Kolara: ಏಲಕ್ಕಿ ಬಾಳೆಕಾಯಿ ಬೆಲೆ ಕುಸಿತ: 3 ಎಕರೆ ಬೆಳೆ ಕಡಿದು ಹಾಕಿದ ರೈತ

ಕೋಲಾರ: ಟೊಮೆಟೋ ಅನಂತರ ಬೆಲೆ ಕುಸಿತದ ಸರದಿ ಏಲಕ್ಕಿ ಬಾಳೆಕಾಯಿಗೆ ಬಂದಿದ್ದು ಏಲಕ್ಕಿ ಬಾಳೆ ಕಾಯಿ ಈ ಹಿಂದೆ ಕೆ.ಜಿ.ಯೊಂದಕ್ಕೆ 100 ರೂ.ವರೆಗೂ ಇತ್ತು. ಈಗ ಪ್ರತಿ ಕೆ.ಜಿ. ಬಾಳೆಕಾಯಿ 10 ರೂ.ಗೆ ಕೇಳುತ್ತಿರುವುದರಿಂದ ಬೇಸತ್ತ ತಾಲೂಕಿನ ಕೋಟಿಗಾನಹಳ್ಳಿ ರೈತನೊಬ್ಬ ತನ್ನ ತೋಟದಲ್ಲಿನ 3 ಎಕರೆ ಬಾಳೆಯನ್ನು ಶನಿವಾರ ಕಡಿದು ನೆಲಸಮ ಮಾಡಿದ್ದಾನೆ.

3 ಎಕರೆಯಲ್ಲಿ 2,600 ಗಿಡ ಬೆಳೆಸಿದ್ದು ಮೊದಲ ಫಸಲಿನ ಬಾಳೆಕಾಯಿಗೆ ಕೆ.ಜಿ.ಗೆ 30ರಿಂದ 60 ರೂ. ಸಿಕ್ಕಿತ್ತು. ಈಗ ಪ್ರತಿ ಕೆಜಿ ಬಾಳೆಕಾಯನ್ನು 10 ರೂ.ಗೆ ವ್ಯಾಪಾರಸ್ಥರು ಕೇಳುತ್ತಿರುವುದರಿಂದ ತಾನು ಹಾಕಿದ ಅಸಲೂ ಸಿಗುವುದಿಲ್ಲ ಎಂದು ಬೇಸರಗೊಂಡು ಬಾಳೆ ತೋಟ ನಾಶಪಡಿಸಿದ್ದಾನೆ.