Maharashtra: ವಾಣಿಜ್ಯ ವಾಹನಗಳಿಗೂ ಇನ್ನು ಡೀಲರ್‌ಗಳಿಂದಲೇ ನೋಂದಣಿ

ಮುಂಬೈ: ಮಹಾರಾಷ್ಟ್ರದಲ್ಲಿ ಟೂರಿಸ್ಟ್‌ ಟ್ಯಾಕ್ಸಿ, ಗೂಡ್ಸ್‌ ಆಟೋ ರಿಕ್ಷಾ, ಪಿಕಪ್‌ ವಾಹನ ಸೇರಿದಂತೆ 7,500 ಕೆಜಿಗಿಂತ ಕಡಿಮೆ ತೂಕ ಸಾಮರ್ಥ್ಯವಿರುವ ವಾಣಿಜ್ಯ ವಾಹನಗಳನ್ನು ನೋಂದಾಯಿಸಲು ಇನ್ನುಮುಂದೆ ಆರ್‌ಟಿಒ ಕಚೇರಿಗೆ ಹೋಗಬೇಕಾದ ಅನಿವಾರ್ಯತೆ ಇಲ್ಲ.

ಬದಲಿಗೆ ಆಟೊಮೊಬೈಲ್‌ ಡೀಲರ್‌ಗಳೇ ಇವುಗಳನ್ನು ನೋಂದಾಯಿಸಬಹುದು ಎಂದು ಅಧಿಕಾರಿಗಳು ಶುಕ್ರವಾರ ಹೇಳಿದ್ದಾರೆ. ಆದರೆ, ಮೀಟರ್‌ ಟ್ಯಾಕ್ಸಿಗಳಿಗೆ ಈ ಬದಲಾವಣೆ ಅನ್ವಯಿಸುವುದಿಲ್ಲ. ಸರ್ಕಾರದ ಈ ಕ್ರಮವನ್ನು ವಾಣಿಜ್ಯ ಸಾಗಣೆದಾರರು ಸ್ವಾಗತಿಸಿದ್ದು, ಇದರಿಂದ ತಮ್ಮ ಸಮಯ, ಹಣ ಉಳಿಯುವುದರ ಜತೆಗೆ ಆರ್‌ಟಿಒ ಕಚೇರಿಗಳಲ್ಲಿ ಎದುರಾಗುತ್ತಿದ್ದ ಅನಗತ್ಯ ಸಮಸ್ಯೆಗಳಿಂದಲೂ ಮುಕ್ತಿ ಸಿಕ್ಕಿದಂತಾಗಿದೆ ಎಂದಿದ್ದಾರೆ.

ಇಲ್ಲಿಯವರೆಗೆ ಮಹಾರಾಷ್ಟ್ರದಲ್ಲಿ ಆಟೊಮೊಬೈಲ್‌ ಡೀಲರ್‌ಗಳು ಖಾಸಗಿ ಕಾರ್‌, ದ್ವಿಚಕ್ರ ವಾಹನಗಳು ಸೇರಿದಂತೆ ವಾಣಿಜ್ಯೇತರ ವಾಹನಗಳನ್ನು ಮಾತ್ರ ನೋಂದಾಯಿಸಲು ಅವಕಾಶ ನೀಡಲಾಗಿತ್ತು.