ಎಡ-ಬಲ ಅನುರಾಗದ ದಾಂಪತ್ಯ

ಹೊಸದಿಲ್ಲಿ: ಜಮ್ಮು ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನಮಾನ ರದ್ದುಗೊಳಿಸಿದ ಕೇಂದ್ರ ಸರಕಾರವನ್ನು ಪ್ರಶಂಸಿಸಿ ಸಂಸತ್ತಿನಲ್ಲಿ ಗಮನ ಸೆಳೆಯುವ ಭಾಷಣ ಮಾಡಿದ್ದ ಲಡಾಖ್‌ನ ಬಿಜೆಪಿ ಸಂಸದ ಸೆರಿಂಗ್‌ ಜಮ್ಯಂಗ್‌ಗೆ ಮನೆಯಲ್ಲೇ ರಾಜಕೀಯ ವಿರೋಧಿ ಇದ್ದಾರೆ! ಬೇರಾರೂ ಅಲ್ಲ; ಅವರ ಪತ್ನಿ ಸೋನಂ.

ಆಂಗ್ಲ ಪತ್ರಿಕೆಯೊಂದಕ್ಕೆ ನೀಡಿರುವ ವಿಶೇಷ ಸಂದರ್ಶನದಲ್ಲಿ ಇಬ್ಬರೂ ಈ ವಿಚಾರವನ್ನು ಹೇಳಿಕೊಂಡಿದ್ದಾರೆ. ಮದುವೆಯಾಗಿ ಆರು ತಿಂಗಳಾಗಿದ್ದು, ನಡುವಿನ ಸೈದ್ಧಾಂತಿಕ ಭಿನ್ನಾಭಿಪ್ರಾಯ ತಮ್ಮ ದಾಂಪತ್ಯದ ಸೊಗಸನ್ನು ಕಸಿದಿಲ್ಲ ಎಂದಿದ್ದಾರೆ. ಸೆರಿಂಗ್‌ ಪತ್ನಿ ಸೋನಂ ಜೆಎನ್‌ಯು ವಿದ್ಯಾರ್ಥಿನಿ. ಆಕೆ ಕಮ್ಯೂನಿಸ್ಟ್‌ ವಿಚಾರಧಾರೆಯ ಪ್ರಭಾವ ಹೊಂದಿದ್ದಾರೆ. ಪತಿ ಬಿಜೆಪಿ – ಆರ್‌ಎಸ್‌ಎಸ್‌ ಕಡೆ ನನ್ನನ್ನು ಸೆಳೆಯು ತ್ತಲೇ ಇದ್ದಾರೆ; ನಾನು ಅತ್ತ ವಾಲಿಲ್ಲ ಎಂದು ನಗುತ್ತ ತಿಳಿಸಿದ್ದಾರೆ ಸೋನಂ.

ಕನ್ಹಯ್ಯ ಕುಮಾರ್‌ ಬಗ್ಗೆಯೂ ಮಾಹಿತಿ ಹೊರಗೆಡವಿರುವ ಸೋನಂ, ಕನ್ಹಯ್ಯ ಕುಮಾರ್‌ ಬಂಧನ ತಪ್ಪು. ಏಕೆಂದರೆ ದೇಶದ್ರೋಹದ ಘೋಷಣೆ ಕೂಗುವ ವೇಳೆ ಕನ್ಹಯ್ಯ ಅಲ್ಲಿ ಇರಲೇ ಇಲ್ಲ ಎಂಬ ಮಾಹಿತಿ ನೀಡಿದ್ದಾರೆ. ಆಗ ಹೊರಬಿದ್ದ ವಿಡಿಯೋ ಸಂಪೂರ್ಣ ನಕಲಿಯಾಗಿತ್ತು. ನಾನು ಆ ಸ್ಥಳದಲ್ಲೇ ಇದ್ದೆ ಎಂದು ಸೋನಂ ಹೇಳಿದ್ದಾರೆ.

ಇಂಥ ಹತ್ತು ಹಲವಾರು ವಾಗ್ವಾದಗಳನ್ನು ಪತಿಯ ಜತೆಗೆ ನಿತ್ಯವೂ ನಡೆಸುವುದಾಗಿ ಸೋನಂ ಹೇಳಿಕೊಂಡಿದ್ದಾರೆ.