ಪಾಕ್‌ ಸೇನೆಯಿಂದ ಹತ್ಯೆಗೀಡಾದವರಿಗೆ ಶ್ರದ್ಧಾಂಜಲಿ ಸಲ್ಲಿಸೋಣ: ವಿಶ್ವಸಂಸ್ಥೆ

ವಿಶ್ವಸಂಸ್ಥೆ: “1971ರ ವಿಮೋಚನಾ ಯುದ್ಧವು ಮಾನವನ ಇತಿಹಾಸದಲ್ಲೇ ಅತ್ಯಂತ ಘೋರ ಅಧ್ಯಾಯವಾಗಿದ್ದು, ಪಾಕಿಸ್ಥಾನದ ಸೇನೆ ಮತ್ತು ಧಾರ್ಮಿಕ ಉಗ್ರವಾದಿಗಳಿಂದ ಅತ್ಯಾ ಚಾರಕ್ಕೀಡಾದ 2 ಲಕ್ಷಕ್ಕೂ ಅಧಿಕ ಮಹಿಳೆಯರು ಮತ್ತು ಹತ್ಯೆಗೀಡಾದ 30 ಲಕ್ಷ ಜನರಿಗೆ ನಾವೆಲ್ಲರೂ ಶ್ರದ್ಧಾಂಜಲಿ ಸಲ್ಲಿಸಬೇಕಾಗಿದೆ.’

ವಿಶ್ವಸಂಸ್ಥೆಯು “ಅಂತಾರಾಷ್ಟ್ರೀಯ ನರಮೇಧಗಳ ಸಂತ್ರಸ್ತರ ದಿನ’ವನ್ನು ಆಚರಿಸುತ್ತಿರುವ ಹಿನ್ನೆಲೆಯಲ್ಲಿ ಬುಧವಾರ ವಿಶ್ವಸಂಸ್ಥೆಯಲ್ಲಿನ ಭಾರತದ ಶಾಶ್ವತ ರಾಯಭಾರಿ ಟಿ.ಎಸ್‌.ತಿರುಮೂರ್ತಿ “ಪ್ರಿವೆಂಟ್‌ ಜೆನೋಸೈಡ್‌’ ಎಂಬ ಹ್ಯಾಷ್‌ಟ್ಯಾಗ್‌ನಡಿ ಈ ರೀತಿ ಟ್ವೀಟ್‌ ಮಾಡಿದ್ದಾರೆ.

ನರಮೇಧಗಳ ಸಂತ್ರಸ್ತರ ದಿನದ ಹಿನ್ನೆಲೆಯಲ್ಲಿ ಮಾತನಾಡಿರುವ ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೋ ಗುಟೆರಸ್‌, “ನರಮೇಧ ಎನ್ನುವುದು ಅತ್ಯಂತ ಬೀಭತ್ಸ ಅಪರಾಧವಾಗಿದ್ದು, ಇದು ದ್ವೇಷದ ಸುನಾಮಿಯನ್ನು ಎಬ್ಬಿಸಿ, ನಾಶದಲ್ಲಿ ಕೊನೆ ಗೊಳ್ಳುವಂಥದ್ದು. ಇದು ನಮ್ಮ ಮೂಲಭೂತ ಮೌಲ್ಯಗಳ ಮೇಲಿನ ಹಲ್ಲೆಯೂ ಹೌದು’ ಎಂದು ಅಭಿಪ್ರಾಯಪಟ್ಟಿದ್ದಾರೆ.