ಹಿಮನದಿಯಲ್ಲಿ ನಿಶ್ಚಲವಾಗಿದ್ದ ಕೀಟಕ್ಕೆ ಜೀವದಾನ!

ವಾಷಿಂಗ್ಟನ್‌: ಬರೋಬ್ಬರಿ 46 ಸಾವಿರ ವರ್ಷಗಳಿಂದಲೂ ಸೈಬೀರಿಯದ ಶಾಶ್ವತ ಹಿಮನದಿಯಲ್ಲಿ ಹೆಪ್ಪುಗಟ್ಟಿದ ಸ್ಥಿತಿಯಲ್ಲಿದ್ದ ಹುಳವೊಂದಕ್ಕೆ ಈಗ ರಷ್ಯಾದ ವಿಜ್ಞಾನಿಗಳು ಜೀವ ನೀಡಿದ್ದಾರೆ! ರಷ್ಯಾದ ಇನ್‌ಸ್ಟಿಟ್ಯೂಟ್‌ ಆಫ್ ಫಿಸಿಯೋಕೆಮಿಕಲ್‌ ಆ್ಯಂಡ್‌ ಬಯಾಲಜಿಕಲ್‌ ಪ್ರಾಬ್ಲಿಮ್ಸ್‌ ಇನ್‌ ಸಾಯಿಲ್‌ನ ವಿಜ್ಞಾನಿಗಳು 2018ರಲ್ಲಿ ಹಿಮನದಿಯಲ್ಲಿದ್ದ ಅಪರಿಚಿತ ಪ್ರಭೇದಗಳಿಗೆ ಸೇರಿದ ತೆಳ್ಳಗಿನ ಉರುಳೆಯಾಕಾರದ ಎರಡು ಕೀಟಗಳನ್ನು (ನೆಮಟೋಡ್‌) ಪತ್ತೆಹಚ್ಚಿದ್ದರು. ವಿಜ್ಞಾನಿ ಅನಸ್ತೇಸಿಯಾ ಶಟಿಲೋವಿಚ್‌ ಅವರು ಈ ಪೈಕಿ ಒಂದಕ್ಕೆ ಮರುಜೀವ ನೀಡಿದ್ದಾರೆ. ನಂತರ ಅದನ್ನು ಹೆಚ್ಚಿನ ಅಧ್ಯಯನಕ್ಕಾಗಿ ಜರ್ಮನಿಗೆ ಒಯ್ದಿದ್ದಾರೆ.

ಹಿಮನದಿಯ ಸುತ್ತಮುತ್ತಲಿನ ಸಸ್ಯಗಳ ರೇಡಿಯೋಕಾರ್ಬನ್‌ ಡೇಟಿಂಗ್‌ ನಡೆಸುವ ಮೂಲಕ ವಿಜ್ಞಾನಿಗಳು, ಅಲ್ಲಿ ಕಂಡುಬಂದಿರುವ ಕೀಟಗಳು ಸುಮಾರು 45,839ರಿಂದ 47,769 ವರ್ಷಗಳಷ್ಟು ಹಳೆಯವು ಎಂದು ಅಂದಾಜಿಸಿದ್ದಾರೆ. ಇಷ್ಟು ವರ್ಷಗಳ ಕಾಲ ಆ ಹುಳಗಳು ಬದುಕುಳಿದಿದ್ದಾದರೂ ಹೇಗೆ ಎಂಬ ಪ್ರಶ್ನೆಗೂ ಅವರು ಉತ್ತರಿಸಿದ್ದಾರೆ. ಈ ಹುಳಗಳು ಇಷ್ಟು ವರ್ಷ ನಿಶ್ಚಲ ಸ್ಥಿತಿಯಲ್ಲೇ ಇದ್ದವು. ಈ ಸ್ಥಿತಿಯನ್ನು ಕ್ರಿಪ್ಟೋಬಯಾಸಿಸ್‌ ಎನ್ನುತ್ತಾರೆ. ಕ್ರಿಪ್ಟೋಬಯಾಸಿಸ್‌ ಎಂದರೆ ಚಯಾಪಚಯ ಚಟುವಟಿಕೆಯು ಸಂಪೂರ್ಣವಾಗಿ ಕಣ್ಮರೆಯಾಗದೇ ಪತ್ತೆಹಚ್ಚಲಾಗದ ಮಟ್ಟಕ್ಕೆ ಕಡಿಮೆಯಾಗಿರುವಂಥ ಒಂದು ಶಾರೀರಿಕ ಸ್ಥಿತಿ. ವಿಪರೀತ ಶುಷ್ಕ ವಾತಾವರಣವಿದ್ದಾಗ ಕೆಲವೊಂದು ಪ್ರಾಣಿ ಅಥವಾ ಸಸ್ಯಗಳು ಬದುಕಲು ಇಂಥದ್ದೊಂದು ಸ್ಥಿತಿಗೆ ಹೊಂದಿಕೊಂಡಿರುತ್ತವೆ.

ಒಟ್ಟಿನಲ್ಲಿ ಈ ಕೀಟಗಳ ಮೇಲೆ ನಡೆದ ಸಂಶೋಧನೆಯು “ಒಂದು ಜೀವಿಯು ತನ್ನ ಬದುಕನ್ನು ಸ್ಥಗಿತಗೊಳಿಸಿ, ಮತ್ತೆ ಮೊದಲಿನಿಂದ ಅದನ್ನು ಪ್ರಾರಂಭಿಸಬಹುದು ಎಂಬುದನ್ನು ತೋರಿಸಿಕೊಟ್ಟಿದೆ’ ಎಂದಿದ್ದಾರೆ ವಿಜ್ಞಾನಿಗಳು. ವಿಪರೀತ ಎನ್ನುವಂಥ ಸ್ಥಿತಿಗೂ ಜೀವಿಗಳು ಒಗ್ಗಿಕೊಳ್ಳುತ್ತವೆ ಎನ್ನುವುದು ಈ ಕೀಟಗಳ ಸಂಶೋಧನೆಯಿಂದ ತಿಳಿದುಬಂದಿದೆ. ಮುಂದಿನ ದಿನಗಳಲ್ಲಿ ಇತರೆ ಜೀವಿಗಳು ಅಥವಾ ಮನುಷ್ಯರಿಗೂ ಇದು ನೆರವಾಗಬಲ್ಲದು ಎಂದೂ ಅವರು ಹೇಳಿದ್ದಾರೆ.