ಶಿರೂರ ಶ್ರೀ ಸಿದ್ದೇಶ್ವರ ಜಾತ್ರೆ ನಿಮಿತ್ತ ಕುಸ್ತಿ ಪಂದ್ಯಾವಳಿಗೆ ಚಾಲನೆ

ಶಿರೂರ: ಸ್ಥಳೀಯ ಶ್ರೀ ಸಿದ್ಧೇಶ್ವರ ದೇವರ ಜಾತ್ರೆ ಹಾಗೂ ಲಿಂ| ಸಿದ್ಧಲಿಂಗ ಸ್ವಾಮೀಜಿಗಳ ಪುಣ್ಯಸ್ಮರಣೆ ನಿಮಿತ್ತ  ಜಾತ್ರಾ ಕಮಿಟಿ ಜಂಗಿ ನಿಕಾಲಿ ಕುಸ್ತಿ ಪಂದ್ಯಾವಳಿ ಹಮ್ಮಿಕೊಂಡಿತ್ತು.

ಗ್ರಾಮದ ಓಣಿಗಳಾದ ಕಮ್ಮಾರ ಓಣಿ, ಲಂಗಟದವರ ಓಣಿ, ದೊಡ್ಡೋಣಿ, ಗೌಡರ ಓಣಿ, ಪಂಚಪ್ಪನ ಪೇಟೆ, ನೇಕಾರ ಪೇಟೆ ಓಣಿಯ ಕುಸ್ತಿಪಟುಗಳು ಹಲಗೆ ಬಾರಿಸುತ್ತ ಕೇಸರಿ ಧ್ವಜ ಹಿಡಿದು ಘೋಷಣೆ ಕೂಗುತ್ತ ಕುಸ್ತಿ ಕಣಕ್ಕೆ ಆಗಮಿಸಿದರು.

ಪಂದ್ಯಾವಳಿ ವೀಕ್ಷಣೆಗೆ ಆಗಮಿಸಿದ ಅಭಿಮಾನಿಗಳ ಸಂಭ್ರಮ ಕೇಕೆ ಚಪ್ಪಾಳೆಗಳ ನಡುವೆ ಯುವ ಫೈಲ್ವಾನರು ಕಣಕ್ಕೆ ಇಳಿದು ಸಾಹಸ ಶಕ್ತಿ ಮೆರೆದರು.

ಲಕ್ಕುಂಡಿ, ಧಾರವಾಡ, ಬೆಳಗಾವಿ ಜಿಲ್ಲೆ, ಬೆಳಗಲ್ಲ ಮತ್ತು ಶಿರೂರು, ಬೇವಿಮಟ್ಟಿ, ಸೂಳೆಭಾವಿ, ರಕ್ಕಸಗಿ, ಕಾತರಕಿ, ಕಮತಗಿ ಸೇರಿದಂತೆ ಹಲವಾರು ಗ್ರಾಮಗಳಿಂದ ನೂರಕ್ಕೂ ಹೆಚ್ಚು ಕುಸ್ತಿ ಪಟುಗಳು ಭಾಗವಹಿಸಿ ಪಂದ್ಯಾವಳಿ ಮೆರಗು ಹೆಚ್ಚಿಸಿದರು.