ಕೋಲ್ಕತಾ: ಆರ್‌ಸಿಬಿ ಕ್ರಿಕೆಟಿಗ ವಿರಾಟ್‌ ಕೊಹ್ಲಿ ಉದ್ಯಮಗಳಲ್ಲಿ ಬಂಡವಾಳ ಹೂಡಿರುವುದು, ಹಲವು ರೆಸ್ಟೋರೆಂಟ್‌ಗಳನ್ನು ಹೊಂದಿರುವುದು ಕೆಲವರಿಗಷ್ಟೇ ಗೊತ್ತು. ಕೊಹ್ಲಿ ಅನೇಕ ರೆಸ್ಟೋರೆಂಟ್‌ಗಳ ಮಾಲಕ. ಮುಂಬಯಿ, ಹೊಸದಿಲ್ಲಿ, ಕೋಲ್ಕತಾ, ಪುಣೆ ಮೊದಲಾದೆಡೆ ಐಷಾರಾಮಿ ಸ್ಟಾರ್‌ ಹೊಟೇಲ್‌ಗ‌ಳನ್ನು ಹೊಂದಿದ್ದಾರೆ.
“ಬಾರ್‌ ಒನ್‌8 ಕಮ್ಯೂನ್‌” ಎಂಬುದು ಕೊಹ್ಲಿ ರೆಸ್ಟೋರೆಂಟ್‌ಗಳ ಬ್ರ್ಯಾಂಡ್‌ನೇಮ್‌. ಕೋಲ್ಕತಾದಲ್ಲಿ ಇದು 2021ರಲ್ಲಿ ಆರಂಭವಾಗಿತ್ತು. ಕೆಕೆಆರ್‌ ವಿರುದ್ಧ ಪಂದ್ಯವಾಡಲು ಬಂದಿರುವ ಆರ್‌ಸಿಬಿ ಕ್ರಿಕೆಟಿಗರು ಸ್ವತಃ ವಿರಾಟ್‌ ಕೊಹ್ಲಿ ಅವರೊಂದಿಗೆ “ಒನ್‌8 ರೆಸ್ಟೋರೆಂಟ್‌”ಗೆ ಭೇಟಿ ನೀಡಿ ಪಂದ್ಯ ಹಾಗೂ ಇನ್ನಿತರ ವಿಷಯದ ಕುರಿತು ಚರ್ಚೆ ನಡೆಸಿದರು.
ಸಾಂಪ್ರದಾಯಿಕ ಹಾಗೂ ಆಧುನಿಕ ಶೈಲಿ ಈ ರೆಸ್ಟೋರೆಂಟ್‌ನ ವಿಶೇಷ. ಹಳೆಯ ಕಾಲದ ವಿನ್ಯಾಸ ಹಾಗೂ ಪೀಠೊಪಕರಣಗಳೆಲ್ಲ ಕೋಲ್ಕತಾ ಮಹಾನಗರಿಯ ಗತಕಾಲದ ಚಿತ್ರಣವನ್ನು ಕಣ್ಮುಂದೆ ಅನಾವರಣಗೊಳಿಸುತ್ತದೆ.
ವಿರಾಟ್‌ ಕೊಹ್ಲಿ ಒಡೆತನದ “ಒನ್‌8 ರೆಸ್ಟೋರೆಂಟ್‌”ಗೆ ಆರ್‌ಸಿಬಿಯ ಪ್ರಮುಖ ಕ್ರಿಕೆಟಿಗರಾದ ಫಾ ಡು ಪ್ಲೆಸಿಸ್‌, ಗ್ಲೆನ್‌ ಮ್ಯಾಕ್ಸ್‌ವೆಲ್‌, ಮೊಹಮ್ಮದ್‌ ಸಿರಾಜ್‌ ಮೊದಲಾದವರು ಭೇಟಿ ನೀಡಿದರು.
ವಿರಾಟ್‌ ಕೊಹ್ಲಿ ಹಾಗೂ ಆರ್‌ಸಿಬಿ ಆಟಗಾರರು ಈ ರೆಸ್ಟೋರೆಂಟ್‌ಗೆ ಭೇಟಿ ನೀಡಿದ ವೇಳೆ ಕ್ರಿಕೆಟ್ ಅಭಿಮಾನಿಗಳು ಹೊರಗಡೆ ಜಮಾಯಿಸಿದ ದೃಶ್ಯ ಕಂಡುಬಂತು.
