ಲೆಜೆಂಡ್ಸ್‌ ಇಂಟರ್‌ಕಾಂಟಿನೆಂಟಲ್‌ ಟಿ20 ಲೀಗ್‌: ಬ್ರೆಟ್‌ ಲೀ,ಪಾರ್ಥಿವ್‌,ದಿಲ್ಶನ್‌ ಕಣದಲ್ಲಿ

ನವದೆಹಲಿ: ಮಾಜಿ ಕ್ರಿಕೆಟರ್‌ಗಳಾದ ಆಸ್ಟ್ರೇಲಿಯದ ಬ್ರೆಟ್‌ ಲೀ, ಇಂಗ್ಲೆಂಡಿನ ಗ್ರೇಮ್‌ ಸ್ವಾನ್‌, ಶ್ರೀಲಂಕಾದ ತಿಲಕರತ್ನೆ ದಿಲ್ಶನ್‌, ಭಾರತದ ಪಾರ್ಥಿವ್‌ ಪಟೇಲ್‌ ಅವರು ಏಳು ತಂಡಗಳ ಲೆಜೆಂಡ್ಸ್‌ ಇಂಟರ್‌ಕಾಂಟಿನೆಂಟಲ್‌ ಟಿ20 ಲೀಗ್‌ನಲ್ಲಿ ಆಡಲಿದ್ದಾರೆ. ಈ ಲೀಗ್‌ ಆ. 15ರಿಂದ 29ರ ವರೆಗೆ ಅಮೆರಿಕದ ಟೆಕ್ಸಾಸ್‌ನಲ್ಲಿ ನಡೆಯಲಿದೆ.

ಅಮೆರಿಕ ಮೂಲದ ಬ್ರೊಸಿಡ್‌ ಸ್ಪೋರ್ಟ್ಸ್ ಎಲ್‌ಎಲ್‌ಸಿ, ಈ ಸಂಬಂಧ ನವದೆಹಲಿಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಲೀಗ್‌ನ ವಿವರಗಳನ್ನು ಘೋಷಣೆ ಮಾಡಿದೆ. ಈ ವೇಳೆ ಲೀ, ಸ್ವಾನ್‌, ದಿಲ್ಶನ್‌, ಪಾರ್ಥಿವ್‌ ಪಟೇಲ್‌ ಉಪಸ್ಥಿತರಿದ್ದರು.

ಈ ಲೀಗ್‌ನಲ್ಲಿ ಏಳು ತಂಡಗಳಾದ ಇಂಡೊ ಕಿಂಗ್ಸ್‌, ಏಷ್ಯನ್‌ ಅವೆಂಜರ್, ಯುರೋ ರೇಂಜರ್, ಅಮೆರಿಕನ್‌ ಮಾವೆರಿಕ್ಸ್‌, ಟ್ರಾನ್ಸ್‌ ಟಾಸ್ಮನ್‌ ಟೈಟಾನ್ಸ್‌, ಅಫ್ರಿಕನ್‌ ಲಯನ್ಸ್‌ ಮತ್ತು ಕೆರಿಬಿಯನ್‌ ವಿಕಿಂಗ್ಸ್‌ ಪ್ರಶಸ್ತಿಗಾಗಿ ಹೋರಾಡಲಿದೆ.

ಎಲ್‌ಐಟಿ-20ಯ ಪಂದ್ಯಗಳು ಏಕ ಸುತ್ತಿನ ರೌಂಡ್‌ ರಾಬಿನ್‌ ಮಾದರಿಯಲ್ಲಿ ನಡೆಯಲಿದ್ದು ಅಗ್ರ ನಾಲ್ಕು ತಂಡಗಳು ನಾಕೌಟ್‌ ಹಂತಕ್ಕೇರಲಿವೆ. 24 ಪಂದ್ಯಗಳ ಬಳಿಕ ಆ. 27ರಂದು ಸೆಮಿಫೈನಲ್ಸ್‌ ಮತ್ತು ಆ. 28ರಂದು ಫೈನಲ್‌ ಪಂದ್ಯ ನಡೆಯಲಿದೆ.