Advertisement
ಈ ನಡುವೆ ಲಷ್ಕರ್‌ ಉಗ್ರ ಸಂಘಟನೆ ಹೇಳಿಕೆ ನೀಡಿದ್ದು, ‘ಯಾವುದೇ ಧರ್ಮದ ಮೇಲೆ ದಾಳಿ ನಡೆಸುವುದು ಇಸ್ಲಾಂ ಧರ್ಮದಲ್ಲಿಲ್ಲ. ಇಂಥ ಕುಕೃತ್ಯಗಳನ್ನು ನಾವು ಖಂಡಿಸುತ್ತೇವೆ’ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಬರೆದುಕೊಂಡಿದೆ. ಪೊಲೀಸರ ತನಿಖೆಯಿಂದ ಬಹಿರಂಗಗೊಂಡಿರುವ ಮತ್ತೂಂದು ಅಂಶವೆಂದರೆ ಹಿಜ್ಬುಲ್‌ ಮುಜಾಹಿದೀನ್‌ ಉಗ್ರ ಸಂಘಟನೆಯ ಸ್ಥಳೀಯ ನಾಯಕರೂ ದಾಳಿಗೆ ಬೆಂಬಲ ಸೂಚಿಸಿದ್ದಾರೆ. ಇದರ ಜತೆಗೆ ಲಷ್ಕರ್‌ ಸಂಘಟನೆ ಕಾಶ್ಮೀರದಲ್ಲಿ ಜೈಶ್‌-ಎ-ಮೊಹಮ್ಮದ್‌ ಉಗ್ರ ಸಂಘಟನೆಯನ್ನು ಮತ್ತೆ ಸಕ್ರಿಯಗೊಳಿಸಲು ಮುಂದಾಗಿದೆ ಎಂಬ ವಿಚಾರವೂ ತನಿಖೆಯಿಂದ ಬೆಳಕಿಗೆ ಬಂದಿದೆ.
ಜಮ್ಮು ಮತ್ತು ಕಾಶ್ಮೀರದಲ್ಲಿ ಇರುವವರೆಲ್ಲರೂ ಭಯೋತ್ಪಾದಕರಲ್ಲ ಎಂದು ಕೇಂದ್ರ ಗೃಹ ಸಚಿವ ರಾಜನಾಥ್‌ ಸಿಂಗ್‌ ಸ್ಪಷ್ಟವಾಗಿ ಹೇಳಿದ್ದಾರೆ.
Related Articles
ಉಗ್ರರ ದಾಳಿಗೆ ದಾರುಣವಾಗಿ 7 ಮಂದಿ ಅಸುನೀಗಿರುವ ದುಃಖದಾಯಕ ಘಟನೆಯ ಬೆನ್ನಲ್ಲೇ ಸಮಾಧಾನಪಟ್ಟುಕೊಳ್ಳುವಂಥ ಘಟನೆ ಬೆಳಕಿಗೆ ಬಂದಿದೆ. ಸಲೀಂ ಶೇಖ್‌ ಎಂಬ ಬಸ್‌ ಚಾಲಕ ಉಗ್ರರು ಗುಂಡು ಹಾರಿಸುತ್ತಿದ್ದರೂ, ಬಸ್‌ ಚಲಾಯಿಸಿಕೊಂಡು ಬಂದಿದ್ದಾರೆ. ಇದರಿಂದಾಗಿ 51 ಮಂದಿ ಇತರ ಯಾತ್ರಿಕರ ಜೀವ ಕಾಪಾಡಿದ್ದಾರೆ. ‘ಗುಂಡು ಹಾರುತ್ತಿದ್ದರೂ ವೇಗವಾಗಿ ಬಸ್‌ ಚಲಾಯಿಸುವಂತೆ ದೇವರು ನನಗೆ ಶಕ್ತಿ ನೀಡಿದರು. ಅದರಿಂದಾಗಿಯೇ ಇಂಥ ಕ್ರಮ ಸಾಧ್ಯವಾಯಿತು’ ಎಂದಿದ್ದಾರೆ.
Advertisement
ಮಹಾರಾಷ್ಟ್ರದ ಪಲ್ಲವಿ ಅಭ್ಯಂಕರ್‌ ಎಂಬವರು ಕೂಡ ದಾಳಿಯ ಬಗ್ಗೆ ಪ್ರತಿಕ್ರಿಯೆ ನೀಡಿ ಆರಂಭದಲ್ಲಿ ಪಟಾಕಿಯ ಸದ್ದಿನಂತೆ ಕೇಳಿಸಿತು. ಕೂಡಲೇ ಅದು ಗುಂಡು ಹಾರಿದ ಶಬ್ದ ಎಂದು ಗೊತ್ತಾಯಿತು. ಚಾಲಕ ಜತನದಿಂದ ಬಸ್‌ ಚಲಾಯಿಸಿ ಹೆಚ್ಚಿನವರನ್ನು ಕಾಪಾಡಿದ್ದಾರೆ ಎಂದು ಶ್ಲಾಘಿಸಿದರು.
ಶೌರ್ಯ ಪ್ರಶಸ್ತಿಗೆ ಶಿಫಾರಸು: ದುರಂತದಿಂದ ಹೆಚ್ಚಿನವರನ್ನು ಕಾಪಾಡಿದ್ದಕ್ಕಾಗಿ ಗುಜರಾತ್‌ ಮುಖ್ಯಮಂತ್ರಿ ವಿಜಯ ರುಪಾಣಿ ಸಲೀಂ ಶೇಖ್‌ರನ್ನು ಕೊಂಡಾಡಿದ್ದಾರೆ. ಅವರ ಹೆಸರನ್ನು ಶೌರ್ಯ ಪ್ರಶಸ್ತಿಗೆ ಶಿಫಾರಸು ಮಾಡುವುದಾಗಿ ಹೇಳಿದ್ದಾರೆ. ಜಮ್ಮು ಮತ್ತು ಕಾಶ್ಮೀರ ಸರಕಾರದ ವತಿಯಿಂದ 5 ಲಕ್ಷ ರೂ. ನಗದು ಬಹುಮಾನ ಘೋಷಿಸಲಾಗಿದೆ.