ತಿಳಿಸಿದರು.
    ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡಿದ್ದ ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿಯ ಮಾಜಿ ಅಧ್ಯಕ್ಷರು ಹಾಗೂ ಜಾನಪದ ತಜ್ಞರಾದ ಬಾಚರಣಿಯಂಡ ಅಪ್ಪಣ್ಣ ಅವರು ಮಾತನಾಡಿ ಪಂದ್ಯಂಡ ಬೆಳ್ಯಪ್ಪ ಅವರು ಸ್ವಾತಂತ್ರ್ಯ ಪೂರ್ವದಲ್ಲಿ ಗಾಂಧಿ ತಣ್ತೀಗಳಿಗೆ ಮಾರು ಹೋಗಿ ಜಿಲ್ಲೆಯಲ್ಲಿ ಕಾಂಗ್ರೆಸ್‌ ಬೆಳವಣಿಗೆಗೆ ತಮ್ಮ ಅಪೂರ್ವ ಕಾಣಿಕೆ ನೀಡಿದ ಪಂದ್ಯಂಡ ಬೆಳ್ಯಪ್ಪ ಅವರ ನಿಸ್ವಾರ್ಥ ಸೇವೆಯ ಹಿನ್ನೆಲೆಯಲ್ಲಿ 1919 ರಿಂದ 1952 ನಡುವಿನ ಕೊಡಗಿನ ಅವಧಿ ಪಂದ್ಯಂಡ ಬೆಳ್ಯಪ್ಪ ಯುಗವೆಂದು ಬಣ್ಣಿಸಿದರು.

ಕೊಡಗಿಗೆ 1934ರಲ್ಲಿ ಮಹಾತ್ಮಾ ಗಾಂಧೀಜಿ ಯವರನ್ನು ಕರೆತರುವಲ್ಲಿ, ಆನಂತರದ ದಿನಗಳಲ್ಲಿ ಆಚಾರ್ಯ ಕೃಪಲಾನಿ, ಬಾಬು ರಾಜೇಂದ್ರ ಪ್ರಸಾದ್‌, ಮಿರ್ಜಾ ಇಸ್ಮಾಯಿಲ್‌ , ಜಯಪ್ರಕಾಶ್‌ ನಾರಾಯಣ್‌ ಮೊದಲಾದ ಮಹಾನ್‌ ವ್ಯಕ್ತಿಗಳನ್ನು ಕರೆತರುವಲ್ಲಿ ಪಂದ್ಯಂಡ ಬೆಳ್ಯಪ್ಪ ಅವರ ಪ್ರಯತ್ನ ಮರೆಯಲಾಗದ್ದು, ಹಾಗೆಯೇ ಮಡಿಕೆೇರಿಯಲ್ಲಿ ಕಾಲೆೇಜು ಸ್ಥಾಪನೆ ಯಾಗಲು ಅವರು ಕಾರಣೀಭೂತರಾಗಿದ್ದರೆಂದು ಅವರ ಸಾಧನೆಗಳನ್ನು ಸ್ಮರಿಸಿದರು. 

ಕೊಡವ ಮಕ್ಕಡ ಕೂಟದ ಅಧ್ಯಕ್ಷ ಬೊಳ್ಳಜ್ಜಿರ ಅಯ್ಯಪ್ಪ ಪ್ರಾಸ್ತಾವಿಕವಾಗಿ ಮಾತನಾಡಿ, ಸಂಘಟನೆಯ ಮೂಲಕ ಕೊಡವ ಸಂಸ್ಕೃತಿಯ ಬೆಳವಣಿಗೆಗೆ ಹಾಗೂ ಮಕ್ಕಳಿಗೆ ಪೋ›ತ್ಸಾಹ ನೀಡುವ ಕಾರ್ಯವನ್ನು ನಿರಂತರವಾಗಿ ಮಾಡಿಕೊಂಡು ಬರಲಾಗುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಕೊಡವ ವಿರೋಧಿ ಧೋರಣೆಗಳು ಸಮಾಜದಲ್ಲಿ ಕಂಡು ಬರುತ್ತಿದೆ ಎಂದು ಆರೋಪಿಸಿದರು. ಪ್ರಸ್ತುತ ಸಾಕಷ್ಟು ವ್ಯಾಪಾರ ವಹಿವಾಟುಗಳಲ್ಲಿ ಕೊಡವರ ಪೀಚೆಕತ್ತಿ, ವಡಿಕತ್ತಿಯನ್ನು ಚಿಹ್ನೆಯನ್ನಾಗಿ ಬಳಸುತ್ತಿರುವ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿದರು.

“ಚಾಯಿ’ ಪುಸ್ತಕ ಬಿಡುಗಡೆ
ಇದೇ ಸಂದರ್ಭ ಉಳುವಂಗಂಡ ಕಾವೇರಿ ಉದಯ ಅವರು ಬರೆದ ಪುಸ್ತಕ ಚಾಯಿ ಕೃತಿಯನ್ನು ಅತಿಥಿ ಗಣ್ಯರು ಅನಾವರಣಗೊಳಿಸಿದರು.

ಕೂಟದ ಪ್ರಮುಖರಾದ ಪುತ್ತೇರಿರ ಕರುಣ್‌ ಕಾಳಯ್ಯ ಕೂಟ ನಡೆದು ಬಂದ ಹಾದಿಯ ಬಗ್ಗೆ ಮಾಹಿತಿ ನೀಡಿದರು. 
ವೇದಿಕೆಯಲ್ಲಿ ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಬಿ.ಎಸ್‌. ತಮ್ಮಯ್ಯ, ಪಂದ್ಯಂಡ ಬೆಳ್ಯಪ್ಪ ಅವರ ಮಗ ಪಂದ್ಯಂಡ ವಿಜು ಬೆಳ್ಯಪ್ಪ, ಕನ್ನಂಡ ನಿರ್ಮಲ ಸೋಮಯ್ಯ, ಕೊಂಗೇಟಿರ ಅಚ್ಚಪ್ಪ, ಅಲ್ಲಾರಂಡ ವಿಠಲ ನಂಜಪ್ಪ ಉಪಸ್ಥಿತರಿದ್ದರು. 

ಇದಕ್ಕೂ ಮೊದಲು ಕೊಡವ ಮಕ್ಕಡ ಕೂಟದಿಂದ ನಗರದ ನಗರಸಭೆಯ ಹಿಂಭಾಗದ ರಸ್ತೆಗೆ ಕೊಡಗಿನ ಗಾಂಧಿ ಎಂದೇ ಖ್ಯಾತನಾಮರಾಗಿರುವ ಪಂದ್ಯಂಡ ಬೆಳ್ಯಪ್ಪ ಅವರ ಹೆಸರನ್ನಿರಿಸಿ ಫ‌ಲಕವನ್ನು ಅನಾವರಣಗೊಳಿಸಲಾಯಿತು.