ಚಾರಣ ಪ್ರಿಯ ಪ್ರವಾಸಿಗರಿಗೆ ಸಂಕಷ್ಟ

ಕಾಸರಗೋಡು: ಚಾರಣ ಪ್ರಿಯರ ಸ್ವರ್ಗ ಎಂದೇ ಪ್ರಸಿದ್ಧವಾದ ರಾಣಿಪುರಂ “ಕೇರಳದ ಊಟಿ’ ಎಂದು ಗುರುತಿಸಿಕೊಂಡಿದೆ. ಈ ಕಾರಣದಿಂದಲೇ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರಕೃತಿ ಸೌಂದರ್ಯ ಆಸ್ವಾದಿಸಲು ಬರುತ್ತಿದ್ದಾರೆ. ಆದರೆ ಇಲ್ಲಿ ಕೆಲವು ದಿನಗಳಿಂದ ಲ್ಯಾಂಡ್‌ ಫೋನ್‌ ನಿಶ್ಚಲಗೊಂಡಿರುವುದರಿಂದ ಪ್ರವಾಸಿಗರು ಯಾರೊಂದಿಗೂ ಸಂಪರ್ಕ ಸಾಧಿಸಲು ಸಾಧ್ಯವಾಗದೆ ಸಂಕಷ್ಟ ಎದುರಿಸುತ್ತಿದ್ದಾರೆ.

ಹರಿದ್ವರ್ಣದಿಂದ ಕಂಗೊಳಿಸುವ ರಾಣಿಪುರಂ ಪ್ರವಾಸಿ ಕೇಂದ್ರದಲ್ಲಿ ಕಳೆದ ಹತ್ತು ದಿನಗಳಿಂದ ದೂರವಾಣಿ ಸಂಪರ್ಕ ಕಡಿದಿದೆ. ಕಡಿದು ಹೋಗಿರುವ ದೂರವಾಣಿ ಸಂಪರ್ಕವನ್ನು ದುರಸ್ತಿ ಗೊಳಿಸಲು ಸಂಬಂಧಪಟ್ಟವರು ಮುಂದಾ ಗದಿರುವುದರಿಂದ ಜನರು ಆಕ್ರೋಶಿತ ರಾಗಿದ್ದಾರೆ. ಇಲಾಖೆ ಅಧಿಕಾರಿಗಳ ಅವಗಣನೆಯನ್ನು ಪ್ರತಿಭಟಿಸಿದ್ದಾರೆ.

ಮೊದಲೇ ರಾಣಿಪುರಂನಲ್ಲಿ ಮೊಬೈಲ್‌ ರೇಂಜ್‌ ಇಲ್ಲ. ಇಂತಹ ಸಂದರ್ಭದಲ್ಲಿ ರಾಣಿಪುರಂಗೆ ಬರುವ ಪ್ರವಾಸಿಗರಿಗೆ ಸಂಪರ್ಕಿಸಬೇಕಾಗಿದ್ದಲ್ಲಿ ಬಿ.ಎಸ್‌.ಎನ್‌.ಎಲ್‌.ನ ಲ್ಯಾಂಡ್‌ ಫೋನ್‌ ಮಾತ್ರವೇ ಏಕೈಕ ಆಶ್ರಯವಾಗಿತ್ತು. ಆದರೆ ಇದೀಗ ಇದೂ ಕೈಕೊಟ್ಟಿದೆ. ನಿಶ್ಚಲಗೊಂಡ ಲ್ಯಾಂಡ್‌ ಫೋನ್‌ ದುರಸ್ತಿಗೊಳಿಸದಿರುವುದರಿಂದ ಇಲ್ಲಿಗೆ ಬರುವ ಪ್ರವಾಸಿಗರಿಗೆ ಸಮಸ್ಯೆ ಸೃಷ್ಟಿಯಾಗಿದೆ. ಪ್ರವಾಸಿಗರಿಗೆ ತಮ್ಮ ಮನೆಯವರೊಂದಿಗೆ ಸಂಪರ್ಕ ಸಾಧಿಸಲು ಸಾಧ್ಯವಾಗದ ಸ್ಥಿತಿ ಉಂಟಾಗಿದೆ.

ದಿನಗಳ ಹಿಂದೆ ರಾಣಿಪುರಂಗೆ ಬಂದಿದ್ದ ವ್ಯಕ್ತಿಯೋರ್ವರ ಮನೆಯಲ್ಲಿ ಸಂಭವಿಸಿದ ನಿಧನದ ಮಾಹಿತಿಯನ್ನು ರವಾನಿ ಸಲು ಸಾಧ್ಯವಾಗದಿದ್ದುದರಿಂದ ಭಾರೀ ಪ್ರತಿಭಟನೆಗೆ ಕಾರಣವಾಗಿತ್ತು.

