ನದಿ ವಿವಾದ ವಿಧೇಯಕಕ್ಕೆ ‘ಲೋಕ’ಸಮ್ಮತಿ

ನವದೆಹಲಿ: ದೇಶದ ಎಲ್ಲಾ ನದಿ ವಿವಾದಗಳನ್ನು ತ್ವರಿತವಾಗಿ ಇತ್ಯರ್ಥಗೊಳಿಸುವ ಉದ್ದೇಶದಿಂದ ಕೈಗೊಳ್ಳಲಾಗುವ ‘2019ರ ಅಂತರರಾಜ್ಯ ನದಿ ನೀರು ವ್ಯಾಜ್ಯ ತಿದ್ದುಪಡಿ ಮಸೂದೆ’ಗೆ ಲೋಕಸಭೆ ಒಪ್ಪಿಗೆ ನೀಡಿದೆ. ಈ ಮಸೂದೆಯ ಮೂಲಕ, ಜ್ವಲಂತವಾಗಿರುವ ಕಾವೇರಿ, ಮಹದಾಯಿ, ರವಿ ಮತ್ತು ಬೀಸ್‌, ವಂಸಧಾರಾ ಹಾಗೂ ಕೃಷ್ಣಾ ನದಿ ಜಲ ವಿವಾದಗಳು ತ್ವರಿತವಾಗಿ ಇತ್ಯರ್ಥವಾಗುವ ಆಶಾಭಾವನೆಯನ್ನು ಕೇಂದ್ರ ಕ್ರಮ ಕೈಗೊಂಡಿದೆ.

ಮಸೂದೆ ಮಂಡನೆಯಾದಾಗ ನಡೆದ ಚರ್ಚೆಯ ವೇಳೆ, ಕಾಂಗ್ರೆಸ್‌ನ ಮನೀಶ್‌ ತಿವಾರಿಯವರು, ನದಿ ವ್ಯಾಜ್ಯಗಳ ತೀರ್ಮಾನದಲ್ಲಿ ಸಂಬಂಧಪಟ್ಟ ರಾಜ್ಯಗಳ ಸಲಹೆಗಳನ್ನು ಕೇಳುವಂಥ ಅಂಶವು ಈ ಮಸೂದೆಯಲ್ಲಿ ಉಲ್ಲೇಖೀಸಲಾಗಿಲ್ಲ. ಇದು ಸಂವಿಧಾನಕ್ಕೆ ವಿರೋಧವಾದದ್ದು ಎಂದು ಆಕ್ಷೇಪಿಸಿದರು. ಅಲ್ಲದೆ, ಜಲವಿವಾದ ನ್ಯಾಯಾಧೀಕರಣದ ಸದಸ್ಯರ ಆಯ್ಕೆ ಸಮಿತಿಯಲ್ಲಿ ರಾಜ್ಯಸಭೆಯ ವಿಪಕ್ಷ ನಾಯಕರು ಅಥವಾ ಲೋಕಸಭೆಯ ವಿಪಕ್ಷ ನಾಯಕರಿಗೆ ಅವಕಾಶ ಕಲ್ಪಿಸಬೇಕಿತ್ತು ಎಂದು ಆಗ್ರಹಿಸಿದರು. ಕರ್ನಾಟಕ, ತಮಿಳುನಾಡು ಸಂಸದರು ಕಾವೇರಿ ವಿವಾದ ಕುರಿತಂತೆ ಪರಸ್ಪರ ವಾಗ್ವಾದ ನಡೆಸಿದರು. ಆಗ, ಮಧ್ಯಪ್ರವೇಶಿಸಿದ ಸ್ಪೀಕರ್‌ ಓಂ ಬಿರ್ಲಾ, ‘ಇದು ನಿಮ್ಮ ರಾಜ್ಯಗಳ ವಿಧಾನಸಭೆಯಲ್ಲ’ ಎಂದು ಹೇಳಿ ಪರಿಸ್ಥಿತಿಯನ್ನು ತಿಳಿಗೊಳಿಸಿದರು.

ಮೊದಲ ಸಾಲಿನ ಆಸನ: ಲೋಕಸಭೆಯಲ್ಲಿ, ಸಂಸದರ ಸಾಂವಿಧಾನಿಕ ಹುದ್ದೆಗಳ ಪ್ರಾಮುಖ್ಯತೆಯ ಆಧಾರದಲ್ಲಿ ಆಸನಗಳ ಮರು ಹಂಚಿಕೆ ಮಾಡಲಾಗಿದೆ. ಹೊಸ ಹಂಚಿಕೆಯ ಪ್ರಕಾರ, ಪ್ರಧಾನಿ ನರೇಂದ್ರ ಮೋದಿ ಹಾಗೂ ಅವರ ಸಂಪುಟದ ಸದಸ್ಯರು ಹಾಗೂ ಯುಪಿಎ ಅಧ್ಯಕ್ಷ ಸೋನಿಯಾ ಗಾಂಧಿಯವರು ಮೊದಲ ಸಾಲಿನ ಆಸನಗಳಲ್ಲಿ ಕೂರಲು ಅವಕಾಶ ಕಲ್ಪಿಸಲಾಗಿದೆ. ಇದರಿಂದ, ಇದೇ ಮೊದಲ ಬಾರಿಗೆ ಲೋಕಸಭಾ ಸದಸ್ಯರಾಗಿರುವ ಅಮಿತ್‌ ಶಾ, ರವಿಶಂಕರ್‌ ಪ್ರಸಾದ್‌, ಸ್ಮತಿ ಇರಾನಿ ಅವರಿಗೆ ಮೊದಲ ಸಾಲಿನಲ್ಲೇ ಕುಳಿತುಕೊಳ್ಳುವ ಅವಕಾಶ ಸಿಕ್ಕಿದೆ. ಕಾಂಗ್ರೆಸ್‌ ನಾಯಕ ರಾಹುಲ್ ಗಾಂಧಿಯವರಿಗೆ ಈ ಹಿಂದಿದ್ದ 2ನೇ ಸಾಲಿನ ಆಸನವನ್ನೇ ನೀಡಲಾಗಿದೆ.