ಈ ಶಾಲಾ ಸಮೂಹದಲ್ಲಿದ್ದಾರೆ ಬರೋಬ್ಬರಿ 50 ಸಾವಿರ ಮಕ್ಕಳು!

ಲಕ್ನೋ: ಇಲ್ಲಿನ ಶಾಲಾ ಸಮೂಹ ಈಗ ಗಿನ್ನೆಸ್‌ ದಾಖಲೆ ಪುಸ್ತಕಕ್ಕೆ ಸೇರಿದೆ. ಕಾರಣ ಮಕ್ಕಳ ಸಂಖ್ಯೆ. ಮಕ್ಕಳ ಸಂಖ್ಯೆಯನ್ನು ಕೇಳಿದರೆ ಬೆಚ್ಚಿ ಬೀಳಬೇಕು. ಬರೋಬ್ಬರಿ 55,547 ಮಕ್ಕಳು ಇಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ.

ಜಗದೀಶ್‌ ಗಾಂಧಿ ಎನ್ನುವವರು ಸಿಟಿ ಮಾಂಟೆಸ್ಸರಿ ಸ್ಕೂಲ್‌ ಹೆಸರಿನ ಈ ಶಾಲೆಯನ್ನು ಆರಂಭಿಸಿದ್ದು, ಆಗ ಐವರು ಮಕ್ಕಳಿದ್ದರಂತೆ. ಈಗ ವಿವಿಧ ಶಾಖೆಗಳು ಸೇರಿ ಒಟ್ಟು 50 ಸಾವಿರ ದಾಟಲು ವಿದ್ಯಾರ್ಥಿಗಳು ಹೆತ್ತವರು ಕಾರಣರಾಗಿದ್ದಾರೆ ಎಂದು ಗಾಂಧಿ ಹೇಳಿದ್ದಾರೆ. ಇದರಿಂದ ಶಾಲೆ ಜಗತ್ತಿನಲ್ಲೇ ಅತಿ ಹೆಚ್ಚು ಮಕ್ಕಳಿರುವ ಶಾಲೆಯಾಗಿ ಗುರುತಿಸಲ್ಪಟ್ಟಿದೆ.

ಈ ಶಾಲೆಯಲ್ಲಿ ಬಹು ವಿಧದ ಕಲಿಕೆಯಿದ್ದು, ಮಕ್ಕಳ ಸರ್ವತೋಮುಖ ಬೆಳವಣಿಗೆ ಗುರಿಯಾಗಿದೆಯಂತೆ, ದೈಹಿಕ, ಆಧ್ಯಾತ್ಮಿಕ, ಶೈಕ್ಷಣಿಕ ಉನ್ನತಿಗೆ ಉತ್ತಮ ವ್ಯವಸ್ಥೆಗಳು, ಜಾಗತಿಕ ಮಟ್ಟದ ಪರೀಕ್ಷೆಗಳಿಗೆ ಸಿದ್ಧವಾಗಲು ತರಬೇತಿ ಇತ್ಯಾದಿಗಳು ಇವೆಯಂತೆ. ಸಿಎಮ್‌ಎಸ್‌ ಶಾಲೆ ಒಟ್ಟು 18 ಶಾಖೆಗಳನ್ನು ಲಕ್ನೋ ನಗರದಾದ್ಯಂತ ಹೊಂದಿದೆ.