ಮಡಿಕೇರಿ: 9 ವರ್ಷಗಳ ಬಳಿಕ ಕುಟುಂಬ ಸೇರಿದ ಹರಿಯಾಣದ ಮಹಿಳೆ

ಮಡಿಕೇರಿ: ಮಾನಸಿಕ ಸಮಸ್ಯೆಯಿಂದಾಗಿ 9 ವರ್ಷಗಳ ಹಿಂದೆ ಕುಟುಂಬದವರಿಂದ ದೂರವಾಗಿ ನಗರದ ತ್ಯಾಗರಾಜ ಕಾಲನಿಯಲ್ಲಿರುವ “ತಣಲ್‌’ ಆಶ್ರಮದ ಪ್ರಯತ್ನದಿಂದ ಹರಿಯಾಣ ಮೂಲದ ಮಹಿಳೆಯೊಬ್ಬರು ಪತಿಯ ಜತೆಗೆ ತೆರಳಿದ್ದಾರೆ.

ಹರಿಯಾಣದ ದರ್ಶನ 4 ವರ್ಷಗಳಿಂದ “ತಣಲ್‌’ ಆಶ್ರಮದಲ್ಲಿ ಆಶ್ರಯ ಪಡೆದು ಮಾನಸಿಕವಾಗಿ ಸಮಸ್ಯೆಯಿಂದ ಚೇತರಿಸಿಕೊಂಡಿದ್ದಾರೆ. ಅವರಿಗೆ 32 ವರ್ಷಗಳ ಹಿಂದೆ ದಿಲ್ಲಿಯ ಲೆಹರ್‌ ಸಿಂಗ್‌ ಜತೆಗೆ ವಿವಾಹವಾಗಿತ್ತು. ಸಮಸ್ಯೆಗಳ ನಡುವೆ ದಿಲ್ಲಿಯಲ್ಲಿ ಐವರು ಮಕ್ಕಳೊಂದಿಗೆ ಜೀವನ ನಡೆಸುತ್ತಿದ್ದರು. 9 ವರ್ಷಗಳ ಹಿಂದೆ ಮನೆಯಿಂದ ನಾಪತ್ತೆಯಾಗಿದ್ದ ಅವರನ್ನು ಕುಟುಂಬದವರು ಎಷ್ಟೇ ಹುಡುಕಾಡಿದರು ಪತ್ತೆಯಾಗಿರಲಿಲ್ಲ.

2018ರ ಜುಲೈಯಲ್ಲಿ ಕುಶಾಲನಗರದಲ್ಲಿ ಮಾನಸಿಕ ಸಮಸ್ಯೆಯಿಂದ ಬಳಲುತ್ತಿದ್ದ ಮಹಿಳೆಯನ್ನು ಕಂಡ ಪೊಲೀಸರು ತಣಲ್‌ ಅಶ್ರಮವನ್ನು ಸಂಪರ್ಕಿಸಿ ಆಶ್ರಯ ನೀಡುವಂತೆ ಮನವಿ ಮಾಡಿದ್ದರು.