Thalaivar 170: ರಜಿನಿಕಾಂತ್‌ ಎದುರು ವಿಲನ್‌ ಆಗಿ ಅಬ್ಬರಿಸಲಿದ್ದಾರ ಫಾಹದ್ ಫಾಸಿಲ್?‌

ಚೆನ್ನೈ: ಸೂಪರ್‌ ಸ್ಟಾರ್‌ ರಜಿನಿಕಾಂತ್‌ ʼಜೈಲರ್‌ʼ ಸಿನಿಮಾ ಇಂಡಸ್ಟ್ರಿಯಲ್ಲಿ ದೊಡ್ಡ ಹಿಟ್ ಆದ ಸಂತಸಲ್ಲಿದ್ದಾರೆ. ಬಾಕ್ಸ್‌ ಆಫೀಸ್‌ ನಲ್ಲಿ 400 ಕೋಟಿಗೂ ಅಧಿಕ ಗಳಿಕೆ ಕಂಡು ಸಿನಿಮಾ ಯಶಸ್ವಿಯಾಗಿ ಪ್ರದರ್ಶನ ಕಾಣುತ್ತಿದೆ.

ʼಜೈಲರ್‌ʼ ಹಿಟ್‌ ಬಳಿಕ ರಜಿನಿಕಾಂತ್‌ ಅವರ ಮುಂದಿನ ಸಿನಿಮಾಗಳ ಬಗ್ಗೆ ಮಾತುಗಳು ಅಭಿಮಾನಿಗಳ ವಲಯದಲ್ಲಿ ಜೋರಾಗಿದೆ. ‘Thalaivar 170’ ಸಿನಿಮಾದ ಬಗ್ಗೆ ಟ್ರೆಂಡ್‌ ಶುರುವಾಗಿದೆ.

ರಜಿನಿಕಾಂತ್‌ ಅವರ ಮುಂದಿನ ಸಿನಿಮಾಕ್ಕೆ ʼಜೈ ಭೀಮ್‌ʼ ಖ್ಯಾತಿಯ ಟಿಜೆ ಜ್ಞಾನವೇಲ್ ಅವರು ಆ್ಯಕ್ಷನ್ ಕಟ್‌ ಹೇಳಲಿದ್ದಾರೆ. ಈ ಸಿನಿಮಾದಲ್ಲಿ ಖಳನಾಯಕನಾಗಿ ಖ್ಯಾತ ನಟರೊಬ್ಬರು ನಟಿಸಲಿದ್ದಾರೆ ಎನ್ನಲಾಗಿದೆ.

ಮಾರಿ ಸೆಲ್ವರಾಜ್‌ ಅವರ ʼ “ಮಾಮಣ್ಣನ್”ಸಿನಿಮಾದಲ್ಲಿ ರಗಡ್ ರಾಜಕಾರಣಿ ರತ್ನವೇಲು ಪಾತ್ರದಲ್ಲಿ ಮಾಲಿವುಡ್‌ ಸ್ಟಾರ್‌ ನಟ ಫಾಹದ್ ಫಾಸಿಲ್ ನಟಿಸಿದ್ದರು. ಅವರ ಈ ಪಾತ್ರವನು ಅನೇಕರು ಮೆಚ್ಚಿಕೊಂಡಿದ್ದರು.

ಈ ಪಾತ್ರದ ಬಳಿಕ ಅವರಿಗೆ ಮತ್ತೆ ಖಳನಾಯಕನಾಗಿ ನಟಿಸುವ ಆಫರ್‌ ಬಂದಿದೆ. ರಜಿನಿಕಾಂತ್‌ 170ನೇ ಸಿನಿಮಾದಲ್ಲಿ ಅವರು ವಿಲನ್‌ ಆಗಿ ನಟಿಸಲಿದ್ದಾರೆ ಎನ್ನುವ ವರದಿಯೊಂದು ಹೊರಬಿದ್ದಿದೆ.

ಈ ವಾರ ವಿಶೇಷ ಪೂಜೆಯೊಂದು ನಡೆಯುವ ಮೂಲಕ ಚಿತ್ರ ಲಾಂಚ್ ಆಗಲಿದೆ. ಸೆಪ್ಟೆಂಬರ್ ಮೂರನೇ ವಾರದಲ್ಲಿ ಚೆನ್ನೈನಲ್ಲಿ ಚಿತ್ರೀಕರಣ ಆರಂಭವಾಗಲಿದೆ. ಸದ್ಯ ಸೆಟ್ ಕೆಲಸ ನಡೆಯುತ್ತಿದೆ ಎಂದು ವರದಿ ತಿಳಿಸಿದೆ.

ಫಾಹದ್‌ ಮಾತ್ರವಲ್ಲದೆ, ಅಮಿತಾಭ್ ಬಚ್ಚನ್, ಮಂಜು ವಾರಿಯರ್ ಮತ್ತು ಶರ್ವಾನಂದ್ ಚಿತ್ರದಲ್ಲಿ ನಿರ್ಣಾಯಕ ಪಾತ್ರಗಳಲ್ಲಿ ನಟಿಸಲಿದ್ದಾರೆ ಎಂದು ವರದಿ ತಿಳಿಸಿದೆ.

ಈ ಸಿನಿಮಾದಲ್ಲಿ ʼತಲೈವಾʼ ಪೊಲೀಸ್‌ ಅಧಿಕಾರಿಯ ಪಾತ್ರದಲ್ಲಿ ನಟಿಸಲಿದ್ದಾರೆ ಎನ್ನಲಾಗಿದೆ. ‘ತಲೈವರ್ 170’ ಚಿತ್ರಕ್ಕೆ ಅನಿರುದ್ಧ್ ರವಿಚಂದರ್ ಸಂಗೀತ ನೀಡಲಿದ್ದಾರೆ. ಸಿನಿಮಾದ ಪಾತ್ರವರ್ಗ ಶೀಘ್ರದಲ್ಲಿ ಅನೌನ್ಸ್‌ ಆಗಲಿದೆ ಎಂದು ವರದಿ ತಿಳಿಸಿದೆ.