ಇವರಿಗೆ ವಯಸ್ಸೇ ಆಗೋಲ್ವಾ?

ಹಳೆಯ ಆಲ್ಬಂಗಳು, ಸಿಹಿ ನೆನಪಿನ ಕಣಜಗಳು. ಸರಿದು ಹೋದ ಸಮಯವನ್ನು ತಮ್ಮೊಳಗೆ ಬಚ್ಚಿಟ್ಟುಕೊಂಡು, “ನೋಡೇ, ನಿಂಗ್‌ ವಯಸ್ಸಾಯ್ತು’ ಅಂತ ನೆನಪಿಸುತ್ತಲೇ, “ಕಾಲಾಯ ತಸ್ಮೈ ನಮಃ’ ಅನ್ನುತ್ತವೆ. ಜಾಸ್ತಿ ಬೇಡ, ಐದು ವರ್ಷ ಹಳೆಯ ಆಲ್ಬಮ್ಮನೊಮ್ಮೆ ತಿರುವಿ ಹಾಕಿ. ಎಷ್ಟೊಂದು ಬದಲಾವಣೆಗಳಾಗಿವೆ. ಸೊಂಪಾಗಿದ್ದ ಕೂದಲು ಉದುರಿದೆ, ತಿಂಗಳಿಗೊಮ್ಮೆ ಮದರಂಗಿಯನ್ನೋ, ಹೇರ್‌ ಡೈಯನ್ನೋ ಹಚ್ಚಲೇಬೇಕು, ಮುಂಚೆ ಹೊಳೆಯುತ್ತಿದ್ದ ಕಂಗಳ ಕೆಳಗೆ ಈಗ ಕಪ್ಪು ವರ್ತುಲ, ಟೈಟ್‌ ಜೀನ್ಸ್‌- ಶಾರ್ಟ್‌ ಟಾಪ್‌ ಹಾಕುತ್ತಿದ್ದವಳು ನಾನೇನಾ ಅಂತ ಹುಬ್ಬೇರಿಸುವಂತೆ ಹೆಚ್ಚಿದ ಮೈ ಸುತ್ತಳತೆ… ಇಷ್ಟು ಬೇಗ ಮುದುಕಿಯಾದೆನಾ ಅನ್ನೋ ಕೊರಗು ಕಾಡುತ್ತೆ.

ಆದರೆ, ಹೀರೋಯಿನ್‌ಗಳು 10 yearchallenge  ಅಂತ, ತಮ್ಮ ಹತ್ತು ವರ್ಷ ಹಳೆಯ ಫೋಟೊಗಳನ್ನು ಶೇರ್‌ ಮಾಡುತ್ತಿದ್ದಾರೆ. “ಹೀಗಿದ್ದೆ, ಹೀಗಾದೆ ಗೊತ್ತಾ?’ ಅಂತ ಹೇಳ್ಳೋ ಅವರಲ್ಲಿ ಏನೂ ಬದಲಾವಣೆಗಳೇ ಕಾಣಿಸುತ್ತಿಲ್ಲ. ಹಾಗೆ ನೋಡಿದರೆ, ಮೊದಲಿಗಿಂತ ಹೆಚ್ಚು ಸುಂದರವಾಗಿ ಕಾಣಿಸ್ತಿದ್ದಾರೆ. ಹಾಗಾದ್ರೆ, ಕಾಲನ ಆಟ ಇವರ ಮೇಲೆ ನಡೆಯೋದೇ ಇಲ್ವಾ? ಇವರಿಗೆಲ್ಲ ವಯಸ್ಸೇ ಆಗೋದಿಲ್ವಾ? ನಿಮಗೆ ಈ ಫೋಟೋಗಳು ಖಂಡಿತಾ ಚಾಲೆಂಜ್‌ಗೆ ತಳ್ಳುತ್ತವೆ.