ಕ್ವಾರಂಟೈನ್‌ಲ್ಲಿರುವ 84 ಜನರ ಗಂಟಲು ದ್ರವ ಮಾದರಿ ಸಂಗ್ರಹ

ಕೊಲ್ಹಾರ: ಕೊಲ್ಹಾರ ಪಟ್ಟಣದ ರಾಣಿ ಚನ್ನಮ್ಮ ವಸತಿ ಶಾಲೆಯಲ್ಲಿ ಕ್ವಾರಂಟೈನ್‌ಗೆ ಒಳಗದ ತಾಲೂಕಿನ 84 ಜನರಿಗೆ ಜಿಲ್ಲಾ ಆರೋಗ್ಯಾಧಿಕಾರಿಗಳ ಆದೇಶದ ಮೇರೆಗೆ ಗಂಟಲು ದ್ರವ ಮಾದರಿ ಸಂಗ್ರಹಿಸಿ ಪರೀಕ್ಷೆಗೆ ಕಳುಹಿಸಲಾಯಿತು.

ಕೊಲ್ಹಾರ ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿ ಡಾ| ಸುಶಿಷ್ಠ ಗಣಾಚಾರಿ ತಾಲೂಕು ಆಸ್ಪತ್ರೆಯ ಎಸ್‌ .ಬಿ. ಹನುಮಶಟ್ಟಿ, ಆರ್‌.ಎನ್‌. ಗೌಡರ, ಎಸ್‌.ಎಸ್‌. ಕುಂಟೋಜಿ ಹಾಗೂ ಎಚ್‌. ಎಸ್‌. ಗೌಡರ ಕ್ವಾರಂಟೈನ್‌ಗೆ ಒಳಗಾದ ಜನರ ಗಂಟಲು ದ್ರವ ಮಾದರಿ ಸಂಗ್ರಹಿಸಿದರು. ಹೊರ ರಾಜ್ಯ ಹಾಗೂ ಇತರೆ ಪ್ರದೇಶಗಳಿಂದ ಬಂದಿರುವ ಸುಮಾರು 123 ಜನರನ್ನು ರಾಣಿಚನ್ನಮ್ಮ ವಸತಿ ಶಾಲೆಯಲ್ಲಿ ಕ್ವಾರಂಟೈನ್‌ಗೆ ಒಳಪಡಿಸಲಾಗಿದೆ. ಈಗಾಗಲೇ ಕೆಲವರ ಗಂಟಲು ದ್ರವ ಮಾದರಿ ಸಂಗ್ರಹಿಸಿ ಕಳುಹಿಸಲಾಗಿದ್ದು, ಉಳಿದ 84 ಜನರ ಗಂಟಲು ದ್ರವವನ್ನು ಸಂಗ್ರಹಿಸಿ ಇಂದು ಪರೀಕ್ಷೆಗೆ ಕಳುಹಿಸಲಾಗುತ್ತಿದೆ ಎಂದು ವೈದ್ಯಾಧಿಕಾರಿ ಡಾ| ಸುಶಿಷ್ಠ ಗಣಾಚಾರಿ ಪತ್ರಿಕೆಗೆ ಮಾಹಿತಿ ನೀಡಿದರು. ವಸತಿ ನಿಲಯದ ಮೇಲ್ವಿಚಾರಕಿ ನೋಡಲ್‌ ಅಧಿಕಾರಿ ಭುವನೇಶ್ವರಿ ಮೇಟಿ, ಅಶೋಕ ಕೊಲ್ಹಾರ ಇತರರು ಇದ್ದರು.