ಮಾಹೆ ವಿ.ವಿ.- ಐಯುಪಿಯುಐ ಒಪ್ಪಂದ

ಉಡುಪಿ: ಮಣಿಪಾಲದ ಮಾಹೆ ವಿಶ್ವವಿದ್ಯಾನಿಲಯ ಮತ್ತು ಇಂಡಿಯಾನಾ ವಿಶ್ವವಿದ್ಯಾನಿಲಯ- ಪದ್ಯೂರ್ ವಿಶ್ವವಿದ್ಯಾನಿಲಯ ಇಂಡಿಯಾನಾ ಪೊಲಿಸ್‌ (ಐಯುಪಿ ಯುಐ) ನಡುವೆ ಒಪ್ಪಂದ ಪತ್ರಕ್ಕೆ ಸಹಿ ಮಾಡಲಾಗಿದೆ. ಸಹಕಾರ ಶಿಕ್ಷಣದ ಸಲುವಾಗಿ ಮಣಿಪಾಲ್ ಕಾಲೇಜ್‌ ಆಫ್ ಹೆಲ್ತ್ ಪ್ರೊಫೆಶನ್ಸ್‌ (ಎಂಸಿಎಚ್ಪಿ) ಪರವಾಗಿ ಇಂಡಿಯಾನಾ ಸಂಸ್ಥೆ ಒಪ್ಪಂದಕ್ಕೆ ಬಂದಿದೆ.

ಮಾಹೆ ಕುಲಪತಿ ಡಾ| ಎಚ್. ವಿನೋದ ಭಟ್ ಮತ್ತು ಅಮೆರಿಕದ ಇಂಡಿಯಾನಾ ಯುನಿವಿರ್ಸಿಟಿ ಸ್ಕೂಲ್ ಆಫ್ ಇನ್‌ಫಾರ್ಮೆಟಿಕ್ಸ್‌ ಆ್ಯಂಡ್‌ ಕಂಪ್ಯೂಟಿಂಗ್‌ ನಿರ್ದೇಶಕ ಪ್ರೊ| ಜೋಸೆಟ್ ಜೋನ್ಸ್‌ ಸಹಿ ಮಾಡಿದರು. ಮಾಹೆ ಇಂಟರ್‌ನೇಶನಲ್ ಕೊಲಾಬರೇಶನ್‌ ನಿರ್ದೇಶಕ ಡಾ|ರಘು, ಎಂಸಿಎಚ್ಪಿ ಡೀನ್‌ ಡಾ| ಜಿ. ಅರುಣ್‌ ಮಯ್ಯ, ಐಯುಪಿಯುಐ ಹಿರಿಯ ಕಾರ್ಯ ನಿರ್ವಾಹಕ ಸಹ ಡೀನ್‌ ಡಾ| ಪಳಕಳ ಮ್ಯಾಥ್ಯೂ ಉಪಸ್ಥಿತರಿದ್ದರು.

ಹೆಲ್ತ್ ಇನ್‌ಫಾರ್ಮೇಶನ್‌ ಮ್ಯಾನೇಜ್ಮೆಂಟ್ ಪ್ರೊಗ್ರಾಮ್‌ನಲ್ಲಿ ಪದವಿ ಪಡೆಯುವ ವಿದ್ಯಾರ್ಥಿಗಳಿಗೆ ಜಾಗತಿಕ ಪ್ರಮಾಣೀಕರಣವನ್ನು ಒದಗಿಸುವ ಕುರಿತು ಮತ್ತು ಅಂತಿಮ ವರ್ಷದ ಅಧ್ಯಯನವನ್ನು ಐಯುಪಿಯುಐ ಕ್ಯಾಂಪಸ್‌ನಲ್ಲಿ ನಡೆಸಲು ಒಪ್ಪಂದಕ್ಕೆ ಬರಲಾಗಿದೆ. ಇದಲ್ಲದೆ ವಿದ್ಯಾರ್ಥಿಗಳಿಗೆ ಸ್ನಾತ ಕೋತ್ತರ ಪದವಿ ಪಡೆಯಲೂ ಸಹಕಾರಿಯಾಗಲಿದೆ.