Politics: “ನೈಸ್‌” ತಂದವರ ಬಗ್ಗೆಯೂ ಚರ್ಚೆಯಾಗಲಿ: ಎನ್‌.ಚಲುವರಾಯಸ್ವಾಮಿ

ಬೆಂಗಳೂರು: ರಾಜ್ಯದಲ್ಲಿ ನೈಸ್‌ ಯೋಜನೆ ಜಾರಿಗೆ ತಂದವರು ಯಾರು? ಪ್ರಾರಂಭ ಮಾಡಿದವರು ಯಾರು ? ಎಂಬುದೂ ಚರ್ಚೆಯಾಗಲಿ. ಕುಮಾರಸ್ವಾಮಿಯವರಿಗೆ ನೈಸ್‌ ವಿಚಾರ ಮಾತ್ರ ಸಾರ್ವಜನಿಕ ಹಿತದೃಷ್ಟಿಯ ಸಂಗತಿಯೇ ಎಂದು ಕೃಷಿ ಸಚಿವ ಎನ್‌.ಚಲುವರಾಯಸ್ವಾಮಿ ಪ್ರಶ್ನಿಸಿದ್ದಾರೆ.

ಸುದ್ದಿಗಾರರ ಜತೆ ಮಾತನಾಡಿದ ಅವರು, ಈ ಯೋಜನೆ ಪ್ರಾರಂಭ ಮಾಡಿದವರು ಯಾರು ಎಂಬುದೂ ಚರ್ಚೆಯಾಗಬೇಕು. ಕುಮಾರಸ್ವಾಮಿ ಮುಖ್ಯಮಂತ್ರಿಯಾಗಿದ್ದ ಸಂದರ್ಭದಲ್ಲಿ ಈ ಬಗ್ಗೆ ಮಾತನಾಡಬಹುದಿತ್ತಲ್ಲ? ರಾಜ್ಯದಲ್ಲಿ ಅದೆಷ್ಟೋ ರಸ್ತೆಗಳಿವೆ, ಟೋಲ್‌ ವಿಚಾರಗಳಿವೆ. ಎಲ್ಲವನ್ನೂ ಬಿಟ್ಟು ನೈಸ್‌ ರೋಡ್‌ ಮಾತ್ರ ಯಾಕೆ ಹಿಡಿದುಕೊಂಡಿದ್ದಾರೆ? ನಮ್ಮ ಕಾಂಗ್ರೆಸ್‌ ಸರ್ಕಾರ ನೈಸ್‌ ಪರವಾಗಿ ಇಲ್ಲ ಎಂದು ಸ್ಪಷ್ಟಪಡಿಸಿದರು.

ನನ್ನ ವಿರುದ್ಧ ರಾಜ್ಯಪಾಲರಿಗೆ ಬರೆದ ಪತ್ರದಲ್ಲಿ ಜೆಡಿಎಸ್‌ ಹೆಸರಿರುವುದು, ಕುಮಾರಸ್ವಾಮಿ ಹೆಸರಿರುವುದು ಎಲ್ಲರಿಗೂ ಗೊತ್ತಿದೆ. ಈ ತರದ್ದೆಲ್ಲ ಎಷ್ಟು ನಡೆಸ್ತಾರೋ ನಡೆಸಲಿ. ಕೃಷಿ ಇಲಾಖೆ ಭ್ರಷ್ಟಾಚಾರದ ಆರೋಪ ತನಿಖೆ ಸಂದರ್ಭದಲ್ಲಿ ಇಬ್ಬರು ಕೃಷಿ ಅಧಿಕಾರಿಗಳ ಬಂಧನವಾಗಿದೆ. ಇದಕ್ಕೆ ಯಾರು ಕಾರಣ? ಹಿನ್ನೆಲೆ ಏನು ಗೊತ್ತಿಲ್ಲ ಎಂದರು.