ಟೀಂ ಇಂಡಿಯಾದ ಕ್ವಾರಂಟೈನ್ ಗೆ ಆಸ್ಟ್ರೇಲಿಯದಲ್ಲಿ ಐಷಾರಾಮಿ ಹೋಟೆಲ್

ಸಿಡ್ನಿ: ವೇಳಾಪಟ್ಟಿ ಪ್ರಕಾರ ಮುಂದಿನ ತಿಂಗಳು ಭಾರತ ಕ್ರಿಕೆಟ್‌ ತಂಡ ಆಸ್ಟ್ರೇಲಿಯ ಪ್ರವಾಸಕ್ಕೆ ಹೊರಡಬೇಕಿದೆ. ಕೋವಿಡ್-19 ಸೋಂಕು ಕಡಿಮೆಯಾಗಿ ಆಸೀಸ್‌ ಪ್ರವಾಸಕ್ಕೆ ಭಾರತ ತಂಡ ಸರಣಿ ಆಡುವುದಕ್ಕೆ ತೆರಳಿದರೆ ಭಾರತ ಕ್ರಿಕೆಟಿಗರಿಗೆ ಪ್ರತ್ಯೇಕವಾಗಿರುವುದಕ್ಕೆ ಒಂದು ಐಷಾರಾಮಿ ವ್ಯವಸ್ಥೆ ಮಾಡಲಾಗಿದೆ.

ಆಸೀಸ್‌ನ ಐಷಾರಾಮಿ ಹೋಟೆಲ್‌ ಒಂದನ್ನು ಇದಕ್ಕಾಗಿ ಸಜ್ಜು ಮಾಡಲಾಗಿದೆ. ಅದು ಅಡಿಲೇಡ್‌ ಓವೆಲ್‌ನ ಹೊಸ ಐಷಾರಾಮಿ ಹೋಟೆಲ್‌ ಆಗಿದೆ. ಬರೋಬ್ಬರಿ ಆ ಹೋಟೆಲ್‌ನ ಒಟ್ಟು ಬೆಲೆ 322 ಕೋಟಿ ರೂ. ಎಂದು ಅಂದಾಜಿಸಲಾಗಿದೆ.

ಆಸೀಸ್‌ ಕ್ರಿಕೆಟ್‌ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿ ಕೆವಿನ್‌ ರಾಬರ್ಟ್ಸ್, ವಿರಾಟ್‌ ಕೊಹ್ಲಿ ಪಡೆಗೆ ಇಂತಹದೊಂದು ಸುಸಜ್ಜಿತ ಹೋಟೆಲ್‌ ಕೊಡುವ ಬೇಡಿಕೆಯನ್ನು ಇಟ್ಟಿದ್ದಾರೆ. ಅದಲ್ಲದೇ ಕಾಂಗರೂ ಐಸ್‌ಲೆಂಡ್‌ ಹಾಗೂ ರಾಟೆಸ್ಟ್‌ ಐಸ್‌ಲೆಂಡ್‌ ಅನ್ನು ಆಯ್ಕೆಯಾಗಿ ಇರಿಸಲಾಗಿದೆ ಎನ್ನಲಾಗಿದೆ.

ಭಾರತ ಪ್ರವಾಸಕ್ಕೆ ತೆರಳಿದರೆ 14 ದಿನ ಪ್ರತ್ಯೇಕವಾಗಿರಬೇಕಾಗುತ್ತದೆ. ಅದಕ್ಕಾಗಿಯೇ ಈ ವ್ಯವಸ್ಥೆ. ಇಷ್ಟೆಲ್ಲ ಮಾಡಿದರೂ ಭಾರತ ಅಲ್ಲಿಗೆ ತೆರಳುವುದು ಮಾತ್ರ ಅನುಮಾನ.