Advertisement
ಸಾಬೂನಿನಲ್ಲಿ ಅದ್ಭುತ ಕಲಾಕೃತಿ ರಚಿಸಿದವರು ಪುತ್ತೂರು ತಾಲೂಕು ಮುರ ನಿವಾಸಿ ರಂಜಿತ್‌ ಗೌಡ. ಮುರ ಸ.ಹಿ.ಪ್ರಾ. ಶಾಲೆಯಲ್ಲಿ ಪ್ರಾಥಮಿಕ ಶಿಕ್ಷಣ ಪಡೆದ ಅವರು, ಕೊಂಬೆಟ್ಟು ಸರಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಪ್ರೌಢ ಹಾಗೂ ಕಾಲೇಜು ಶಿಕ್ಷಣವನ್ನು ಪಡೆದಿದ್ದಾರೆ. ಶಾಲೆ-ಕಾಲೇಜು ದಿನಗಳಲ್ಲೇ ಕಲಾಕೃತಿಗಳನ್ನು ರಚಿಸುವ ಆಸಕ್ತಿ, ಕೌಶಲ ಬೆಳೆಸಿಕೊಂಡ ಅವರು ಅದನ್ನೇ ಹವ್ಯಾಸವಾಗಿ ರೂಢಿಸಿಕೊಂಡರು.
ರಂಜಿತ್‌ ಅವರು ಸಂತೂರ್‌ ಸೋಪ್‌ ಮೂಲಕ ಪ್ರಸಿದ್ಧ ವ್ಯಕ್ತಿಗಳ ಕಲಾಕೃತಿ ಮತ್ತು ಪಕ್ಷಿ, ಪ್ರಾಣಿ, ದೇವರ ಮೂರ್ತಿಯನ್ನು ರಚಿಸಿ, ಚಿತ್ರಗಳನ್ನು ತಮ್ಮ ಫೇಸ್‌ಬುಕ್‌ ಖಾತೆಯಲ್ಲಿ ಅಪ್‌ಲೋಡ್‌ ಮಾಡಿದ್ದಾರೆ. ಅದು ಅನೇಕ ಜನರ ಮೆಚ್ಚುಗೆಗೆ ಪಾತ್ರವಾಗಿದ್ದಲ್ಲದೆ, ಸ್ಫೂರ್ತಿಯನ್ನೂ ನೀಡಿದೆ. ಪುತ್ತೂರು ಮಹಾಲಿಂಗೇಶ್ವರ ದೇವರ ಕಲಾಕೃತಿಗೂ ಮೆಚ್ಚುಗೆ ವ್ಯಕ್ತವಾಗಿದೆ ಎನ್ನುತ್ತಾರೆ ರಂಜಿತ್‌.