ರಾಣಿಪುರಂ ಶಿಖರ
ಕಾಸರಗೋಡು ಜಿಲ್ಲೆಯ ಪ್ರಮುಖ ಪ್ರವಾಸೋದ್ಯಮ ಕೇಂದ್ರವಾಗಿರುವ ರಾಣಿಪುರಂ ಸಮುದ್ರ ಮಟ್ಟದಿಂದ 700 ಮೀ. ಎತ್ತರದಲ್ಲಿದೆ. ರಾಣಿಪುರಂ ಕೇರಳದ ಊಟಿ ಎಂದೂ ಜನಪ್ರಿಯವಾಗಿದೆ. ಮುಖ್ಯ ವಾಗಿ ರಾಣಿಪುರಂ ಪರಿಸರ ಪ್ರವಾಸೋ ದ್ಯಮಕ್ಕೆ ಹೆಸರುವಾಸಿ. ನಿತ್ಯ ಹರಿದ್ವರ್ಣ ಕಾಡುಗಳು, ಮನ್ಸೂನ್‌ ಕಾಡುಗಳನ್ನು ಹೊಂದಿರುವ ರಾಣಿಪುರಂ ಶೋಲಾ ಮರಗಳು, ಇನ್ನಿತರ ವಿಶೇಷ ಅರಣ್ಯ ಸಂಪತ್ತನ್ನು ಹೊಂದಿದೆ. ಈ ಗಿರಿಶಿಖರ ಹಲವಾರು ಪ್ರಾಣಿಪಕ್ಷಿ ಗಳಿಗೆ ವಾಸಸ್ಥಾನವಾಗಿದೆ. ಜಿಂಕೆ, ಆನೆಗಳು, ವಿವಿಧ ರೀತಿಯ ಮಂಗಗಳು, ಪಕ್ಷಿ ಪ್ರಭೇದಗಳು ಇಲ್ಲಿ ಕಾಣ ಸಿಗುತ್ತವೆ. ಕರ್ನಾಟಕದ ತಲಕಾವೇರಿ ಅಭಯಾ ರಣ್ಯದೊಂದಿಗೆ ರಾಣಿಪುರಂ ತನ್ನ ಗಡಿ ಯನ್ನು ವಿಲೀನಗೊಳಿಸುತ್ತದೆ. ಕೇರಳದ ಇತರ ಗಿರಿಧಾಮಗಳಂತೆ ರಾಣಿಪುರಂ ಅತ್ಯಂತ ಜನಪ್ರಿಯ ಚಾರಣ ಸ್ಥಳವಾಗಿದೆ. ಎತ್ತರದ ಟ್ರೆಕ್ಕಿಂಗ್‌ ಪಾಯಿಂಟ್‌ನ್ನು “ಮಣಿಮಾಲಾ’ ಎಂದು ಕರೆಯಲ್ಪಡುತ್ತದೆ. ಇಲ್ಲಿನ ಹಸಿರ ಸೌಂದರ್ಯ, ಸ್ವತ್ಛವಾದ ತಂಪು ಗಾಳಿ ಚಾರಣದ ದಣಿವು ನಿವಾರಿಸು ವಂತೆ ಮಾಡುತ್ತದೆ. ಪ್ರಕೃತಿಯ ಮಡಿಲ ಸೌಂದರ್ಯದಲ್ಲಿ ಆಯಾಸ ಮರೆಯಾ ಗುತ್ತದೆ. ಚಾರಣ ಮಾಡುವ ವೇಳೆ ಅಪರೂಪದ ಔಷ ಧೀಯ ಸಸ್ಯಗಳನ್ನು ಕಾಣ ಬಹುದು. ವಿವಿಧ ರೀತಿಯ ಜೀವಿ ಗಳು, ಹಲವು ಪ್ರಭೇದಗಳ ಪಕ್ಷಿ ಗಳನ್ನೂ ಗುರುತಿಸ ಬಹುದು. ರಾಣಿ ಪುರಂ ಚಾರಣವು ರೋಮಾಂಚನಕಾರಿ ಅನುಭವವನ್ನೂ ನೀಡುತ್ತದೆ.

ಉತ್ತರ ಲಭಿಸುತ್ತಿಲ್ಲ
ರಾಣಿಪುರಂ ಪ್ರದೇಶದಲ್ಲಿ ಪದೇ ಪದೇ ದೂರವಾಣಿ ಸಂಪರ್ಕ ಕಡಿಯುವುದರಿಂದ ತೀವ್ರ ಸಂಕಷ್ಟಕ್ಕೆ ಕಾರಣವಾಗುತ್ತಿದೆ. ರೋಗಿಗಳನ್ನು ಆಸ್ಪತ್ರೆಗೆ ಕೊಂಡೊಯ್ಯಲು ಆ್ಯಂಬುಲೆನ್ಸ್‌ ಕರೆಸಲು ಸಾಧ್ಯವಾಗದ ದುಸ್ಥಿತಿ ಇದೆ ಎಂದು ಸ್ಥಳೀಯರು ಹೇಳುತ್ತಿದ್ದಾರೆ. ದೂರವಾಣಿ ಇಲಾಖೆಯನ್ನು ಸಂಪರ್ಕಿಸಿದಾಗ ಸಂಬಂಧಪಟ್ಟವರಿಂದ ತೃಪ್ತಿಕರವಾದ ಉತ್ತರ ಲಭಿಸುತ್ತಿಲ್ಲ ಎಂದು ಸ್ಥಳೀಯರು ಆರೋಪಿಸುತ್ತಿದ್ದಾರೆ.