ಕೆಎಸ್‌ಸಿಎ ಚುನಾವಣೆ: ಬಿನ್ನಿ, ಹರೀಶ್‌ ಪೈಪೋಟಿ

ಬೆಂಗಳೂರು: ಕರ್ನಾಟಕ ರಾಜ್ಯ ಕ್ರಿಕೆಟ್‌ ಸಂಸ್ಥೆಗೆ (ಕೆಎಸ್‌ಸಿಎ) ಮತದಾನ ಪ್ರಕ್ರಿಯೆ ಗುರುವಾರ ಬಿರುಸಿನಿಂದ ಸಾಗಿತು. ಮಾಜಿ ಕ್ರಿಕೆಟಿಗ ಬೃಜೇಶ್‌ ಪಟೇಲ್‌ ಬೆಂಬಲಿತ ರೋಜರ್‌ ಬಿನ್ನಿ ಹಾಗೂ ತಂಡವು ನಿವೃತ್ತ ಸೇನಾಧಿಕಾರಿ ಕ್ಯಾಪ್ಟನ್‌ ಎಂ.ಎಂ. ಹರೀಶ್‌ ಮತ್ತು ಟೀಮನ್ನು ಎದುರಿಸಿತು.

ಕಳೆದೆರಡು ದಿನಗಳಿಂದ ಎರಡೂ ಗುಂಪುಗಳು ಬಿರುಸಿನ ಪ್ರಚಾರ ನಡೆಸಿ ದ್ದವು. ಗುರುವಾರ ಬೆಳಗ್ಗೆ 8 ಗಂಟೆಗೆ ಮತದಾನ ಆರಂಭವಾಯಿತು. ಸಂಜೆ 7ರ ತನಕ ಇದು ಮುಂದುವರಿಯಿತು. ರಾತ್ರಿ 8 ಗಂಟೆಗೆ ಮತ ಎಣಿಕೆ ಕಾರ್ಯ ಆರಂಭಗೊಂಡಿತು.

ಉತ್ಸಾಹದ ಮತದಾನ
ಕೆಎಸ್‌ಸಿಎಯ ಒಟ್ಟು 1,623 ಆಜೀವ ಸದಸ್ಯರು, 348 ಕ್ಲಬ್‌ ಸದಸ್ಯರು ತಮ್ಮ ಹಕ್ಕು ಚಲಾಯಿಸಿದರು. ಅಧ್ಯಕ್ಷ ಸ್ಥಾನಕ್ಕೆ ರೋಜರ್‌ ಬಿನ್ನಿ , ಉಪಾಧ್ಯಕ್ಷ ಸ್ಥಾನಕ್ಕೆ ಜೆ. ಅಭಿರಾಮ್‌, ಖಜಾಂಚಿ ಸ್ಥಾನಕ್ಕೆ ವಿನಯ್‌ ಮೃತ್ಯುಂಜಯ, ಕಾರ್ಯದರ್ಶಿ ಸ್ಥಾನಕ್ಕೆ ಸಂತೋಷ್‌ ಮೆನನ್‌ ಹಾಗೂ ಜಂಟಿ ಕಾರ್ಯದರ್ಶಿ ಸ್ಥಾನಕ್ಕೆ ಶವೀರ್‌ ತಾರಾಪುರ್‌ ಸ್ಪರ್ಧಿಸಿದ್ದಾರೆ. ಎದುರಾಳಿ ಬಣದಿಂದ ಅಧ್ಯಕ್ಷ ಸ್ಥಾನಕ್ಕೆ ಎಂ.ಎಂ. ಹರೀಶ್‌ ಸ್ಪರ್ಧಿಸಿದ್ದರು. ಕಾರ್ಯದರ್ಶಿ ಸ್ಥಾನಕ್ಕೆ ಕೆ.ಎಸ್‌. ರಘುರಾಮ್‌, ಜಂಟಿ ಕಾರ್ಯದರ್ಶಿಸ್ಥಾನಕ್ಕೆ ಜೋಸೆಫ್ ಹೂವಾರ್‌, ಖಜಾಂಚಿ ಸ್ಥಾನಕ್ಕೆ ಬಿ.ಎನ್‌. ಮಧುಕರ್‌ ಸ್ಪರ್ಧೆ ಮಾಡಿದ್ದಾರೆ. ಮೂಲಗಳ ಪ್ರಕಾರ ಬೃಜೇಶ್‌ ಬೆಂಬಲಿತ ರೋಜರ್‌ ಬಿನ್ನಿ ಬಣ ಗೆಲುವು ಸಾಧಿಸುವುದು ಖಚಿತ ಎಂದು ಅಂದಾಜಿಸಲಾಗಿದೆ.