ಶಾಸಕರೊಂದಿಗೆ ಬಿಲಿಯರ್ಡ್ಸ್‌ ಆಡಿದ ಮಹೇಂದ್ರ ಸಿಂಗ್‌ಧೋನಿ

ರಾಂಚಿ: ಟೀಮ್‌ ಇಂಡಿಯಾದ ಮಾಜಿ ಕಪ್ತಾನ ಮಹೇಂದ್ರ ಸಿಂಗ್‌ ಧೋನಿ ಈಗ ಎಲ್ಲಿ ಇದ್ದಾರೆ, ಏನು ಮಾಡುತ್ತಿದ್ದಾರೆ ಎಂಬುದು ಕ್ರಿಕೆಟ್‌ ಅಭಿಮಾನಿಗಳ ಕುತೂಹಲ. ವಿಶ್ವಕಪ್‌ ಸೆಮಿಫೈನಲ್‌ ಸೋಲಿನ ಬಳಿಕ ಟೀಮ್‌ ಇಂಡಿಯಾದಿಂದ ಬೇರ್ಪಟ್ಟ ಅವರು ಸ್ವಲ್ಪ ಕಾಲ ಭಾರತೀಯ ಸೇನೆಯಲ್ಲಿ ಕರ್ತವ್ಯ ನಿಭಾಯಿಸಿದರು, ಬಳಿಕ ಅಮೆರಿಕಕ್ಕೆ ತೆರಳಿದರು. ಈಗ ಹುಟ್ಟೂರಾದ ರಾಂಚಿಗೆ ಮರಳಿದ್ದಾರೆ.

ಈ ಸಂದರ್ಭದಲ್ಲಿ ಧೋನಿ ಬಿಲಿಯರ್ಡ್ಸ್‌ ಆಡುತ್ತಿರುವ ಚಿತ್ರವೊಂದು ಜಾಲತಾಣದಲ್ಲಿ ಹರಿದಾಡುತ್ತಿದೆ. ಅವರು ಬಿಲಿ ಯರ್ಡ್ಸ್‌ ಆಡಿದ್ದು ಜಾರ್ಖಂಡ್‌ನ‌ ಬಹರಾಗೋರ ಕ್ಷೇತ್ರದ ಶಾಸಕ ಕುಣಾಲ್‌ ಸಾರಂಗಿ ಜತೆ ಎಂಬುದು ಇಲ್ಲಿನ ವಿಶೇಷ. ರಾಂಚಿಯ ಜಾರ್ಖಂಡ್‌ ಕ್ರಿಕೆಟ್‌ ಅಸೋ. (ಜೆಎಸ್‌ಸಿಎ) ಕಚೇರಿಯಲ್ಲಿ ಇವರಿಬ್ಬರ ಆಟ ನಡೆದಿತ್ತು.

ಈ ಸಂದರ್ಭದಲ್ಲಿ ಧೋನಿ, ಮಂಡಳಿಯ ಹಿರಿಯ ಕ್ಯುರೇಟರ್‌ ಬಸು ದಾ ಅವರನ್ನು ಭೇಟಿಯಾದರು. ಇವರೊಂದಿಗೆ ತೆಗೆದ ಚಿತ್ರವನ್ನೂ ಧೋನಿ ಪೋಸ್ಟ್‌ ಮಾಡಿದ್ದಾರೆ.