ಕುಲಭೂಷಣ್‌ ಜಾಧವ್‌ ಕೇಸ್‌ : ಗುರುವಾರ ಹೇಗ್‌ ಕೋರ್ಟ್‌ ತೀರ್ಪು

ದ ಹೇಗ್‌ : ಭಾರತೀಯ ಬೇಹುಗಾರನೆಂದು ಪರಿಗಣಿಸಿ ಪಾಕಿಸ್ಥಾನದಲ್ಲಿ ಭಯೋತ್ಪಾದಕ ಹಾಗೂ ಬುಡಮೇಲು ಕೃತ್ಯಗಳನ್ನು ಆಯೋಜಿಸಿದ್ದ ಆರೋಪದ ಮೇಲೆ ಭಾರತೀಯ ನೌಕಾಪಡೆಯ ಮಾಜಿ ಅಧಿಕಾರಿ 46ರ ಹರೆಯದ ಕುಲಭೂಷಣ ಜಾಧವ್‌ಗೆ ಪಾಕ್‌ ಮಿಲಿಟರಿ ಕೋರ್ಟ್‌ ವಿಧಿಸಿದ್ದ ಮರಣದಂಡನೆಯನ್ನು ಅಮಾನತು ಗೊಳಿಸುವಂತೆ ಆಗ್ರಹಿಸಿ ಭಾರತ ಸಲ್ಲಿಸಿದ ಅರ್ಜಿಯ ಮೇಲೆ ವಿಚಾರಣೆ ನಡೆಸುತ್ತಿರುವ ದ ಹೇಗ್‌ನಲ್ಲಿನ ಅಂತಾರಾಷ್ಟ್ರೀಯ ನ್ಯಾಯಾಲಯವು ನಾಳೆ ಗುರುವಾರ ತೀರ್ಪು ನೀಡಲಿದೆ ಎಂದು ಭಾರತ ಸರಕಾರದ ಮೂಲಗಳು ತಿಳಿಸಿವೆ. 

ಭಾರತ ಹಾಗೂ ಪಾಕಿಸ್ಥಾನ ಈ ಮೊದಲು ಜಾಧವ್‌ ವಿಷಯ ಕುರಿತಾಗಿ ತಮ್ಮ ವಾದ – ಪ್ರತಿವಾದವನ್ನು ಈಗಾಗಲೇ ಮಂಡಿಸಿದ್ದು ನ್ಯಾಯಾಲಯವು ಅದನ್ನು ಪೂರ್ತಿಯಾಗಿ ಆಲಿಸಿದೆ. 

ತಾತ್ಕಾಲಿಕ ತುರ್ತು ಕ್ರಮವಾಗಿ ಅಂತಾರಾಷ್ಟ್ರೀಯ ನ್ಯಾಯಾಲಯವು ಕುಲಭೂಷಣ್‌ ಜಾಧವ್‌ಗೆ ಪಾಕ್‌ ಮಿಲಿಟರಿ ಕೋರ್ಟ್‌ ವಿಧಿಸಿರುವ ಮರಣದಂಡನೆಯ ಶಿಕ್ಷೆಯನ್ನು ತತ್‌ಕ್ಷಣ ಅಮಾನತು ಮಾನವ ಹಕ್ಕನ್ನು ಎತ್ತಿ ಹಿಡಿಯುವಂತೆ ಭಾರತ ಕೋರಿದ್ದು  ಆ ಕುರಿತಾಗಿ ಅಂತಾರಾಷ್ಟ್ರೀಯ ನ್ಯಾಯಾಲಯವು ನಾಳೆ ಗುರುವಾರ ತೀರ್ಪು ನೀಡಲಿದೆ ಎಂದು ಗೊತ್ತಾಗಿದೆ.