ಕುರಿ ಮಂದೆ ಮೇಲೆ ಚಿರತೆ ದಾಳಿ

ಕಂಪ್ಲಿ: ತಾಲೂಕಿನ ಚಿನ್ನಾಪುರದ ಹೊರ ವಲಯದ ಪ್ರದೇಶದಲ್ಲಿ ಬೀಡು ಬಿಟ್ಟಿದ್ದ ಕುರಿ ಮಂದೆ ಮೇಲೆ ಚಿರತೆಯೊಂದು ದಾಳಿ ನಡೆಸಿ ಕುರಿಯನ್ನು ತೀವ್ರವಾಗಿ ಗಾಯಗೊಳಿಸಿದ ಘಟನೆ ನಡೆದಿದ್ದು, ಗ್ರಾಮಸ್ಥರಲ್ಲಿ ಆತಂಕ ಸೃಷ್ಟಿಸಿದೆ.

ಗ್ರಾಮದ ಕರಿಗುಡ್ಡ ಹೊಲಯದಲ್ಲಿ ಶಿವಣ್ಣ ಎನ್ನುವವರ ಜಮೀನಿನಲ್ಲಿ ಅಂಜಿನಪ್ಪ ಎಂಬುವರು 200 ಕುರಿಗಳ ಮಂದೆ ಬೀಡು ಬಿಟ್ಟಿದ್ದರು. ಈ ವೇಳೆ ಏಕಾಏಕಿ ದಾಳಿ ನಡೆಸಿದ ಚಿರತೆ ಒಂದು ಕುರಿಯ ಕೆಚ್ಚಲು ಮತ್ತು ಹೊಟ್ಟೆ ಭಾಗ ತಿಂದು ಹಾಕಿದೆ. ಈ ವೇಳೆ ಚಿರಾಡಿದ ಕುರಿಗಳ ಶಬ್ಧದಿಂದ ಎಚ್ಚೆತ್ತ ಕುರಿಗಾಹಿಗಳು ಚಿರತೆ ಓಡಿಸಿ ಕುರಿಯನ್ನು ರಕ್ಷಿಸಿದ್ದಾರೆ.

ಮೂರು ದಿನಗಳ ಹಿಂದೆಷ್ಟೆ ಇದೇ ಕರೆಗುಡ್ಡದ ಪ್ರದೇಶದ ದಾಳಿಂಬೆ ಹೊಲದಲ್ಲಿ ಚಿರತೆಯೊಂದು ಕುರಿಮರಿಯನ್ನು ಸಂಪೂರ್ಣ ತಿಂದು ಹಾಕಿತ್ತು. ಗ್ರಾಮದ ಅಕ್ಕ-ತಂಗಿ ಗುಡ್ಡದ ಬಳಿ ಮೂರು ಚಿರತೆಗಳು, ಬಿಂಚಿಮಟ್ಟಿ ಹಾಗೂ ಕರೇಗುಡ್ಡದ ಹತ್ತಿರ ಐದು ಚಿರತೆಗಳಿದ್ದು, ನಿರಂತರವಾಗಿ ಗ್ರಾಮಸ್ಥರಿಗೆ ಕಾಣಿಸಿಕೊಳ್ಳುತ್ತಿವೆ. ಅಲ್ಲದೆ, ಮೇಲಿಂದ ಮೇಲೆ ಚಿರತೆಗಳು ಜಾನುವಾರುಗಳ ಮೇಲೆ ಸರಣಿ ದಾಳಿ ನಡೆಸುತ್ತಿರುವ ಕಾರಣ ಹೊಲಗದ್ದೆಗಳಿಗೆ ತೆರಳುವ ರೈತರು ಭಯ ಭೀತರಾಗಿದ್ದಾರೆ. 

ಅರಣ್ಯ ಇಲಾಖೆ ಅಧಿಕಾರಿಗಳು ಸೂಕ್ತ ಸ್ಥಳದಲ್ಲಿ ಬೋನ್‌ ಗಳನ್ನು ಅಳವಡಿಸಿ ಚಿರತೆ ಸೆರೆ ಹಿಡಿಯಬೇಕೆಂದು ಕುರಿಗಾಹಿಗಳು ಆಗ್ರಹಿಸಿದ್ದಾರೆ.